ପୁରୀ: ପାଖେଇ ଆସୁଛି ଘୋଷଯାତ୍ରା । ଜୋରସୋର ପ୍ରସ୍ତୁତିରେ ଲାଗି ପଡ଼ିଛି ପୁରୀ ଜିଲ୍ଲା ପ୍ରଶାସନ । ଶୃଙ୍ଖଳିତ ରଥଯାତ୍ରା ଆୟୋଜନ ନେଇ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସମୀକ୍ଷା କରିଛନ୍ତି । ଆଜି ପୂର୍ବାହ୍ନରେ ପୁରୀ ଗସ୍ତରେ ଆସିଥିଲେ ଆଇନ ମନ୍ତ୍ରୀ । ପ୍ରଥମେ ସର୍କିଟ ହାଉସ ଠାରେ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ, ଏସପି ପିନାକ ମିଶ୍ରଙ୍କ ସହ ବରିଷ୍ଠ ଅଧିକାରୀଙ୍କୁ ନେଇ ବିସ୍ତୃତ ଆଲୋଚନା କରିଥିଲେ ମନ୍ତ୍ରୀ । ସେହିପରି ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡାକ୍ତର କୃଷ୍ଣଚନ୍ଦ୍ର ମହାପାତ୍ର ମଧ୍ୟ ରଥଯାତ୍ରା ପରିଚାଳନା ସମ୍ପର୍କରେ ପୁରୀ ସର୍କିଟ ହାଉସ ଠାରେ ଏକ ବୈଠକରେ ଆଲୋଚନା କରିଥିଲେ । ରଥଯାତ୍ରା ପାଇଁ ଏଠାରେ ବିଭାଗ ତରଫରୁ 6 ଜଣଙ୍କୁ ନିଯୁକ୍ତି କରାଯାଇଥିବା ମନ୍ତ୍ରୀ ସୂଚନା ଦେଇଛନ୍ତି ।
ଚଳିତ ବର୍ଷ ବିରଳ ରଥଯାତ୍ରା ହେବାକୁ ଯାଉଛି । ତେଣୁ ବିଗତ ବର୍ଷ ଅପେକ୍ଷା ଚଳିତ ବର୍ଷ ରଥଯାତ୍ରାରେ ଭକ୍ତଙ୍କ ଅଧିକ ସମାଗମ ହେବ ବୋଲି ଆକଳନ କରାଯାଉଛି । ଯାହାକୁ ଦୃଷ୍ଟିରେ ରଖି ସମସ୍ତ ବିଭାଗର ବିଭାଗୀୟ ଅଧିକାରୀ ମାନେ ନିଜ ନିଜର ଦାୟିତ୍ଵ କିଭଳି ସମୟ ପୂର୍ବରୁ ସାରିବେ ସେନେଇ ନିର୍ଦ୍ଦେଶ ଦିଆଯାଇଥିବା ଆଇନ ମନ୍ତ୍ରୀ କହିଛନ୍ତି । ଭକ୍ତଙ୍କ ଦର୍ଶନ, ରହଣୀ, ଗମନାଗମନ, ପାର୍କିଂ ବ୍ୟବସ୍ଥା ସହ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ଉପରେ ମଧ୍ୟ ବିଶେଷ ଗୁରୁତ୍ୱ ଦିଆଯାଇଛି । ରଥଯାତ୍ରାରେ ମହାମହିମ ରାଷ୍ଟ୍ରପତି ସାମିଲ୍ ହେବାକୁ ଥିବାରୁ ସମସ୍ତ ବ୍ୟବସ୍ଥା କିଭଳି ରହିବ ସେନେଇ ମଧ୍ୟ ଅନୁଧ୍ୟାନ କରାଯାଇଥିବା କହିଛନ୍ତି ଆଇନ ମନ୍ତ୍ରୀ । ସମଙ୍ଗ ଠାରେ ରାଷ୍ଟ୍ରପତିଙ୍କ ହେଲିକପ୍ଟର ପହଞ୍ଚିବା ପରେ ରୁଟ୍ ପ୍ଲାନ୍ କିଭଳି ରହିବ, ଶ୍ରୀମନ୍ଦିର ସିଂହଦ୍ଵାର ଠାରେ କିଭଳି ବ୍ୟବସ୍ଥା ରହିବ ସେନେଇ ମଧ୍ୟ ଅନୁଧ୍ୟାନ କରିଛନ୍ତି ଆଇନ ମନ୍ତ୍ରୀ । ଶ୍ରୀମନ୍ଦିରରେ ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ରାଜ୍ୟ ସରକାର ସବୁ ବେଳେ ପ୍ରତିଶ୍ରୁତିବଦ୍ଧ ବୋଲି ମନ୍ତ୍ରୀ କହିଛନ୍ତି ।
