ପୁରୀ: ରାଜ୍ୟରେ ସବୁ ମଠ ଓ ମନ୍ଦିର ଗୁଡିକର ସୁରକ୍ଷା ଓ ରକ୍ଷଣ ବେକ୍ଷଣ ପାଇଁ ନୂଆ ଯୋଜନା କରିଛନ୍ତି ରାଜ୍ୟ ସରକାର । ଦେବାଳୟ ପ୍ରକଳ୍ପ ମାଧ୍ୟମରେ ମଠ ଓ ମନ୍ଦୀରର ଉନ୍ନତୀ କରଣ କରାଯିବ । ଗୋଟିଏ ଓ୍ୱେବସାଇଟରେ ରାଜ୍ୟର ସବୁ ମଠ ଓ ମନ୍ଦିରର ସମ୍ପୂର୍ଣ୍ଣ ତଥ୍ୟ ରହିବ । ଅବହେଳିତ ହୋଇ ରହିଥିବା ମଠ ମନ୍ଦିରଗୁଡିକର ଉନ୍ନତୀ କରଣ ପାଇଁ ନୂଆ ବ୍ଲୁପ୍ରିଣ୍ଟ ତିଆରି କରୁଛନ୍ତି ସରକାର । ନିର୍ବାଚନ ପୂର୍ବରୁ ସଂକଳ୍ପ ପତ୍ରରେ ବିଜେପି ଯେଉଁ ପ୍ରତିଶ୍ରୁତି ଦେଇଥିଲା, ତାହାକୁ ବିଜେପି ସରକାର ତାକୁ ପାଳନ କରିବାକୁ ଯାଉଛନ୍ତି ।
ଦେବାଳୟ ପ୍ରକଳ୍ପ:
ଯେଉଁ ମଠ ମନ୍ଦିର ଗୁଡିକ ମରାମତି, ରକ୍ଷଣାବେକ୍ଷଣ, ପରିଚାଳନା ସମସ୍ୟା ରହିଛି, ସେଗୁଡିକ ପ୍ରତି ଧ୍ୟାନ ଦିଆଯିବ । ରାଜ୍ୟରେ ଥିବା ସବୁ ମଠ ମନ୍ଦିରର ଡକୁମେଣ୍ଟେସନ କରାଯିବ । ଏହାପରେ ଗୋଟିଏ ଓ୍ୱେବସାଇଟରେ ରହିବ ସବୁ ମଠ ଓ ମନ୍ଦିରର ତଥ୍ୟ । ମଠମାନଙ୍କୁ ଜମି ଆବଣ୍ଟନ ସହ ମଠର ପୂର୍ବ ଗୌରବକୁ ପୁନରୁଦ୍ଧାର କରାଯିବ । ତେବେ ନୂଆ ଦେବାଳୟ ଯୋଜନାରେ ସ୍ଵତନ୍ତ୍ର ଫୋକସରେ ରହିଛି ଶ୍ରୀମନ୍ଦିର । ପରିକ୍ରମା ପ୍ରକଳ୍ପ ସମୟରେ ଉଚ୍ଛେଦ ହୋଇଥିବା ମଠଗୁଡିକ ପାଇଁ ଯଥେଷ୍ଟ କ୍ଷତିପୂରଣ ସହ ପୁନଃପ୍ରତିଷ୍ଠା ପାଇଁ ସ୍ବତନ୍ତ୍ର ପଦକ୍ଷେପ ନିଆଯିବ । ପୂର୍ବ ବିଜେଡ଼ି ସରକାର ମଠ ମନ୍ଦିରର ମରାମତି ପାଇଁ ଅବଢ଼ା ଯୋଜନା କରିଥିଲେ। ତେବେ ବିଜେପି ସରକାର ମଠ ଓ ମନ୍ଦିର ପାଇଁ ନୂଆ ଯୋଜନା ଦେବାଳୟ ପ୍ରକଳ୍ପ କରିବାକୁ ଯାଉଛନ୍ତି । ଏହା ଧାର୍ମିକ ପର୍ଯ୍ୟଟନକୁ ଆହୁରି ଆଗକୁ ନେବ ବୋଲି ସରକାର ଆଶା ରଖିଛନ୍ତି ।
ସ୍ଵାଗତ କଲେ ମଠାଧୀଶ:
ତେବେ ରାଜ୍ୟ ସରକାରଙ୍କ ନୂଆ ଦେବାଳୟ ପ୍ରକଳ୍ପକୁ ନେଇ ମତ ରଖିଛନ୍ତି ଶ୍ରୀମନ୍ଦିର ଉତ୍ତର ଦ୍ଵାର ସମ୍ମୁଖରେ ଥିବା ଉତ୍ତର ପାର୍ଶ୍ୱ ମଠ ମହନ୍ତ ନାରାୟଣ ରାମାନୁଜ ଦାଶ । ସେ କହିଛନ୍ତି," ଭାବରେ ରାଜ୍ୟ ସରକାରଙ୍କ ପଦକ୍ଷେପକୁ ଆମେ ସ୍ବାଗତ କରିବୁ । ଆମେ ଆଇନ ମନ୍ତ୍ରୀଙ୍କୁ ଧନ୍ୟବାଦ୍ ଦେବୁ । ପୁରୀ ଜିଲ୍ଲାରେ 34 ଶହ ମଠ ଅଛି । ଯଦି ଓଡ଼ିଶାକୁ ଆମେ ରଖିବା 8 ହଜାରରୁ 10 ହଜାର ମଠ ଓ ଦେବାଳୟ ରହିଛି । ଯଦି ଏହାର ପୁନରୁଦ୍ଧାର ସହ ଉନ୍ନତିକରଣ କରାଯାଏ , ତାହା ହେଲେ ଆମେ ସାଧୁ, ସନ୍ଥ, ଓ ଭକ୍ତ ବେଶ୍ ଆନନ୍ଦିତ ହେବୁ । ଗତ 24 ବର୍ଷ ଯେଉଁ ସରକାର ଥିଲେ, ସେମାନେ କିଛି ପୁନରୁଦ୍ଧାର କାର୍ଯ୍ୟ ଆରମ୍ଭ କରିଥିଲେ ମଧ୍ୟ କିଛି ପୂର୍ଣ୍ଣାଙ୍ଗ କରିପାରିନାହାନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ 18ଟି ମଠ ସମ୍ପୂର୍ଣ୍ଣ ଭାଙ୍ଗି ନଷ୍ଟ ହେଇଛି । ତେବେ ଉଚ୍ଛେଦ ହୋଇଥିବା ମଠ ଗୁଡ଼ିକୁ ପୂର୍ବ ସରକାରଙ୍କ ପକ୍ଷରୁ କୌଣସି ଆର୍ଥିକ ସାହାଯ୍ୟ ଦିଆଗଲା ନାହିଁ । ମଠର ବିକାଶ ପାଇଁ ଭୂମି ଦିଆଗଲା ନାହିଁ । ଆମ ମଠର ବିଜେସ୍ଥଳୀ ଆମେ କେଉଁଠୁ ରଖିବୁ । ସେ ନେଇ ପ୍ରଶ୍ନବାଚୀ ସୃଷ୍ଟି ହେଇଛି । ତେବେ ଦେବାଳୟ ପ୍ରକଳ୍ପ ଯେଉଁ ଆସିଛି ଏହାକୁ ନେଇ ଆମ ମନରେ ଉତ୍ସାହ ପ୍ରକାଶ ପାଇଛି ।"
ଏମିତି କହିଲେ ଶ୍ରୀମନ୍ଦିରର ବରିଷ୍ଠ ଦଇତାପତି :
ଶ୍ରୀମନ୍ଦିରର ବରିଷ୍ଠ ଦଇତାପତି ସେବକ ବିନାୟକ ଦାସ ମହାପାତ୍ର କହିଛନ୍ତି," ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ଶ୍ରୀମନ୍ଦିର ଚାରି ପାଖରେ ଥିବା ସବୁ ମଠକୁ ଭାଙ୍ଗି ଧ୍ୱସଂ କରିଦିଆଗଲା । ତେବେ ଦୁଃଖର ବିଷୟ ଏହାର ଉନ୍ନତିକରଣ ପାଇଁ ଯେଉଁ ଯୋଜନା ହୋଇଥଲା ତାହା ସମ୍ପୂର୍ଣ୍ଣ ଠପ୍ ହୋଇ ପଡ଼ିଛି । କୌଣସି କାର୍ଯ୍ୟ ଆଜି ପର୍ଯ୍ୟନ୍ତ ଆଗେଇ ପାରିଲା ନାହିଁ । ତେଣୁ ଯଦି ମୁଖ୍ୟମନ୍ତ୍ରୀ, ଆଇନମନ୍ତ୍ରୀ ମଠ ମନ୍ଦିରର ପୁନରୁଦ୍ଧାର ପାଇଁ ପଦକ୍ଷେପ ନେଉଛନ୍ତି ଏହା ଦ୍ୱାରା ଭକ୍ତମାନେ ଖୁସି ହେବେ। ଏହି ପ୍ରୋଜେକ୍ଟକୁ ଯଥାଶୀଘ୍ର କାର୍ଯ୍ୟକାରୀ କରାଯିବାର ଆବଶ୍ୟକତା ରହିଛି ।"
'ମହାପ୍ରଭୁଙ୍କ ଲୀଳା କ୍ଷେତ୍ରର ମଧ୍ୟ ପୁନରୁଦ୍ଧାର ଆବଶ୍ୟକ ':
ଶ୍ରୀମନ୍ଦିରର ଚୂନରା ସେବାୟତ ଶରତ ମହାନ୍ତି କହିଛନ୍ତି," ଜଗନ୍ନାଥ ସଂସ୍କୃତିର ପ୍ରଚାର ପ୍ରସାର ପାଇଁ ମଠ ମାନଙ୍କର ଅବଦାନ ବହୁତ ରହିଛି । କେବଳ ମଠ, ମନ୍ଦିର କହିଲେ ଠିକ୍ ହେବ ନାହିଁ ମହାପ୍ରଭୁଙ୍କ ଅନେକ ଲୀଳା କ୍ଷେତ୍ର ରହିଛି । ଯେତେବେଳେ ବିଧର୍ମୀମାନେ ଶ୍ରୀମନ୍ଦିର ଉପରେ ଆକ୍ରମଣ କରିଥିଲେ ମହାପ୍ରଭୁଙ୍କୁ ଗୋପନରେ ବିଭିନ୍ନ ସ୍ଥାନରେ ରଖାଯାଇଥିଲା । ମହାପ୍ରଭୁ ଚିଲିକାର ନଇରୀ, ଗୁରୁବାଇ, କାଙ୍କଣ ଶିଖରି, ବଡହନ୍ତୁଆଡ, ବାଣପୁର, ଗଞ୍ଜାମର ମାରଦା, ଖୋର୍ଦ୍ଧାରେ ଥିବା ଗଡ଼ ଆଦି ଅନେକ ସ୍ଥାନରେ ମହାପ୍ରଭୁ ଯାଇ ଲୀଳା କରିଥିଲେ।ମହାପ୍ରଭୁଙ୍କ ଲୀଳା କ୍ଷେତ୍ରର ମଧ୍ୟ ପୁନରୁଦ୍ଧାରର ଆବଶ୍ୟକତା ରହିଛି । "
ଇଟିଭି ଭାରତ, ପୁରୀ
