ବୌଦ୍ଧ: ଜିଲ୍ଲାର ବିଭିନ୍ନ ପଞ୍ଚାୟତରେ ସରକାରଙ୍କ ବିକାଶମୂଳକ ଯୋଜନା ବାଟ ହୁଡିଥିବା ଅଭିଯୋଗ ହୋଇଛି । ପ୍ରଶାସନିକ ତଥା ରାଜନୈତିକ ଉଦାସୀନତା ଯୋଗୁଁ ଦୀର୍ଘ ବର୍ଷ ଧରି ବିଭିନ୍ନ ସମସ୍ୟା ମଧ୍ୟରେ ଗତିକରୁଥିବା ବୀର ନରସିଂହପୁର ପଞ୍ଚାୟତ ଓ ସାମ୍ପୋଚ ପଞ୍ଚାୟତବାସୀ ସମସ୍ୟାର ସମାଧାନ ନେଇ ବାରମ୍ବାର ଦାବି କରୁଆସୁଛନ୍ତି । ତେବେ ଚଳିତ ନିର୍ବାଚନ ସୁଦ୍ଧା ସମସ୍ୟାର ସମାଧାନ ନେହେଲେ ଭୋଟ ବର୍ଜନ ନେଇ ନିଷ୍ପତ୍ତି ନେଇଛନ୍ତି ପଞ୍ଚାୟତବାସିନ୍ଦା ।
ବୌଦ୍ଧ ଜିଲ୍ଲାର ବିଭିନ୍ନ ପଞ୍ଚାୟତରେ ବାଟ ହୁଡିଛି ସରକାରଙ୍କ ବିକାଶମୂଳକ ଯୋଜନା । ଜିଲ୍ଲାର ଅନ୍ୟତମ ପୁରୁଣା ପଞ୍ଚାୟତ ବୀର ନରସିଂହପୁର ପଞ୍ଚାୟତ ଓ ସାମ୍ପୋଚ ପଞ୍ଚାୟତବାସୀ ଏବେବି ଅନେକ ସମସ୍ୟା ମଧ୍ୟରେ ରହିଥିବା ନେଇ ଅଭିଯୋଗ କରୁଛନ୍ତି । ମାର୍ଚ୍ଚ ମାସରେ ବି ଉଭୟ ପଞ୍ଚାୟତକୁ ସଂଯୋଗ କରୁଥିବା ରାସ୍ତା ଉପରେ ଆଣ୍ଠୁଏ ଉଚ୍ଚର ଝରଣା ପାଣି ପ୍ରବାହିତ ହେଉଥିବା ଦେଖିବାକୁ ମିଳିଛି । ଏହି ଦୁଇ ପଞ୍ଚାୟତର ଅନେକ ଅଞ୍ଚଳରେ ଗମନାଗମନର ଅବ୍ୟବସ୍ଥା ଯୋଗୁଁ ଆମ୍ବୁଲାନ୍ସ ସେବାଠୁ ନେଇ ବିଭିନ୍ନ ସମସ୍ୟା ଲାଗି ରହୁଥିବା କହିଛନ୍ତି ପଞ୍ଚାୟତବାସୀ । ସମ୍ପୋଚ ପଞ୍ଚାୟତ ଜିଲ୍ଲାର ବହୁ ପୁରୁଣା ପଞ୍ଚାୟତ ହୋଇଥିଲେ ମଧ୍ୟ ଆଜିଯାଏଁ ପଞ୍ଚାୟତ କାର୍ଯ୍ୟାଳୟକୁ ସ୍ଥାୟୀ ରାସ୍ତା ଖଣ୍ଡେ ନାହିଁ ।
ସେହିଭଳି ସାମ୍ପୋଚ ଠାରେ ପ୍ରସ୍ତାବିତ ମହାନଦୀରେ ମେଗା ଜଳସେଚନ ପ୍ରକଳ୍ପ ଚୋରି ହୋଇଯାଇଥିବା ବେଳେ ଏହି ପଞ୍ଚାୟତରେ ପାନୀୟଜଳ ସମସ୍ୟା ଯୋଗୁଁ କିଡନୀ ରୋଗ ମହାମାରୀର ରୂପ ନେଉଛି । ଏହି ସମସ୍ୟାଗୁଡିକର ସମାଧାନ ନେଇ ବାରମ୍ବାର ଗୁହାରୀ କରିବା ସତ୍ତ୍ୱେ କେହି କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି ପଞ୍ଚାୟତବାସିନ୍ଦା । କେବଳ ନିର୍ବାଚନ ଆସିଲେ ନେତାମାନେ ସମସ୍ୟାର ସମାଧାନ ନେଇ ମାଳ ମାଳ ପ୍ରତିଶୃତି ଦେଇଥାନ୍ତି । ହେଲେ ନିର୍ବାଚନ ପରେ ପ୍ରତିଶ୍ରୁତି କେବଳ କଥାରେ ସୀମିତ ରହିଯାଏ । ତେବେ ଦୀର୍ଘ ବର୍ଷ ହେବ ଏହିସବୁ ସମସ୍ୟା ମଧ୍ୟରେ ଯୁଝି ହେଉଥିବା ପଞ୍ଚାୟତବାସୀ ଚଳିତ ସାଧାରଣ ନିର୍ବାଚନ ପୂର୍ବରୁ ଏସବୁ ସମାଧାନ ନେଇ ଦାବି କରିଛନ୍ତି । ନଚେତ ଆଗାମୀ ସାଧାରଣ ନିର୍ବାଚନରେ ଭୋଟ ବର୍ଜନ କରିବାକୁ ଚେତାବନୀ ଦେଇଛନ୍ତି ।
ଇଟିଭି ଭାରତ, ବୌଦ୍ଧ
