ଭୁବନେଶ୍ବର: ରାଜ୍ୟର ବିଭିନ୍ନ ମାର୍କେଟରେ ହଠାତ ଆଳୁ ଗାଏବ ହୋଇଯାଇଛି । ତେଣୁ ଏବେ ଆଳୁଦର ରାଜ୍ୟରେ ଅଣାୟତ୍ତ ହୋଇପଡ଼ିଛି । ଯାହାକୁ ନେଇ ଖାଉଟି ମହଲରେ ଅସନ୍ତୋଷ ବଢିବାରେ ଲାଗିଛି । ରାଜ୍ୟରେ ଆଳୁ ଦରବୃଦ୍ଧି ଓ ଅଭାବ ପ୍ରସଙ୍ଗରେ ହସ୍ତକ୍ଷେପ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ହସ୍ତକ୍ଷେପ କରି ଆଳୁ ଯୋଗାଣ ସ୍ବାଭାବିକ ପାଇଁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖିଛନ୍ତି ନବୀନ । ସେପଟେ ନବୀନଙ୍କ ଚିଠିକୁ ନେଇ ବିଭାଗୀୟ ମନ୍ତ୍ରୀ କହିଲେ ଶସ୍ତା ରାଜନୀତି ବନ୍ଦ କର । ଚିଠି ଲେଖିଲେ ସମସ୍ୟାର ସମାଧାନ ହୁଏ ନାହିଁ । ତୁମେ କଣ ଅଛ ଯେ ଚିଠି ଲେଖୁଛ ?
ରାଜ୍ୟରେ ଅତ୍ୟାବଶ୍ୟକ ସାମଗ୍ରୀ ଆଳୁକୁ ନେଇ ହାହାକାର ପଡିଛି । ଏହି ନିତିଦିନିଆ ପରିବାକୁ ନେଇ ହନ୍ତସନ୍ତ ରାଜ୍ୟବାସୀ । ରାଜ୍ୟର ବିଭିନ୍ନ ମାର୍କେଟରେ ଆଳୁ ଉଭାନ ହୋଇଯାଇଥିବା ଦେଖିବାକୁ ମିଳିଛି । ଆଉ ଯେଉଁଠି ଅଛି କେଜି 70 ଟଙ୍କାରେ ବିକ୍ରି ହେଉଛି । ଆଗାମୀ ଦିନରେ ଏହା ଆହୁରି ବଢିବ ବୋଲି ଆଶଙ୍କା ପ୍ରକାଶ ପାଇଛି । ଯାହାକୁ ନେଇ ଖାଉଟି ମହଲରେ ଚିନ୍ତା ବଢ଼ିଛି । ଏଭଳି ପରିସ୍ଥିତିରେ ପଶ୍ଚିମବଙ୍ଗରୁ ଆଳୁ ଆସିଲର ବଜାର ସ୍ଥିତି ସୁଧୁରିବ ବୋଲି ଆଶା କରାଯାଉଥିଲା । କିନ୍ତୁ ପଶ୍ଚିମବଙ୍ଗ ସରକାର ଆଳୁ ଟ୍ରକକୁ ଓଡ଼ିଶା ସୀମାରୁ ଫେରାଇ ନେଇଥିବା ଜଣାପଡିଛି । ସୋନାକଣିଆ ଚେକ ପୋଷ୍ଟ ନିକଟରୁ ଆଳୁ ଟ୍ରକଗୁଡିକୁ ଫେରାଇ ନେଇଥିବା ଜଣାପଡିଛି ।
ପଶ୍ଚିମବଙ୍ଗ ସରକାର ଆଳୁ ଟ୍ରକ ଫେରାଇ ନେବା ଖବର ପ୍ରକାଶ ପାଇବା ପରେ ବିରୋଧୀ ଦଳ ନେତା ନବୀନ ପଟ୍ଟନାୟକ ଏଥିରେ ହସ୍ତକ୍ଷେପ କରିଛନ୍ତି । ବିରୋଧୀ ଦଳ ନେତା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖିଛନ୍ତି । ଘଟଣାରେ ହସ୍ତକ୍ଷେପ କରି ଓଡ଼ିଶାକୁ ଆଳୁ ଯୋଗାଇଣ ସ୍ବାଭାବିକ ପାଇଁ ସେ ଅନୁରୋଧ କରିଛନ୍ତି । ନବୀନ ଚିଠିରେ ଲେଖିଛନ୍ତି, "ଓଡ଼ିଶାରେ ଆଳୁ ଏକ ଅତ୍ୟାବଶ୍ୟକ ସାମଗ୍ରୀ । ଲଗାଣ ବର୍ଷା ଯୋଗୁଁ ଉତ୍ପାଦନ କମ ସହ ଚାହିଦା ଅଧିକ ହୋଇଥିବାରୁ ଏହାର ଅଭାବରୁ କୃତ୍ରିମ ଦର ବଢ଼ିଛି । ଓଡ଼ିଶା ସୀମାନ୍ତରେ ଆଳୁ ଟ୍ରକଗୁଡିକ ଅଟକ ରଖାଯାଇଛି । ଓଡ଼ିଶାରେ ପ୍ରବେଶ କରିବାକୁ ଦିଆଯାଉନାହିଁ ବୋଲି ମୁଁ ଗଣମାଧ୍ୟମରୁ ଜାଣିବାକୁ ପାଇଛି । ଏଣୁ ଆପଣ ଆଳୁ ଯୋଗାଣ ସ୍ବାଭାବିକ ପାଇଁ ହସ୍ତକ୍ଷେପ କରନ୍ତୁ । ଫଳରେ ଓଡ଼ିଶାବାସୀ ଉପକୃତ ହେବେ । ଅତୀତରେ ଆପଣଙ୍କ ମହତ କାର୍ଯ୍ୟ ଆମ ରାଜ୍ୟକୁ ଉପକୃତ କରିଛି ।"
ନବୀନ ଆହୁରି ମଧ୍ୟ କହିଛନ୍ତି ଯେ, ଓଡ଼ିଶା ଓ ପଶ୍ଚିମବଙ୍ଗ ମଧ୍ୟରେ ସାଂସ୍କୃତିକ ସାମଞ୍ଜସ୍ୟ ରହିଛି । ଉଭୟ ରାଜ୍ୟର ଲୋକେ ଜଗନ୍ନାଥଙ୍କ ଭକ୍ତ । ଏଣୁ ଆଳୁ ଯୋଗାଣ ସ୍ବାଭାବିକ କରିବା ପାଇଁ ହସ୍ତକ୍ଷେପ କରିବାକୁ ସେ ମମତାଙ୍କୁ ଅନୁରୋଧ କରିଛନ୍ତି । ପଶ୍ଚିମବଙ୍ଗରେ ଶୀତଳଭଣ୍ଡାର ମାଲିକଙ୍କ ଧର୍ମଘଟ ପାଇଁ ଓଡ଼ିଶାରେ ଆଳୁ ସଙ୍କଟ ଦେଖା ଦେଇଛି । ରାଜ୍ୟ ଯୋଗାଣ ମନ୍ତ୍ରୀ ଆଜି ଆଳୁ ଗୋଦାମରେ ପହଞ୍ଚି ସ୍ଥିତି ପରଖିଛନ୍ତି । ରାଜ୍ୟରେ ଆଗାମୀ 7 ଦିନ ଯାଏଁ ଆଳୁ ମହଜୁଦ ଥିବା ମନ୍ତ୍ରୀ କହିଛନ୍ତି ।
'ଆଳୁକୁ ନେଇ ଶସ୍ତା ରାଜନୀତି କରନ୍ତୁ ନାହିଁ'
ରାଜ୍ୟରେ ଆଳୁ ସମସ୍ୟା ନେଇ ପୂର୍ବତନ ମନ୍ତ୍ରୀ ନବୀନ ପଟ୍ଟନାୟକ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖିବା ପରେ ଏହାର ଜବାବ ରଖିଛନ୍ତି ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ସେ କହିଛନ୍ତି, "ଚିଠି ଲେଖି ଶସ୍ତା ରାଜନୀତି କରନ୍ତୁ ନାହିଁ । 24 ବର୍ଷ ହେଲା ଶୀତଳ ଭଣ୍ଡାର କଲେ ନାହିଁ । ଆଳୁ ମିଶନ, ପିଆଜ ମିଶନ ଫେଲ୍ । ସବୁଥିରେ ଫେଲ୍ ପାଇଁ ଲୋକ ବି ଏଥର ତାଙ୍କୁ ଫେଲ୍ କରିଦେଲେ । ଚିଠି ଲେଖିଲେ ସମସ୍ୟାର ସମାଧାନ ହୁଏ ନାହିଁ । ତୁମେ କଣ ଅଛ ଯେ ଚିଠି ଲେଖୁଛ ?"
ପଶ୍ଚିମବଙ୍ଗ ସରକାର ସହ କଥା ହେଲେ ଯୋଗାଣ ମନ୍ତ୍ରୀ:-
ସେପଟେ ଆଳୁର ଅଭାବକୁ ଦେଖି ଅପରାହ୍ନ ୩ଟାରେ ଜରୁରୀକାଳୀନ ବୈଠକ କରିବା ପରେ ମନ୍ତ୍ରୀ କହିଛନ୍ତି, "ପଶ୍ଚିମବଙ୍ଗ ଅଧିକାରୀଙ୍କ ସହ କଥା ହୋଇଛନ୍ତି ଓଡ଼ିଶା ସରକାର । ପଶ୍ଚିମବଙ୍ଗରେ 21ରେ ଚାଷୀ ଆନ୍ଦୋଳନ ଆରମ୍ଭ ହୋଇଥିଲା, 24ରେ ସରିଯାଇଛି । ଦିନେ ଦୁଇ ଦିନ ଭିତରେ ଆଳୁ ଗାଡ଼ି ଆସିବା ଆରମ୍ଭ ହୋଇଯିବ । ଦୁଇ ଦିନ ଭିତରେ ସମସ୍ୟାର ସମାଧାନ ହେବ । ରାଜ୍ୟର ଚାହିଦା ଅନୁସାରେ 7 ଦିନର ଆଳୁ ମହଜୁଦ ଅଛି । ଯେଉଁ ବ୍ୟବସାୟୀ 40 ଟଙ୍କାରେ ଆଳୁ କିଣୁଛନ୍ତି, ଚିଠା ଦେଖନ୍ତୁ । 32 ଟଙ୍କାରୁ ଅଧିକରେ ଆଳୁ ବିକିଲେ ନିଆଯିବ ଆକ୍ସନ୍ ।"
ଇଟିଭି ଭାରତ, ଭୁବନେଶ୍ବର
