ମାଲକାନଗିରି: ଡେପଥେରିଆ ଆକ୍ରାନ୍ତରେ ଗତ ୧୦ଦିନ ମଧ୍ୟରେ ଜଣଙ୍କ ମୃତ୍ୟୁ ହୋଇଥିବାବେଳେ ଜଣେ ଆକ୍ରାନ୍ତ ଚିହ୍ନଟ ହୋଇଛି । ରାୟଗଡ଼ା,କୋରାପୁଟ, କଳାହାଣ୍ଡି ପରେ ମାଲକାନଗିରି ଜିଲ୍ଲାକୁ ମାଡ଼ିଲା ମାରାତ୍ମକ ଡିପ୍ଥେରିଆ ଜୀବାଣୁ । କେମିତି ମାଲକାନଗିରି ଜିଲ୍ଲାକୁ ଆସିଲା ସ୍ପଷ୍ଟ ହୋଇପାରି ନଥିବାରୁ ଲୋକଙ୍କ ମଧ୍ୟରେ ଆତଙ୍କ ବଢ଼ିଛି ।
ତଙ୍ଗଗୁଡ଼ା ସେବାଶ୍ରମରେ ଡିପ୍ଥେରିଆ ଆତଙ୍କ:
ଚିତ୍ରାଙ୍ଗ ପାଲ୍ଲୀ ପଞ୍ଚାୟତ ଅନ୍ତର୍ଗତ ତଙ୍ଗଗୁଡ଼ା ଆବାସିକ ବିଦ୍ୟାଳୟର ଶିବ ମାଡ଼କାମୀ ନାମକ ଜଣେ ଚତୁର୍ଥ ଶ୍ରେଣୀ ଛାତ୍ର ଗତ ୧୩ ତାରିଖରେ ଜ୍ବରରେ ଆକ୍ରାନ୍ତ ହୋଇଥିଲେ । ସ୍ବାସ୍ଥ୍ୟାବସ୍ଥା ବିଗିଡ଼ିବାରୁ ତାଙ୍କୁ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ଚିକିତ୍ସା ସତ୍ତ୍ବେ ସ୍ଵାସ୍ଥ୍ୟାବସ୍ଥାରେ ପରିବର୍ତ୍ତନ ନହେବାରୁ ତାଙ୍କୁ କୋରାପୁଟ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା । ସେଠାରେ ରକ୍ତ ନମୁନା ପରୀକ୍ଷା କରିବାରୁ ଡିପ୍ଥେରିଆ ସଂକ୍ରମିତ ବୋଲି ଜଣାପଡ଼ିଥିଲା । ତେବେ ଚିକିତ୍ସାଧୀନ ଅବସ୍ଥାରେ ଗତ ୧୮ ତାରିଖରେ ତାଙ୍କର ମୃତ୍ୟୁ ହୋଇଥିଲା । ବର୍ତ୍ତମାନ ସେହି ବିଦ୍ୟାଳୟର ଆଉ ଜଣେ ଚତୁର୍ଥ ଶ୍ରେଣୀ ଛାତ୍ର ପଡ଼ିଆମି ମଧ୍ୟ ଅସୁସ୍ଥ ହୋଇଥିଲେ । ତାଙ୍କୁ ମାଲକାନଗିରିରେ ଚିକିତ୍ସା କରାଯିବା ପରେ ଡାଟ୍ ଇଞ୍ଜେକ୍ସନ ନଥିବାରୁ କୋରାପୁଟ ସ୍ଥାନାନ୍ତର କରାଯାଇଛି ।
ତଙ୍ଗଗୁଡ଼ା ସେବାଶ୍ରମରେ ସ୍ଥିତି ଅନୁଧ୍ୟାନ କଲେ ବିଶେଷଜ୍ଞ ଟିମ୍:
ଅନ୍ୟପଟେ ଏଭଳି ଘଟଣା ପରେ ଡବ୍ଲୁଏଚ୍ଓ ମେଡିକାଲ ଟିମ୍ ତଙ୍ଗଗୁଡ଼ା ଆବାସିକ ବିଦ୍ୟାଳୟରେ ପହଞ୍ଚି ସମସ୍ତ ଛାତ୍ରଛାତ୍ରୀଙ୍କ ସ୍ଵାସ୍ଥ୍ୟ ପରୀକ୍ଷା କରାଇବା ସହ ୬ଜଣଙ୍କ ରକ୍ତ ନମୁନା ସଂଗ୍ରହ କରିଥିଲେ । ଆଜି ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ପରିବାର କଲ୍ୟାଣ ନିର୍ଦ୍ଦେଶାଳୟର ବିଶେଷଜ୍ଞ ରାଜ୍ୟସ୍ତରୀୟ ଟିମ୍ ଡଃ ତାପସ କୁମାର ପାତ୍ର ଏବଂ ଡଃ ଅନୀଲ ପଟ୍ଟନାୟକ ତଙ୍ଗଗୁଡ଼ା ସେବାଶ୍ରମରେ ପହଞ୍ଚି ରୋଗର କାରଣ ଖୋଜିଛନ୍ତି । ଏହି ଘଟଣା ପରେ ଅଭିଭାବକ ମହଲରେ ଭୟର ବାତାବରଣ ଖେଳିଯାଇଛି । ତେବେ ମୁକାବିଲା ପାଇଁ ଡିପ୍ଥେରିଆ ପ୍ରତିଷେଧକ ଟିକା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆସିଥିବା ମଧ୍ୟ କହିଛନ୍ତି ବିଶେଷଜ୍ଞ ଟିମ୍ ।
ଇଟିଭି ଭାରତ,ମାଲକାନଗିରି
