ସୁବର୍ଣ୍ଣପୁର: ଘରୋଇ ଓଡ଼ିଆ ମିଡିୟମ ସ୍କୁଲ ପିଲାଙ୍କୁ ମାଗଣା ବହି ଦେବାର ନିୟମ ରହିଛି । ହେଲେ ସୁବର୍ଣ୍ଣପୁରରେ ଛାତ୍ରଛାତ୍ରୀଙ୍କୁ ମାଗଣା ବହି ମିଳୁନଥିବାରୁ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ଆଜି ସୁବର୍ଣ୍ଣପୁର ଜିଲ୍ଲାର ଘରୋଇ ବିଦ୍ୟାଳୟ ସମୂହର ପରିଚାଳନା ପରିଷଦ କାର୍ଯ୍ୟକର୍ତ୍ତା ନୀରବ ଆନ୍ଦୋଳନକୁ ଓହ୍ଲାଇଛନ୍ତି । ଚଳିତ ଶିକ୍ଷା ବର୍ଷ 2024-25 ପାଇଁ ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ନିଷ୍ପତ୍ତି ଅନୁଯାୟୀ ସରକାରୀ ଓ ଘରୋଇ ବିଦ୍ୟାଳୟ ଗୁଡିକୁ ପୁସ୍ତକ ଯୋଗାଇ ଦିଆଯାଇଛି । ହେଲେ ଜିଲ୍ଲାରେ ଘରୋଇ ବିଦ୍ୟାଳୟ ଗୁଡିକ ପୁସ୍ତକ ପାଇବାରୁ ବଞ୍ଚିତ ହୋଇଥିବା ଅଭିଯୋଗ କରିଛନ୍ତି ।
ସୂଚନା ମୁତାବକ, ଚଳିତ ଶିକ୍ଷାବର୍ଷର ପ୍ରାୟ ତିନିମାସ ବିତି ଗଳାଣି । ହେଲେ ଏପର୍ଯ୍ୟନ୍ତ ଘରୋଇ ବିଦ୍ୟାଳୟ ଗୁଡିକର ଛାତ୍ରଛାତ୍ରୀ ମାନେ ଉଦ୍ଦିଷ୍ଟ ଓ ଆବଶ୍ୟକ ମାଗଣା ବହି ପାଇ ନାହାନ୍ତି । ତେବେ ବିଦ୍ୟାଳୟ ଗୁଡିକରେ ପାଠପଢା ଆରମ୍ଭ ହୋଇ ଯାଇଥିବା ବେଳେ ତୁରନ୍ତ ବହି ଯୋଗାଇ ଦେବା ପାଇଁ ଦାବି କରିଛନ୍ତି ସୁବର୍ଣ୍ଣପୁର ଜିଲ୍ଲାର ଘରୋଇ ବିଦ୍ୟାଳୟ ସମୂହର ପରିଚାଳନା ପରିଷଦ କାର୍ଯ୍ୟକର୍ତ୍ତା ମାନେ । ତେବେ ସୁବର୍ଣ୍ଣପୁର ଜିଲ୍ଲାକୁ ନିଅଣ୍ଟିଆ ବହି ଯୋଗାଣ ହୋଇ ଥିବାରୁ ଘରୋଇ ବିଦ୍ୟାଳୟ ଗୁଡିକୁ ବହି ଯୋଗାଇ ଦିଆଯାଇ ପାରିନାହିଁ । ସେହିପରି ଗତ ଶିକ୍ଷା ବର୍ଷ 2023-24ରେ ଘରୋଇ ବିଦ୍ୟାଳୟ ଗୁଡିକ ଶିକ୍ଷା ଅଧିକାର ଆଇନ ପରିଧିରେ ବିଦ୍ୟାଳୟର 25 ପ୍ରତିଶତ ଛାତ୍ରଛାତ୍ରୀଙ୍କୁ ପାଠ ପଢାଇଛନ୍ତି ।
ସରକାରଙ୍କର ଶିକ୍ଷା ଅଧିକାର ଆଇନ ଅଧିନରେ ଘରୋଇ ବିଦ୍ୟାଳୟରେ ପାଠ ପଢୁଥିବା ଛାତ୍ରଛାତ୍ରୀଙ୍କ ନିମିତ୍ତ ଟିଉସନ ଫି ପ୍ରଦାନ କରିଛନ୍ତି । ଯାହା ଆଜି ପର୍ଯ୍ୟନ୍ତ ଘରୋଇ ବିଦ୍ୟାଳୟ ଗୁଡିକୁ ମିଳି ନ ଥିବା ମଧ୍ୟ ଅଭିଯୋଗ ହୋଇଛି । ତେବେ ତୁରନ୍ତ ଟିଉସନ ଫି ପ୍ରଦାନ କରାଗଲେ ଘରୋଇ ବିଦ୍ୟାଳୟ ଗୁଡିକର ଆର୍ଥିକ ସମସ୍ୟା କିଛି ମାତ୍ରାରେ ଦୂରୀକରଣ ହେବ ବୋଲି ଦାବି କରିଛନ୍ତି ଘରୋଇ ବିଦ୍ୟାଳୟ ସମୂହର ପରିଚାଳନା ପରିଷଦ କାର୍ଯ୍ୟକର୍ତ୍ତା । ତେବେ ଜିଲ୍ଲା ଶିକ୍ଷା ଅଧିକାରୀ ତୁରନ୍ତ ଏ ଦିଗରେ ଆବଶ୍ୟକ ପଦକ୍ଷେପ ନେବା ପାଇଁ ଦାବି କରିଛନ୍ତି । ଅପରପକ୍ଷରେ ଜିଲ୍ଲା ଶିକ୍ଷା ଅଧିକାରୀ ତୁରନ୍ତ ଘରୋଇ ବିଦ୍ୟାଳୟ ଗୁଡିକର ଦାବି ପ୍ରତି ଧ୍ୟାନ ଦେଇ ସମସ୍ୟାର ସମାଧାନ କରିବେ ବୋଲି ଘରୋଇ ବିଦ୍ୟାଳୟ ପରିଚାଳନା ପରିଷଦ କାର୍ଯ୍ୟକର୍ତ୍ତାଙ୍କୁ ପ୍ରତିଶୃତି ଦେଇଛନ୍ତି ।
ଇଟିଭି ଭାରତ, ସୁବର୍ଣ୍ଣପୁର
