ଭୁବନେଶ୍ୱର: ପୁଣି ଓଡ଼ିଶା ଫେରିବ ଦକ୍ଷିଣ କୋରିଆର ଇସ୍ପାତ କମ୍ପାନୀ ପୋସ୍କୋ । ପୋସ୍କୋ ଆସନ୍ତା ଦିନରେ ଜେଏସଡବ୍ଲୁ ସହ ମିଶି ଓଡ଼ିଶାରେ ପ୍ରକଳ୍ପ କରିବ । ଏମିତି କିଛି ଚର୍ଚ୍ଚା ଜାତୀୟ ଓ ଅନ୍ତର୍ଜାତୀୟ ଗଣମାଧ୍ୟମରେ ଆରମ୍ଭ ହୋଇଛି । ନିକଟରେ ଜେଏସଡବ୍ଲୁ ଓ ପୋସ୍କୋ ମଧ୍ୟରେ ହୋଇଥିବା ଏମଓୟୁ ଏହି ଚର୍ଚ୍ଚାକୁ ଖୋରାକ ଯୋଗାଇଛି । ଶିଳ୍ପ ସଂସ୍ଥାକୁ ସମସ୍ତ ସହଯୋଗ ଯୋଗାଇବାକୁ ଓଡିଶା ସରକାର ପ୍ରସ୍ତୁତ ଅଛନ୍ତି । ଜେଏସଡବ୍ଲୁ ହେଉକି ପୋସ୍କୋ ଅବା ଜେଏସଡବ୍ଲୁ-ପୋସ୍କୋ ଜଏଣ୍ଟ ଭେଞ୍ଚର ଅଥବା ଅନ୍ୟ ଅନ୍ତଃରାଷ୍ଟ୍ରୀୟ କମ୍ପାନୀ ଓଡ଼ିଶାରେ ନିବେଶ କଲେ ଆମେ ସମସ୍ତଙ୍କୁ ସ୍ଵାଗତ କରିବୁ । ଏହା କହିଛନ୍ତି ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ ।
ପୁଞ୍ଜିନିବେଶ ପାଇଁ JSWର ଘୋଷଣା:
ମୁମ୍ବାଇରେ ଜେଏସଡବ୍ଲୁ ଅଧ୍ୟକ୍ଷ ସଜନ ଜିନ୍ଦଲ ଓ ପୋସ୍କୋର ଅଧ୍ୟକ୍ଷ ଚାଙ୍ଗ-ଇନ ହ୍ଵାଙ୍କ ମଧ୍ୟରେ ଏକ ବୁଝାମଣାପତ୍ର ସ୍ବାକ୍ଷରିତ ହୋଇଛି । ଏକ ପାଞ୍ଚ ନିୟୁତ ଟନ ଉତ୍ପାଦନ କ୍ଷମତା ବିଶିଷ୍ଟ କାରଖାନା ସ୍ଥାପନ କରିବା ଲାଗି ଉଭୟ ସଂସ୍ଥା ମିଳିତ ଭାବେ କାର୍ଯ୍ୟ କରିବେ ବୋଲି ଚୁକ୍ତି ହୋଇଛି । ଜେଏସଡବ୍ଲୁ ଓ ପୋସ୍କୋ ମଧ୍ୟରେ ଦୁଇଟି ପ୍ରସଙ୍ଗକୁ ନେଇ ଚୁକ୍ତି ହୋଇଛି । ଗୋଟିଏ ନୂଆ ଇସ୍ପାତ କାରଖାନା ସମ୍ପର୍କିତ ହୋଇଥିବାବେଳେ ଅନ୍ୟଟି ଇଲେକ୍ଟ୍ରିକ ଯାନ ଓ ବ୍ୟାଟେରୀ ପ୍ରସ୍ତୁତ ସମ୍ପର୍କିତ ରହିଛି । ପୂର୍ବରୁ ଜଗତସିଂହପୁର ଓ କଟକରେ ଏ ସମ୍ପର୍କିତ ଦୁଇଟି କ୍ଷେତ୍ରରେ ପୁଞ୍ଜିନିବେଶ କରିବାକୁ ଜେଏସଡବ୍ଲୁ ଗ୍ରୁପ ଘୋଷଣା କରିଛି । ତେଣୁ ଏହି ବୁଝାମଣା ଓଡ଼ିଶା ପ୍ରକଳ୍ପ ଲାଗି ହୋଇଥାଇପାରେ ବୋଲି ଚର୍ଚ୍ଚା ହେଉଛି ।
2005ରେ ହୋଇଥିଲା MoU:
ଓଡ଼ିଶାରେ ଏକ ବିଶାଳ ଇସ୍ପାତ କାରଖାନା ସ୍ଥାପନ କରିବା ଲାଗି 2005 ଜୁନ ମାସରେ ପୋସ୍କୋ ସହ ଏମଓୟୁ କରିଥିଲେ ବିଜେଡି ସରକାର । ଓଡ଼ିଶା ଇତିହାସର ସର୍ବାଧିକ ବିଦେଶୀ ପୁଞ୍ଜି ନିବେଶକ ଲାଗି ଯୋଜନା କରିଥିଲେ ସରକାର । ଜଗତସିଂହପୁର ଜିଲ୍ଲାରେ 52 ହଜାର କୋଟି ଟଙ୍କା ନିବେଶ କରିବାକୁ ଚୁକ୍ତି ହୋଇଥିଲା । କାରଖାନା ସ୍ଥାପନ କରିବା ଲାଗି କମ୍ପାନୀ 4000 ଏକର ଜମି ମାଗିଥିଲା । ଇଡକୋ ଜରିଆରେ ଜମି ସଂଗ୍ରହ ପ୍ରକ୍ରିୟା ଆରମ୍ଭ କରିଥିଲେ ଓଡ଼ିଶା ସରକାର । ଅଧିକାଂଶ ଜଙ୍ଗଲ ଜମି ବର୍ଗର ଥିଲା । ଉକ୍ତ ଜଙ୍ଗଲ ଜମିରେ ପାନବରଜ କରି ପେଟ ପୋଷୁଥିଲେ ସ୍ଥାନୀୟ ଲୋକ ।
2005ରେ ସ୍ୱାକ୍ଷରିତ ଏମଓୟୁ 2011 ଜୁନରେ ଶେଷ ଶେଷ ହୋଇଥିଲା । କିନ୍ତୁ ଜମି ଅଧିଗ୍ରହଣକୁ ନେଇ ସ୍ଥାନୀୟ ଅଞ୍ଚଳରେ ପ୍ରବଳ ବିରୋଧର ସମ୍ମୁଖୀନ ହୋଇଥିଲେ ସରକାର ଓ କମ୍ପାନୀ । ରାଜ୍ୟ ସରକାର ବହୁ ପ୍ରଚେଷ୍ଟାରେ ପ୍ରାୟ 2 ହାଜରରୁ ଅଧିକ ଏକର ଜମି ଅଧିଗ୍ରହଣ କରି ଯୋଗାଇଥିଲେ । ସମ୍ପୂର୍ଣ୍ଣ ଜମି ନମିଳିବାରୁ 2012 ଏପ୍ରିଲ ପର୍ଯ୍ୟନ୍ତ କମ୍ପାନୀ ତାହାର ନବୀକରଣ କରିନଥିଲା । ସେହିପରି ରାଜ୍ୟର ଖଣ୍ଡାଧାର ଖଣି ପାଇବା ଲାଗି ପୋସ୍କୋର ଦାବି ଥିଲା । ଜମି ମିଳିବାରେ ସମସ୍ୟା ସହ ଖଣି ନମିଳିବାରୁ ବାଧ୍ୟ ହୋଇ 2017 ମାର୍ଚ୍ଚରେ ଏହି ପ୍ରକଳ୍ପରୁ ଓହରି ଯାଇଥିଲା ପୋସ୍କୋ । ବିଶାଳ ଇସ୍ପାତ କାରଖାନା ସ୍ଥାପନ କରିବାରେ ବିଫଳ ହୋଇ ରାଜ୍ୟ ଛାଡ଼ିଥିବା ପୋସ୍କୋ ପୁଣି ଥରେ ଫେରିବା ଆଶା ଉଜ୍ଜୀବିତ ହୋଇଛି । ପୋସ୍କୋ ଯେଉଁ ସ୍ଥାନରେ ଇସ୍ପାତ କାରଖାନା ବସାଇବାକୁ ଉଦ୍ୟମ କରି ବିଫଳ ହୋଇଥିଲା, ସେହି ଜମିରେ ଜେଏସଡବ୍ଲୁକୁ ଦିଆଯାଇଛି । ଚଳିତବର୍ଷ ଫେବୃଆରୀରେ ଜେଏସଡବ୍ଲୁ ଇସ୍ପାତ ପ୍ରକଳ୍ପ ଲାଗି ଶିଳାନ୍ୟାସ କରିଥିଲା । ଏହି ପ୍ରକଳ୍ପରେ 65 ହଜାର କୋଟି ଟଙ୍କା ନିବେଶ କରିବାକୁ ଯୋଜନା ରହିଛି । ପ୍ରକଳ୍ପ କାର୍ଯ୍ୟକାରୀ ହେଲେ 30 ହଜାର ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ଆକଳନ କରାଯାଇଛି । ସେହିପରି କଟକ ଓ ପାରାଦ୍ୱୀପରେ 40 ହଜାର କୋଟି ଟଙ୍କା ନିବେଶରେ ଏକ ସମନ୍ୱିତ ଇଲେକ୍ଟ୍ରିକ ଯାନ ଓ ବ୍ୟାଟେରୀ ଉତ୍ପାଦନ କାରଖାନା ସ୍ଥାପନ କରିବାକୁ କମ୍ପାନୀ ଘୋଷଣା କରିଛି ।
ଜଗତସିଂହପୁର ଜିଲ୍ଲାରୁ ପୋସ୍କୋ ଫେରିଯିବା ପରେ 2013 ରେ ପ୍ରସ୍ତାବିତ ଅଞ୍ଚଳ ଶାନ୍ତ ପଡିଥିଲା । କିନ୍ତୁ ଜେଏସଡବ୍ଲୁ ପ୍ରକଳ୍ପ ଘୋଷଣା ପରେ ବିପକ୍ଷବାଦୀଙ୍କ ମେଳି ବଢିଥିଲା । ଏରସମା ଓ କୁଜଙ୍ଗ ବ୍ଲକର 3ଟି ପଞ୍ଚାୟତ ଢିଙ୍କିଆ, ଗଡ କୁଜଙ୍ଗ ଓ ନୂଆଗାଁରେ ବିପକ୍ଷବାଦୀ ଜିନ୍ଦଲ ପ୍ରତିରୋଧ ସଂଗ୍ରାମ ସମିତି ଗଠନ କରି ସଭା ଆୟୋଜନ କରିଛନ୍ତି । ପୋସ୍କୋ ପାଇଁ ଅଧିଗ୍ରହଣ ହୋଇଥିବା 2958 ଏକର ଜମିକୁ ଓଡିଶା ସରକାର ଜିନ୍ଦଲକୁ ହସ୍ତାନ୍ତର କରିଛନ୍ତି । ପୋସ୍କୋ ଓଡ଼ିଶା ଫେରିବା ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ । ମନ୍ତ୍ରୀ କହିଛନ୍ତି, "ଜେଏସଡବ୍ଲୁ ହେଉ କି ପୋସ୍କୋ, ଅବା ଜେଏସଡବ୍ଲୁ-ପୋସ୍କୋ ଜଏଣ୍ଟ ଭେଞ୍ଚର ଅଥବା ଅନ୍ୟ ଅନ୍ତଃରାଷ୍ଟ୍ରୀୟ କମ୍ପାନୀ, ଓଡ଼ିଶାରେ ନିବେଶ ପାଇଁ ଆମେ ସମସ୍ତଙ୍କୁ ସ୍ଵାଗତ କରିବୁ । ଶିଳ୍ପ ସଂସ୍ଥାକୁ ସମସ୍ତ ସହଯୋଗ ଯୋଗାଇବାକୁ ସରକାର ପ୍ରସ୍ତୁତ । ଓଡ଼ିଶାରେ ସରକାର ପରିବର୍ତ୍ତନ ପରେ ବହୁ ଶିଳ୍ପ ଓଡ଼ିଶାରେ ନିବେଶ ପାଇଁ ମନ ବଳାଇଛନ୍ତି । ରାଜ୍ୟରେ ପର୍ଯ୍ୟାପ୍ତ ସୁଯୋଗ ରହିଛି । ନୂଆ ସରକାରରେ ଶିଳ୍ପ ଭିତ୍ତିଭୂମି ସୁଦୃଢ଼ କରାଯାଉଛି । ମୋହନ ସରକାର ଶିଳ୍ପ ଅନୁକୂଳ ପରିବେଶ ସୃଷ୍ଟି କରୁଛନ୍ତି । ପୂର୍ବରୁ ଶିଳ୍ପ ଫେରିଯିବାର ବହୁତ କାରଣ ଅଛି ।"
ଏହା ବି ପଢନ୍ତୁ...Dhinkia Against JSW Project: ଗିରଫ 2 ଜଣଙ୍କୁ ଛାଡିଲା ପୋଲିସ, ଢିଙ୍କିଆରେ ପ୍ରତିବାଦ ସଭା
ଏହାମଧ୍ୟ ପଢନ୍ତୁ: ରଣକ୍ଷେତ୍ର ପାଲଟିଲା ଢ଼ିଙ୍କିଆ, ପୋଲିସ-ଗ୍ରାମବାସୀ ମୁହାଁମୁହିଁ
ମନ୍ତ୍ରୀ ଆହୁରି ମଧ୍ୟ କହିଛନ୍ତି, "ଲୋକଙ୍କ ବିଶ୍ୱାସ ଜିତି କାମ କରିବାର ଆବଶ୍ୟକତା ଅଛି । ଯେଉଁ ଶିଳ୍ପ ଲୋକଙ୍କ ବିଶ୍ୱାସ ଜିତି ପାରୁନଥିଲା, ସେ ଫେରି ଯାଉଥିଲା । ସରକାର ବଦଳିବା ପରେ ଶିଳ୍ପ ସଂସ୍ଥାଙ୍କ ମଧ୍ୟରେ ଉତ୍ସାହ ଆସିଛି । ଆମେ ବି ସେମାନଙ୍କୁ ଓଡ଼ିଶାରେ ନିବେଶ ପାଇଁ ଆକୃଷ୍ଟ କରୁଛୁ । ମୁଖ୍ୟମନ୍ତ୍ରୀ ସିଧାସଳଖ ଶିଳ୍ପ ସଂସ୍ଥା ସହ ଆଲୋଚନା କରୁଛନ୍ତି । ଓଡ଼ିଶାରେ ନିବେଶ ପାଇଁ ଜେଏସଡବ୍ଲୁ ଆଗ୍ରହ ଦେଖାଇଛି । ଜଏଣ୍ଟ ଭେଞ୍ଚର କଥା ସେମାନଙ୍କର ଆଭ୍ୟନ୍ତରୀଣ ବ୍ୟାପାର । ଯେତେବେଳେ ସ୍ପଷ୍ଟ ହେବ, ତାହା ଜଣାପଡ଼ିବ । ଜଗତସିଂହପୁରରେ ଜେଏସଡବ୍ଲୁ ଯେଉଁ ପ୍ରକଳ୍ପ କରୁଛି, ତାହା ଜେଏସଡବ୍ଲୁ ଉତ୍କଳ । ତାହା ଜେଏସଡବ୍ଲୁର ନିଜସ୍ଵ ପ୍ରକଳ୍ପ ଅଟେ । ସେଥିରେ ପୋସ୍କୋର କୌଣସି ସଂଯୋଗ ନାହିଁ ।"
ଇଟିଭି ଭାରତ, ଭୁବନେଶ୍ୱର
