ଭୁବନେଶ୍ବର: ଋତୁସ୍ରାବ ଜନିତ ସଂକ୍ରମଣରୁ ରୋକିବା ପାଇଁ ରାଜ୍ୟ ସରକାର ନେଇଛନ୍ତି ପଦକ୍ଷେପ । ରାଜ୍ୟରେ ଷଷ୍ଠରୁ ଦ୍ବାଦଶ ଶ୍ରେଣୀ ବାଳିକା ଓ ପ୍ରସବ ପର ମହିଳାଙ୍କୁ ଋତୁସ୍ରାବ ଜନିତ ସଂକ୍ରମଣରୁ ରୋକିବା ପାଇଁ ସାନିଟାରୀ ନାପକିନ ଦିଆଯାଉଛି । ଖୁସୀ ଯୋଜନା ଅଧୀନରେ ୨୦୧୮ରୁ ରାଜ୍ୟର ସମସ୍ତ ସରକାରୀ ଅନୁଦାନପ୍ରାପ୍ତ ବିଦ୍ୟାଳୟରେ ଷଷ୍ଠରୁ ଦ୍ବାଦଶ ଶ୍ରେଣୀ ବାଳିକାଙ୍କୁ ସାନିଟାରୀ ନାପକିନ ଦିଆଯାଉଥିବା ବେଳେ ୨୦୧୫ - ୧୬ରୁ ପ୍ରସବ ପରବର୍ତ୍ତୀ ମେଡିକାଲ ଟର୍ମିନେସନ ପ୍ରେଗ୍ନେନ୍ସି (ଏମ୍ଟିପି) ମହିଳାଙ୍କୁ ସାନିଟାରୀ ନାପକିନ ଦିଆଯାଉଛି । ଏଣିକି ଏହି ଦୁଇ କାର୍ଯ୍ୟକ୍ରମକୁ ଗୋଟିଏ ଯୋଜନା ଅଧୀନରେ କାର୍ଯ୍ୟକାରୀ ହେବ । ଯାହାର ନାମ ଖୁସି ପ୍ଲସ ରଖାଯାଇଛି। ଏନେଇ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
୨୦୨୫ - ୨୬ ପର୍ଯ୍ୟନ୍ତ ଏହି ଯୋଜନା କାର୍ଯ୍ୟକ୍ଷମ ହେବ । ଏଥିରେ ୧୭ ଲକ୍ଷ ୮୩ ହଜାର ୯୦୧ ବାଳିକା ଏବଂ ୯ ଲକ୍ଷ ୩୧ ହଜାର ୮୩୧ ଜଣ ଏମ୍ଟିପି ମହିଳା ଉପକୃତ ପାଇବେ । ସମସ୍ତଙ୍କୁ ମାଗଣାରେ ସାନିଟାରି ନାପକିନ୍ ଯୋଗାଇ ଦିଆଯିବ । ଏଥିପାଇଁ ୫୧୧ .୯୩ କୋଟି ଟଙ୍କା ଖର୍ଚ୍ଚ କରାଯିବ । ସେହିଭଳି ଶିଶୁ ଓ ମାତୃ ମୃତ୍ୟୁ ପୂର୍ଣ୍ଣ ନିରାକରଣ ଅଭିଯାନ (ସମ୍ପୂର୍ଣ୍ଣ)ର ଦ୍ବିତୀୟ ପର୍ଯ୍ୟାୟକୁ ରାଜ୍ୟ ସରକାର ଶନିବାର ଦିନ ଅନୁମୋଦନ କରିଛନ୍ତି । ୨୦୧୫ରୁ ଏହା କାର୍ଯ୍ୟକାରୀ ହୋଇ ଆସୁଥିବାବେଳେ ଆଗାମୀ ୫ ବର୍ଷ ପାଇଁ ଏହି ଯୋଜନାକୁ ଜାରି ରଖିବାକୁ ସରକାର ନିଷ୍ପତ୍ତି ନେଇଛନ୍ତି । ରାଜ୍ୟରେ ଶିଶୁ ମୃତ୍ୟୁହାର ଏବଂ ମାତୃ ମୃତ୍ୟୁହାର ହ୍ରାସ ତ୍ବରାନ୍ବିତ କରିବାକୁ ୨୦୨୩ - ୨୪ରୁ ୨୦୨୭ - ୨୮ ପର୍ଯ୍ୟନ୍ତ ଏହା କାର୍ଯ୍ୟକାରୀ ହେବାର ସୂଚନା ମିଳିଛି ।
ସୂଚନା ଅନୁଯାୟୀ, ସ୍କୁଲ ଛାତ୍ରୀଙ୍କୁ ମାଗଣା ଏବଂ ଗାଁ କିଶୋରୀମାନଙ୍କୁ ସ୍ବଳ୍ପ ମୂଲ୍ୟରେ ସାନିଟାରୀ ନାପକିନ ଯୋଗାଇ ଦେବା ଲାଗି ସରକାର ଖୁସି ଯୋଜନା ଆରମ୍ଭ କରିଥିଲେ । ଏହା ୨୦୧୮ ମସିହାରେ ଆରମ୍ଭ ହୋଇଥିବା ଏହି ଯୋଜନାରେ ଅନେକ ସମୟରେ ରାଜ୍ୟ ସାରା ଅବ୍ୟବସ୍ଥା ଦେଖାଯାଇଥିବା ନଜରକୁ ଆସିଥିଲା । କିଶୋରୀ ଏବଂ ସ୍କୁଲ ଛାତ୍ରୀମାନଙ୍କ ଲାଗି ଆସିଥିବା ନାପକିନ କେଉଁଠି ବଣ୍ଟା ଯାଉନଥିବା ବେଳେ ଆଉ କେଉଁଠି ଖତ ଖାଉଥିବା ଦେଖିବାକୁ ମିଳିଛି । ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ସାନିଟାରି ନାପକିନ ପଡି ଖତ ଖାଉଥିବା ବେଳେ କିଶୋରୀମାନେ ବାହାରୁ ନାପକିନ କିଣୁଛନ୍ତି । ସରକାରଙ୍କ ଦ୍ବାରା ସାନିଟାରୀ ନାପକିନ ଯୋଗାଇ ପାଇଁ ଏଥିରେ ୫ଟି ସଂସ୍ଥା ଅଂଶଗ୍ରହଣ କରିଥିଲେ । ଟେଣ୍ଡର ମୂଲ୍ୟାୟନ କମିଟି ବୈଷୟିକ ବିଡକୁ ଯାଞ୍ଚ କରି ଆବଶ୍ୟକ କାଗଜପତ୍ର ଅଭାବରୁ ୩ଟି ସଂସ୍ଥାକୁ ବାଦ କରିଥିଲେ । ବାକି ୨ଟି କମ୍ପାନୀ ନାପକିନ ପ୍ରତି ୟୁନିଟ ପିଛା ୨.୯୭ ଟଙ୍କା ଦେଇଥିଲେ ।
ଇଟିଭି ଭାରତ, ଭୁବନେଶ୍ବର
