ପୁରୀ: ଜଗନ୍ନାଥପ୍ରେମୀଙ୍କ ପାଇଁ ଖୁସି ଖବର । ଆଉ ନାହିଁ ଶ୍ରୀମନ୍ଦିର ନାଟମଣ୍ଡପ ଭାଙ୍ଗିବାର ଭୟ । ଶ୍ରୀମନ୍ଦିର ନାଟମଣ୍ଡପ ବିମରେ ଫାଟର ମରାମତି କାର୍ଯ୍ୟ 90 ପ୍ରତିଶତ ଶେଷ ହୋଇଥିବା ବେଳେ ଏହା ସମ୍ପୂର୍ଣ୍ଣ ସୁରକ୍ଷିତ ଥିବା ନେଇ ଏଏସଆଇ ସୁପରିଟେଣ୍ଡେଣ୍ଟ ସୂଚନା ଦେଇଛନ୍ତି । ଆଉ ମଧ୍ୟ ରଥଯାତ୍ରାରେ ଅବଶିଷ୍ଟ ମରାମତି କାର୍ଯ୍ୟ ହେବ ଶେଷ ହେବା ନେଇ କୁହାଯାଇଛି ।
ଶ୍ରୀମନ୍ଦିର ନାଟମଣ୍ଡପ ବିମରେ ସୃଷ୍ଟି ହୋଇଥିବା ଫାଟର ଅନୁଧ୍ୟାନ କରିଛନ୍ତି ଏଏସଆଇ ସୁପରିଟେଣ୍ଡେଣ୍ଟ ଡି.ବି. ଗଡ଼ନାୟକ । ତେବେ ଏଏସଆଇ ସୁପରିଟେଣ୍ଡେଣ୍ଟଙ୍କ ସୂଚନା ଅନୁଯାୟୀ, ନାଟମଣ୍ଡପ ବିମର ମରାମତି କାର୍ଯ୍ୟ ୯୦ ପ୍ରତିଶତ ଶେଷ ହୋଇଛି । କେବଳ ପ୍ଲାଷ୍ଟରିଂ କାର୍ଯ୍ୟ ବାକି ରହିଛି । ଆଗାମୀ ରଥଯାତ୍ରା ସମୟରେ ଏହାକୁ ଶେଷ କରାଯିବ । ନାଟମଣ୍ଡପ ବିମ୍ ମରାମତି ହେବା ପରେ ଏହା ସମ୍ପୂର୍ଣ୍ଣ ସୁରକ୍ଷିତ ଥିବା ଏଏସାଆଇ ପକ୍ଷରୁ କୁହାଯାଇଛି । ମହାପ୍ରଭୁଙ୍କ ଦର୍ଶନ କରିବାକୁ ଆସୁଥିବା ଭକ୍ତମାନଙ୍କ ଚଳପ୍ରଚଳରେ ମଧ୍ୟ କୋୖଣସି ବିପଦ ନାହିଁ ।
ସୂଚନାଯୋଗ୍ୟ, ଶ୍ରୀ ଜଗନ୍ନାଥ ମନ୍ଦିରର ନାଟମଣ୍ଡପ ବିମରେ ଫାଟ ହେବା ପରେ ଏହାର ତୁରନ୍ତ ମରାମତି ପାଇଁ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା । ଏହି ମାମଲାର ଶୁଣାଣି କରି ହାଇକୋର୍ଟ ତୁରନ୍ତ ନାଟମଣ୍ଡପର ମରାମତି କରିବା ପାଇଁ ଏଏସଆଇକୁ ନିର୍ଦ୍ଦେଶ ଦେଇଥିଲେ । ହାଇକୋର୍ଟଙ୍କ ନିର୍ଦ୍ଦେଶ ପରେ ଏଏସଆଇ ପକ୍ଷରୁ ମଧ୍ୟରେ ଏଦିଗରେ ତତ୍ପରତା ପ୍ରକାଶ ପାଇଥିଲା । ଗତ କାର୍ତ୍ତିକ ମାସରୁ ନାଟମଣ୍ଡପ ମରାମତି କାର୍ଯ୍ୟ ଆରମ୍ଭ ହୋଇଥିଲା । ତେବେ କାର୍ତ୍ତିକ ମାସରେ ଭକ୍ତଙ୍କ ପ୍ରବଳ ଗହଳି ଯୋଗୁ କାର୍ଯ୍ୟରେ ବିଳମ୍ବ ହୋଇଥିଲା ।
କାର୍ତ୍ତିକ ମାସ ପରେ ଛତିଶା ନିଯୋଗ ସହ ଏକ ବୈଠକ କରାଯାଇ ଏ ବିଷୟରେ ଆଲୋଚନା କରାଯାଇଥିଲା । ଗତ ଫେବୃଆରୀ ଶେଷ ସପ୍ତାହରେ ନାଟମଣ୍ଡପର ମରାମତି କାର୍ଯ୍ୟକୁ ଜୋରଦାର କରାଯାଇଥିଲା । କାର୍ଯ୍ୟ ପାଇଁ ଲୁହାର ଭାରା ସ୍ଥାପନ କରାଯାଇ ମରାମତି କାର୍ଯ୍ୟ ହୋଇଥିଲା । ଅପରାହ୍ନ ୧ଟାରୁ ସନ୍ଧ୍ୟା ୭ଟା ମଧ୍ୟରେ ଏହି ମରାମତି କାର୍ଯ୍ୟ କରାଯାଉଥିଲା । ତେବେ ମାର୍ଚ୍ଚ ୧୯ ତାରିଖ ସୁଦ୍ଧା ମରାମତି କାର୍ଯ୍ୟ ଶେଷ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିବା ବେଳେ ନିର୍ଦ୍ଧାରିତ ସମୟ ମଧ୍ୟରେ ଏହି ମରାମତି କାର୍ଯ୍ୟ 90 ପ୍ରତିଶତ ଶେଷ ହୋଇଥିବା ନେଇ ଏଏସଆଇ ପକ୍ଷରୁ କୁହାଯାଇଛି ।
ଇଟିଭି ଭାରତ, ପୁରୀ
