ଓଡ଼ିଶାରେ ହାତୀଙ୍କୁ ମିଳୁନି ଜାଗା, ବଢୁଛି ହାତୀ-ମଣିଷ ଲଢ଼େଇ ଓ ମୃତ୍ୟୁ ସଂଖ୍ୟା: PCCF

ଓଡ଼ିଶାରେ ହାତୀ ମୃତ୍ୟୁ ଏବଂ ହାତୀ-ମଣିଷ ଲେଢ଼େଇ ଉପରେ ପ୍ରତିକ୍ରିୟା ରଖିଛନ୍ତି PCCF । ନଭେମ୍ବର ୧୪ରୁ ଦୁଇ ଦିନିଆ ହାତୀ ଗଣନା ନେଇ ଦେଇଛନ୍ତି ସୂଚନା ।

ଭୁବନେଶ୍ବର: ଗଜରାଜ ତୁମେ ଓଡ଼ିଶା ଛାଡ଼। ରାଜ୍ୟରେ ହାତୀଙ୍କ ପାଇଁ ନାହିଁ ଜାଗା । ହାତୀଙ୍କ ପାଇଁ ଅଭାବ ପଡୁଛି ଜଙ୍ଗଲ । ଯେତିକି ହାତୀ ରହିବା ଆବଶ୍ୟକ ତାହାଠାରୁ ଅଧିକ ହାତୀ ରହିଛନ୍ତି । ଯେଉଁଥି ପାଇଁ ଓଡ଼ିଶାରେ ଖାଦ୍ୟ ଅନ୍ୱେଷଣରେ ଜନବସତି ମୁହାଁ ହୋଇ ହାତୀ- ମଣିଷ ଲଢ଼େଇ ବଢ଼ୁଛି । ଜଙ୍ଗଲ ମଧ୍ୟରେ ଭରପୁର ଭାବେ ଖାଇବା ନାହିଁ କି ପିଇବା ପାଇଁ ପାଣି ନାହିଁ। ଯାହା ଫଳରେ କି ଖାଦ୍ୟ ଅଭାବରୁ ହାତୀଙ୍କ ରୋଗ ପ୍ରତିରୋଧକ ଶକ୍ତି ମଧ୍ୟ କମୁଛି। ଫଳରେ ହାତୀ ମୃତ୍ୟୁ ମୁହଁରେ ପଡ଼ୁଛନ୍ତି । ଚଳିତ ବର୍ଷ ବର୍ତ୍ତମାନ ସୁଦ୍ଧା ଓଡ଼ିଶାରେ ୬୦ ହାତୀଙ୍କ ମୃତ୍ୟୁ ହୋଇଥିବା ରିପୋର୍ଟ ପ୍ରକାଶ ପାଇଛି । ବିଶେଷ ଭାବେ ଅସ୍ବାଭାବିକ ଓ ବିଦ୍ୟୁତ ଆଘାତ ଦ୍ଵାରା ଅଧିକ ହାତୀ ମୃତ୍ୟୁ ବରଣ କରିଛନ୍ତି ।

'ହାତୀଙ୍କ ପାଇଁ ଜାଗା ଅଭାବ'

Principal Chief Conservator of Forests PCCF (ପିସିସିଏଫ) ସୁଶାନ୍ତ ନନ୍ଦ କହିଛନ୍ତି ଯେ 'ଓଡ଼ିଶାରେ ହାତୀଙ୍କ ପାଇଁ ଜାଗା ଅଭାବ। ଯେତିକି ହାତୀ ରହି ପାରିବା କଥା ତାହାଠୁ ରାଜ୍ୟରେ ୪୦୦ ଅଧିକ ଅଛନ୍ତି । ବେଙ୍ଗାଲୁରୁ ସ୍ଥିତ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ସାଇନ୍ସେସ ଏଲିଫ୍ୟାଣ୍ଟ ସେଣ୍ଟର ଷ୍ଟଡି ଅନୁସାରେ, ଓଡ଼ିଶା ଜଙ୍ଗଲରେ ସର୍ବାଧିକ ୧୭୦୦ ହାତୀ ରହିପାରିବେ। କିନ୍ତୁ ଏବେ ୪୦୦ ହାତୀ ଅଧିକ ଅର୍ଥାତ୍ ୨୧ ଶହ ହାତୀ ଅଛନ୍ତି । ଯେଉଁଥି ପାଇଁ ଖାଦ୍ୟ ଅନ୍ୱେଷଣ ରେ ଜନବସତି ମୁହାଁ ହେଉଛନ୍ତି ଏବଂ ହାତୀ- ମଣିଷ ଲଢ଼େଇ ବଢ଼ୁଛି । ଖାଦ୍ୟ ଅଭାବରୁ ହାତୀଙ୍କ ରୋଗ ପ୍ରତିରୋଧକ ଶକ୍ତି ବି କମୁଛି । କାରଣ ଜଙ୍ଗଲ ମଧ୍ୟରେ ଭରପୁର ଭାବେ ଖାଇବା ନାହିଁ କିମ୍ବା ପିଇବା ପାଇଁ ପାଣି ନାହିଁ । ରାଜ୍ୟରେ ଯେତିକି ମାତ୍ରାରେ ହାତୀ ମୃତ୍ୟୁ ଘଟୁଛି ସେଥିମଧ୍ୟରୁ ୬୦ ପ୍ରତିଶତ ଛୁଆ ହାତୀ, ରୋଗିଣା ହାତୀ ଅଧିକ ମୃତ୍ୟୁ ମୁହଁରେ ପଡ଼ୁଛନ୍ତି' ।

• ଓଡ଼ିଶାରେ ୪୦୦ ଅଧିକ ହାତୀ ଅଛନ୍ତି
• ଓଡ଼ିଶା ଜଙ୍ଗଲରେ ସର୍ବାଧିକ ୧୭୦୦ ହାତୀ ରହିପାରିବେ
• କିନ୍ତୁ ଏବେ ୨୧୦୦ ଶହ ହାତୀ ଅଛନ୍ତି

• ଅସ୍ବାଭାବିକରେ ଅଧିକ ହାତୀଙ୍କ ମୃତ୍ୟୁ ଘଟୁଛି:-

ପିସିସିଏଫ୍ ସୁଶାନ୍ତ ନନ୍ଦ ଆହୁରି ମଧ୍ୟ କହିଛନ୍ତି ଯେ "ରାଜ୍ୟରେ ବିଶେଷ ଭାବେ ରୋଗ, ବିଦ୍ୟୁତ ଆଘାତ ଓ ଟ୍ରେନ ଦୁର୍ଘଟଣାରେ ଯାଉଛି ହାତୀଙ୍କ ଜୀବନ ଯାଉଛି । ଯାହା ୩୦ ପ୍ରତିଶତରୁ ୬୦ ପ୍ରତିଶତ ଏହି ଭଳି ଅସ୍ବାଭାବିକ ମୃତ୍ୟୁରେ ଜୀବନ ଯାଉଛି । କିଛି ଦିନ ତଳେ ଭୁଲ ବୁଝାମଣା ପାଇଁ ରାଉରକେଲା ଓ ମେରାମଣ୍ଡଳିରେ ଟ୍ରେନ ଦୁର୍ଘଟଣାରେ ହାତୀଙ୍କ ଜୀବନ ଯାଇଥିଲା । ତେବେ ଏହି ସମସ୍ତ ଘଟଣାର ତଦନ୍ତ କରାଯିବ। ଯାହା ଫଳରେ ଘଟାଣର ସତ୍ୟାସତ ଆସିପାରିବ। "

• ରୋଗ, ବିଦ୍ୟୁତ ଆଘାତ ଓ ଟ୍ରେନ ଦୁର୍ଘଟଣାରେ ହାତୀ ମୃତ୍ୟୁ
• ୩୦ ପ୍ରତିଶତରୁ ୬୦ ପ୍ରତିଶତ ଅସ୍ବାଭାବିକ ହାତୀ ମୃତ୍ୟୁ

ବଳକା ହାତୀ ଶିମିଳିପାଳ ସ୍ଥାନାନ୍ତର ପାଇଁ ଯୋଜନା:-

"ରାଜ୍ୟରେ ଅଧିକ ମାତ୍ରାରେ ହାତୀ ରହିଛନ୍ତି । ଅନେକ କିଛି ହାତୀ ମଧ୍ୟ ଆମ ରାଜ୍ୟରୁ ବାହାର ରାଜ୍ୟକୁ ଯାଉଛନ୍ତି । ଓଡ଼ିଶା ଜଙ୍ଗଲରେ ଅଧିକ ହାତୀ ଥିବାରୁ ବିଶେଷଜ୍ଞଙ୍କ ପରାମର୍ଶରେ କିଛି ହାତୀ ଶିମିଳିପାଳ ସ୍ଥାନାନ୍ତର ପାଇଁ ଯୋଜନା ଚାଲିଛି । ସ୍ଥାନାନ୍ତର ପୂର୍ବରୁ ସ୍ଥାନୀୟ ବାସିନ୍ଦା ଓ ଜନ ପ୍ରତିନିଧିଙ୍କ ସହ ଆଲୋଚନା କରାଯିବ । ବର୍ତ୍ତମାନ ଯାହା ସ୍ଥିତି ବା ଜଙ୍ଗଲ ରହିଛି ତେବେ ଓଡିଶାରେ ୨୦୦୦ ରୁ ୨୧୦୦ ହାତୀ ରହିପାରିବେ । ସମସ୍ତ ହାତୀଙ୍କ ଦେହରେ ଲଗାଯିବ ରେଡିଓ କଲାର । ଯାହା ଫଳରେ କି ହାତୀଙ୍କ ଗତିବିଧି ଉପରେ ନଜର ରଖାଯାଇପାରିବ" ବୋଲି କହିଛନ୍ତି ପିସିସିଏଫ୍ ସୁଶାନ୍ତ ନନ୍ଦ ।

ଏହା ମଧ୍ୟ ପଢ଼ନ୍ତୁ-

ହାତୀ ଥିବା ଜଙ୍ଗଲକୁ ଯିବାବେଳେ ସତର୍କତା :-

"ହାତୀ ଥିବା ଅଞ୍ଚଳରେ ଲୋକମାନଙ୍କୁ ଅନୁରୋଧ ଯେ ଜଙ୍ଗଲକୁ ନିତ୍ୟକର୍ମ କରିବାକୁ ଯାଅନ୍ତୁ ନାହିଁ। ସରକାର ସମସ୍ତ ଘରକୁ ପାଣି ଏବଂ ଶୌଚାଳୟ ବ୍ୟବସ୍ଥା କରିଛନ୍ତି । ଏହାର ଫାଇଦା ନିଅନ୍ତୁ । ଅଯଥାରେ ଜଙ୍ଗଲ ମଧ୍ୟକୁ ଯାଆନ୍ତୁ ନାହିଁ" ବୋଲି କହିଛନ୍ତି ପିସିସିଏଫ୍ ସୁଶାନ୍ତ ନନ୍ଦ ।

ପୂର୍ଣ୍ଣିମା ରାତିରେ ହାତୀ ଗଣନା:-

ପିସିସିଏଫ୍ ସୁଶାନ୍ତ ନନ୍ଦଙ୍କ କହିବା ହେଲା "ଏବେ ରାଜ୍ୟକୁ ଆସୁଛନ୍ତି ଝାଡ଼ଖଣ୍ଡୀ ଓ ଛତିଶଗଡ଼ି ହାତୀ । ରାଜ୍ୟରେ ହାତୀଙ୍କ ବାସ୍ତବ ସଂଖ୍ୟା ଜାଣିବାକୁ ନଭେମ୍ବର ୧୪ ଓ ୧୫ ଦୁଇ ଦିନ ଧରି ଚାଲିବ ହାତୀ ଗଣନା । ଏବେ ହାତୀଙ୍କ ଗତିବିଧି ଉପରେ ନଜର ରଖାଯାଇଛି । ପୂର୍ଣ୍ଣିମା ରାତିରେ ସେମାନଙ୍କର ଫଟୋ ଓ ଭିଡିଓ ଉତ୍ତୋଳନ କରି ସେମାନଙ୍କ ଗଣନା କରାଯିବ। "

ଏହା ମଧ୍ୟ ପଢ଼ନ୍ତୁ-

ଖାଦ୍ୟ ସନ୍ଧାନରେ ଆସି ଶିକାର ହେଉଛନ୍ତି ହାତୀ:-

"ନରସିଂହପୁରରେ ତୀର ମାଡ଼ରେ ଆହତ ହାତୀ ଏବେ ସୁସ୍ଥ ଅଛି । ହାତୀ ଶରୀରରେ ୪ଟି ତୀର ଲାଗିଥିଲା । ଶିକାର ଉଦ୍ଦେଶ୍ୟରେ ନୁହେଁ, ଫସଲ ବଞ୍ଚାଇବାକୁ ତୀର ମାରି ହାତୀ ଘଉଡ଼ାଇଥିଲେ ସ୍ଥାନୀୟ ଲୋକେ। ହିନ୍ଦୋଳ - ନର୍ସିଙ୍ଗପୁର ସୀମାରେ ଘଟିଥିଲା ଏହି ଘଟଣା । ଚାଷ ଜମିରୁ ଖାଦ୍ଯ ସନ୍ଧାନରେ ରହିଥିବା ବେଳେ ଏହି ସମୟରେ ସ୍ଥାନୀୟ ଲୋକମାନେ ହାତୀ ଘଉଡାଇବା ପାଇଁ ଆସି ତୀର ମାଡ କରିଥିଲେ" ବୋଲି କହିଛନ୍ତି ବନ୍ୟପ୍ରାଣୀ ପିସିସିଏଫ୍ ସୁଶାନ୍ତ ନନ୍ଦ।

୭ ବର୍ଷରେ ୬୩୪ ହାତୀ ମୃତ୍ୟୁ :-

• ୨୦୧୭-୨୦୧୮ - ୭୮ ହାତୀ ମୃତ
• ୨୦୧୮-୨୦୧୯ - ୯୩ ହାତୀ ମୃତ
• ୨୦୧୯-୨୦୨୦ - ୮୨ ହାତୀ ମୃତ
• ୨୦୨୦-୨୦୨୧ - ୭୭ ହାତୀ ମୃତ
• ୨୦୨୧-୨୦୨୨ - ୮୬ ହାତୀ ମୃତ
• ୨୦୨୨-୨୦୨୩ - ୯୨ ହାତୀ ମୃତ
• ୨୦୨୩-୨୦୨୪ - ୬୬ ହାତୀ ମୃତ
• ୨୦୨୪ରୁ ବର୍ତ୍ତମାନ ପର୍ଯ୍ୟନ୍ତ ୬୦ ହାତୀ ମୃତ

ଇଟିଭି ଭାରତ, ଭୁବନେଶ୍ବର