କଟକ: ସଦର ଥାନା ଅଞ୍ଚଳରେ ଘଟିଥିବା ଲୁଟ ଘଟଣାକୁ ୭୨ ଘଣ୍ଟା ବିତିଥିଲେ ବି ଏଯାଏଁ ଅଭିଯୁକ୍ତଙ୍କ ଟେର ପାଇନାହିଁ କଟକ ସଦର ଥାନା ପୋଲିସ । କିଏ ମହିଳାଙ୍କୁ ମାରଣାସ୍ତ୍ର ଦେଖାଇ ଲୁଟ କଲା ? କେମିତି ଲୁଟେରା ଜଣକ ଜାଣିଥିଲା କି ମହିଳା ଜଣକ ସୁନା ଚେନ ପିନ୍ଧନ୍ତି ବୋଲି ? ଏଭଳି ଲୁଟ କରିବାକୁ ସେ ପୂର୍ବରୁ ରଚିଥିଲା କି ଯୋଜନା ? କେତେ ଜଣ ବ୍ୟକ୍ତି ଏହି ଲୁଟରେ ସାମିଲ ଅଛନ୍ତି ? ଏହାର ମାଷ୍ଟର ମାଇଣ୍ଡ କିଏ ? ପ୍ରଫେସନାଲ ଲୁଟେରା ନାଁ ସ୍ଥାନୀୟ ଲୋକଙ୍କ ଯୋଜନା ? ଏଭଳି ଅନେକ ପ୍ରଶ୍ନ ଏବେ ଉଙ୍କି ମାରିଥିବା ବେଳେ ପୋଲିସ ଅଭିଯୁକ୍ତମାନଙ୍କ ଟେର ନ ପାଇବା ପୋଲିସ ପାଇଁ ଏକ ଚାଲେଞ୍ଜ ସୃଷ୍ଟି କରିଛି ।
ଏନେଇ କଟକ ଅତିରିକ୍ତ ଡିସିପି ଅନୀଲ ମିଶ୍ର କହିଛନ୍ତି, "ଅଭିଯୁକ୍ତଙ୍କୁ ଗିରଫ କରିବା ପାଇଁ ପୋଲିସ ଲାଗି ପଡିଛି । ସଦର ଥାନା ପୋଲିସ ସହ ସ୍ପେଶାଲ ସ୍କ୍ୱାର୍ଡ ମଧ୍ୟ ଦିନ ରାତି ଏକ କରି ଦେଇଛନ୍ତି । ଏଭଳି ଲୁଟରେ ସ୍ଥାନୀୟ ଲୋକଙ୍କ ହାତ ଥାଇପାରେ ବୋଲି ସନ୍ଦେହ କରାଯାଉଛି । ଏହାକୁ ମଧ୍ୟ ପୋଲିସ ଗୁରୁତ୍ୱର ସହ ନେଇ ତଦନ୍ତ କରୁଛି । ସେହିପରି ଲୁଟେରାମାନଙ୍କ ଗତିବିଧି ଉପରେ ପୋଲିସ ନଜର ରଖିଛି । ବିଶେଷ କରି ଜେଲରୁ ଫେରନ୍ତା ଅପରାଧିମାନଙ୍କ ଉପରେ ମଧ୍ୟ କଡା ନଜର ରଖିଛି ପୋଲିସ । ଖୁବଶୀଘ୍ର ଅଭିଯୁକ୍ତମାନଙ୍କୁ ଗିରଫ କରାଯିବ ।"
ଏହା ମଧ୍ୟ ପଢ଼ନ୍ତୁ...ମର୍ଣ୍ଣିଂ ୱାର୍କରୁ ଫେରୁଥିବା ବେଳେ ଲୁଟ, ସୁନା ଚେନ ଝାମ୍ପି ନେଲେ ଲୁଟେରା - Loot From Woman
