ଭୁବନେଶ୍ବର: ରାଜ୍ୟରେ ମେଘୁଆ ପାଗ ସହ କାଁ ଭାଁ ବର୍ଷା ସମ୍ଭାବନା । କିଛି ଜିଲ୍ଲାର ଗୋଟିଏ ଦୁଇଟି ସ୍ଥାନରେ ଘଡଘଡି ବିଜୁଳି ସହ ହାଲୁକା ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ପାଣିପାଗ ବିଭାଗର ସୂଚନା ଅନୁସାରେ,"ବର୍ତ୍ତମାନ ରାଜ୍ୟ ଉପରେ କୌଣସି ପାଣିପାଗ ନିୟାମକର ପ୍ରଭାବ ନାହିଁ ।"
ମିଶ୍ରିତ ପାଗ:
ବିଶେଷ କରି ଉତ୍ତର ଆଭ୍ୟନ୍ତରୀଣ ଓଡିଶାରେ ପୂର୍ବାହ୍ନରେ ପ୍ରଚଣ୍ଡ ଖରା ଏବଂ ଅପରାହ୍ନରେ ବଜ୍ରପାତ ଜନିତ ବର୍ଷା ଅନୁଭୂତ ହେଉଛି। ଆଗାମୀ ୨୪ ଘଣ୍ଟା ମଧ୍ୟରେ ଉତ୍ତର ଓଡ଼ିଶାର ଜିଲ୍ଲା ବାଲେଶ୍ୱର, ମୟୂରଭଞ୍ଜ, କେନ୍ଦୁଝର, ଦେବଗଡ, ସୁନ୍ଦରଗଡ଼, ଝାରସୁଗୁଡା, ବରଗଡ଼, ସମ୍ବଲପୁର ଓ ଦେବଗଡ଼ ଜିଲ୍ଲାର ଗୋଟିଏ ୨ଟି ଜାଗାରେ ହାଲୁକାରୁ ମଧ୍ୟମ ବର୍ଷାର ସମ୍ଭାବନା ରହିଥିବା ନେଇ ସୂଚନା ଦେଇଛି ପାଣିପାଗ ବିଭାଗ । ତେବେ ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ, ବଙ୍ଗୋପସାଗରେ ଏକ ଗୁରୁଚାପ ବଳୟ ସୃଷ୍ଟି ହୋଇଛି। ଉତ୍ତର ପଶ୍ଚିମ ଦିଗରୁ ରାଜ୍ୟକୁ ପ୍ରଚୁର ପରିମାଣର ଶୁଷ୍କ ବାୟୁ ପ୍ରବେଶ କରୁଛି । ଏହି ଦୁଇଟି ନିୟାମକ ପରସ୍ପର ପ୍ରତିକ୍ରିୟାଶୀଳ ହୋଇ ଆକସ୍ମିକ ଭାବରେ ଘଡଘଡି ବିଜୁଳି ସହ ବର୍ଷା କରାଇବାରେ ସହାୟକ ହେଉଛି । ରାଜ୍ୟରେ କାଁ ଭାଁ ବର୍ଷାର ସମ୍ଭାବନା ଥିବାବେଳେ ପାଗ ମୁଖ୍ୟତଃ ଶୁଖିଲା ରହିବ।
ଫେରିଯିବ ମୌସୁମୀ:
ସେହିପରି "ଦକ୍ଷିଣ ଓଡ଼ିଶାରେ ମାଲକାନଗିରି, ରାୟଗଡା, କୋରାପୁଟ ଓ ଗଜପତିରେ ହାଲୁକାରୁ ମଧ୍ୟମ ଧରଣର ବର୍ଷା ରହିବ । ବର୍ତ୍ତମାନ ସୁଦ୍ଧା କୌଣସି ସତର୍କ ସୂଚନା ନାହିଁ। ଆସନ୍ତାକାଲି ପରଠୁ ଆରମ୍ଭ କରି 17/18 ତାରିଖ ପର୍ଯ୍ୟନ୍ତ ଓଡ଼ିଶାରେ ଅଧିକାଂଶ ଜିଲ୍ଲାମାନଙ୍କରେ ପାଗ ଶୁଷ୍କ ରହିବାର ସମ୍ଭାବନା ଅଛି। ଏହାସହ ଦିନ ତାପମାତ୍ରାରେ ବୃଦ୍ଧି ଓ ମୌସୁମୀ ପ୍ରତ୍ୟାବର୍ତ୍ତନ ପାଇଁ ପାଗ ଅନୁକୂଳ ରହିବାର ସମ୍ଭାବନା ରହିଛି । ଗତ ୨୪ ଘଣ୍ଟା ପାଗ ଶୁଖିଲା ସହ କାଁ ଭାଁ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ରେକର୍ଡ ହୋଇଛି। ତେବେ କେନ୍ଦୁଝର ଜିଲ୍ଲାର ଯୋଡ଼ାରେ ସର୍ବାଧିକ ୪୦.୬ ମିଲିମିଟର ବର୍ଷା ରେକର୍ଡ ହୋଇଛି" ବୋଲି କହିଛନ୍ତି ପାଣିପାଗ ବୈଜ୍ଞାନିକ କ୍ଷୀରୋଦ ବଳ ।
ଇଟିଭି ଭାରତ, ଭୁବନେଶ୍ବର
