ଢେଙ୍କାନାଳ: ଜୟ ଶ୍ରୀରାମ ଧ୍ୱନୀରେ ପ୍ରକମ୍ପିତ ହେଲା ତହସିଲ ଅଫିସ । ଢେଙ୍କାନାଳ ତହସିଲ ଅନ୍ତର୍ଗତ ଭାପୁର ବେଗୁନିଆପାଳ ଗ୍ରାମର ଏକ ହନୁମାନ ମନ୍ଦିର ଜାଗା ପଟା ସଂଶୋଧନକୁ ନେଇ ଗ୍ରାମବାସୀ ପ୍ରତିବାଦ କରିଛନ୍ତି । ଏହି ପଟ୍ଟା ସଂଶୋଧନ ପାଇଁ ତହସିଲଦାର ଟାଳଟୁଳ ନୀତି ଅବଲମ୍ବନ କରିଥିବା ଗ୍ରାମବାସୀ ଅଭିଯୋଗ କରିଛନ୍ତି । ଯାହା ପ୍ରତିବାଦରେ ଆଜି ତହସିଲଦାରଙ୍କ କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନରେ ବସିଲେ ବେଗୁନିଆପାଳ ଗ୍ରାମବାସୀ ।
ଗ୍ରାମବାସୀ ମାନଙ୍କ ଅଭିଯୋଗ ହେଲା, ଢେଙ୍କାନାଳ ତହସିଲ ଅନ୍ତର୍ଗତ ଭାପୁର ରାଜସ୍ୱ ନିରୀକ୍ଷକଙ୍କ ଅଧୀନରେ ଥିବା ବେଗୁନିଆପାଳ ଗ୍ରାମରେ ଏକ ହନୁମାନ ମନ୍ଦିର ନିର୍ମାଣ ହେଉଛି । ଯାହାକୁ ସେଠାକାର ଗ୍ରାମବାସୀ ନିର୍ମାଣ କରୁଛନ୍ତି । ଏହି ହନୁମାନ ମନ୍ଦିରର ଜାଗାକୁ ହନୁମାନ ମନ୍ଦିର ଟ୍ରଷ୍ଟ ନାମରେ ରେଜିଷ୍ଟ୍ରି କରିବା ପାଇଁ ଆବେଦନ କରାଯାଇଥିଲା । ହେଲେ ଦୁଇବର୍ଷ ତଳେ ଏହି ଜାଗା କିଣିବା ପରେ ତହସିଲ ପକ୍ଷରୁ ପଟ୍ଟା ପ୍ରସ୍ତୁତି ସମୟରେ ଜାଗାର ପ୍ଲଟ ନମ୍ବର ଭୁଲ ଲେଖାଯାଇଥିଲା । ଯାହାକୁ ନେଇ ଅଡୁଆରେ ପଡିଯାଇଛନ୍ତି ଗ୍ରାମବାସୀ । ତେବେ ଏହାକୁ ସଂଶୋଧନ କରିବା ପାଇଁ ଢେଙ୍କାନାଳ ତହସିଲଦାରଙ୍କ ପାଖରେ ଆଜକୁ ଏକ ବର୍ଷ ହେଲା ଆବେଦନ କରାଯାଇଛି । ଏପରିକି ଏଥିପାଇଁ ତହସିଲଦାରଙ୍କୁ ବାରମ୍ବାର ମଧ୍ୟ ଗୁହାରି କରି ଆସୁଛନ୍ତି ଗ୍ରାମବାସୀ । ଅନେକ ଥର ତହସିଲଦାରଙ୍କ ପାଖକୁ ଦୌଡୁଥିଲେ ମଧ୍ୟ ସେ ଏହି ସଂଶୋଧନ କାମକୁ ଗଡ଼ାଇ ଚାଲିଛନ୍ତି ।
ଯାହାକୁ ନେଇ ଗ୍ରାମବାସୀ ମାନେ ଦୌଡ଼ି ଦୌଡ଼ି ନୟାନ୍ତ ହୋଇପଡିଛନ୍ତି । ତେବେ ପରିଶେଷରେ କୌଣସି ବିକଳ୍ପ ନପାଇ ଧାରଣାରେ ବସିବା ପାଇଁ ମନସ୍ଥ କରିଥିଲେ । ଯାହାର ଫଳ ସ୍ବରୂପ ଆଜି ବେଗୁନିପାଳ ଗ୍ରାମବାସୀ ଢେଙ୍କାନାଳ ତହସିଲ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ । ଗ୍ରାମବାସୀ ମାନେ ତହସିଲଦାରଙ୍କ କୋଠରୀ ସମ୍ମୁଖରେ ତଳେ ବସି କାର୍ଯ୍ୟଳୟ ଘେରାଉ କରିଥିଲେ । ଧାରଣାରେ ବସିଥିବା ଲୋକଙ୍କ ହନୁମାନ ଚାଳିଶା ଓ ଜୟ ଶ୍ରୀରାମ ଧ୍ୱନିରେ ପ୍ରକମ୍ପିତ ହୋଇ ଉଠିଥିଲା କାର୍ଯ୍ୟାଳୟ । ଫଳରେ ତହସିଲ କାର୍ଯ୍ୟାଳୟରେ ଅଚଳାବସ୍ଥା ସୃଷ୍ଟି ହୋଇଥିଲା । ଗ୍ରାମବାସୀ ମାନେ ସମସ୍ତେ ପୀତବସ୍ତ୍ର ପରିଧାନ କରି ଏହି ଆନ୍ଦୋଳନରେ ସାମିଲ ହୋଇଥିବା ଦେଖିବାକୁ ମିଳିଥିଲା । ଖବର ପାଇ ଟାଉନ ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ସହିତ ତହସିଲ ତୁରନ୍ତ ଗ୍ରାମବାସୀଙ୍କ ଦାବି ମୁତାବକ ଜାଗeର ନମ୍ବର ସଂଶୋଧନ କରିବାକୁ ପ୍ରତିଶୃତି ଦେବାରୁ ଗ୍ରାମବାସୀ ଆନ୍ଦୋଳନରୁ ହଟିଥିଲେ।
ଇଟିଭି ଭାରତ, ଢେଙ୍କାନାଳ
