କଟକ: ଅତ୍ୟଧିକ ଲୋଭ ହେଲା କାଳ । ଲୋଭ କରି ସାଇବର ଅପରାଧୀଙ୍କ ଜାଲରେ ଫସିଗଲେ ଜେଏସଡବ୍ଲ୍ୟୁର (JSW) ବରିଷ୍ଠ ଅଧିକାରୀ । ଲକ୍ଷେ କି ଦୁଇ ଲକ୍ଷ ଟଙ୍କା ନୁହେଁ ବରଂ ୬ କୋଟି ୨୮ ଲକ୍ଷ ଟଙ୍କା ହରାଇଲେ କୁନ୍ତଳ ମଜୁମଦାର । ଏହି ମାମଲାର ତଦନ୍ତ କରି କ୍ରାଇମବ୍ରାଞ୍ଚ ୨୪ ଜଣିଆ ଅନ୍ତରାଜ୍ୟ ସାଇବର ଠକ ଗ୍ୟାଙ୍ଗକୁ ଗିରଫ କରିଛି । ଏହି ଘଟଣାରେ ବିଦେଶୀ ଲିଙ୍କ୍ ଥିବାନେଇ ପ୍ରମାଣ ପାଇଛି କ୍ରାଇମବ୍ରାଞ୍ଚ ।
ଲୋଭ କରି ଫସିଗଲେ କୁନ୍ତଳା !
ଆପଣ ସେୟାର ମାର୍କେଟରେ ଟଙ୍କା ନିବେଶ କରୁଛନ୍ତି କି ! ହୋଇ ଯାଆନ୍ତୁ ସାବଧାନ ! ନଚେତ କୁନ୍ତଳ ମଜୁମଦରଙ୍କ ଭଳି ହୋଇପାରନ୍ତି ସାଇବର ଠକେଇର ଶିକାର । ଅଳ୍ପ ନିବେଶ କରି କମ୍ ସମୟରେ ଅଧିକ ଟଙ୍କା ରୋଜଗାର କରିବା ମହଙ୍ଗା ପଡିଲା କୁନ୍ତଳଙ୍କୁ । ସେୟାର ମାର୍କେଟରେ ପୁଞ୍ଜି ନିବେଶ କରିବା ନିଶା ଥିଲା କୁନ୍ତଳଙ୍କୁ । ଆଉ ପ୍ରତ୍ୟକ ଦିନ ସେ ଅନଲାଇନରେ ସେୟାର ମାର୍କେଟ ସମ୍ପର୍କୀୟ ଖବର ଦେଖନ୍ତି । ସାଇବର ଠକମାନେ ମଧ୍ୟ ଏଭଳି ଗତିବିଧି ଲକ୍ଷ୍ୟ କରି କୁନ୍ତଳଙ୍କୁ ନିଜ ଜାଲରେ ଫସାଇ ବାକୁ ଜାଲ ବିଛାଇ ଥିଲେ । ବିଶେଷକରି ଅଜଣା ହ୍ବାଟସଅପ (WhatsApp) ମାଧ୍ୟମରେ କୁନ୍ତଳଙ୍କୁ କବଳିତ କରିଥିଲେ ସାଇବର ଠକ । ଜୁଲାଇ ମାସରେ ତାଙ୍କୁ ଗ୍ରୁପରେ ଆଡ୍ କରାଯାଇଥିଲା । ଏହା ପରେ ସେୟାର ମାର୍କେଟ ସମ୍ପର୍କିତ ଅନେକ ଆକର୍ଷଣୀୟ ଆଉ ଲୋଭନୀୟ ଅଫର ଦେଇ କୁନ୍ତଳଙ୍କୁ ନିଜ ଆୟତ୍ତକୁ ନେଇଥିଲେ । ପ୍ରତ୍ୟକ ଦିନ ଦୁଇ ଥର ଲେଖାଏଁ ବାର୍ତ୍ତାଳାପ କରି କୁନ୍ତଳଙ୍କୁ ପ୍ରଲୋଭିତ କରୁଥିଲେ । ଏହି କ୍ରମରେ ଗତ ଅକ୍ଟୋବର ମାସରେ ଟଙ୍କା ନିବେଶ କରିଥିଲେ କୁନ୍ତଳ ।
୪ କୋଟି ଟଙ୍କା ନିବେଶ କଲେ, ୭ ଦିନରେ ୨୩ କୋଟି !
ପ୍ରଥମେ ୫୦ ହଜାର ଟଙ୍କା ନିବେଶ କରିଥିଲେ କୁନ୍ତଳ । ଦୁଇ ଦିନରେ ଏହି ଟଙ୍କା ୪ ଗୁଣ ହୋଇ ୨ ଲକ୍ଷ ଟଙ୍କା ହୋଇଯାଇଥିଲା । ଯାହାକୁ ନେଇ କୁନ୍ତଳ ସହଜରେ ବିଶ୍ୱାସ କରିଥିଲେ । ତାଙ୍କୁ ପ୍ରଲୋଭିତ କରିବା ପାଇଁ ସାଇବର ଠକ ମାନେ ବିଭିନ୍ନ ପ୍ରଜାର ଆକର୍ଷଣୀୟ ଅଫର ଦେଇଥିଲେ । ଏପରିକି ୪୯ ଟଙ୍କା ମୂଲ୍ୟର ସେୟାରକୁ ଡିସକାଉଣ୍ଟରେ ୧୯ ଟଙ୍କାରେ ଉପଲବଧ ହେଉଥିବା କହି ଆହୁରି ପ୍ରଲୋଭିତ କରିଥିଲେ । ଏଥିରେ ସେ ଆହୁରି ପ୍ରଭାଭିତ ହୋଇ ପ୍ରାୟ ୪ କୋଟି ଟଙ୍କାର ସେୟାର କିଣିଥିଲେ । ଏହି ୪ କୋଟି ମାତ୍ର ୭ ଦିନରେ ୨୩ କୋଟି ହୋଇଥିଲା । ନିଜର ସେୟାର ଏତେ ବଢି ଯାଇଥିବାରୁ କୁନ୍ତଳା ଏହାକୁ ଉଠାଇବାକୁ ଚାହିଁ ଥିଲେ । ମାତ୍ର ସାଇବର ଠକମାନେ ତାଙ୍କୁ ଆହୁରି ଫସାଇ ଥିଲେ । ଗ୍ରୁପ ଆଡ଼ମିନ କହିଥିଲେ କି ଏହି ଟଙ୍କା ଉଠାଇବାକୁ ପାଇଁ ୧ କୋଟି ଟଙ୍କା ନିବେଶ କରିବାକୁ ହେବ । ଏତେ ଟଙ୍କା ଦେଖି କୁନ୍ତଳଙ୍କୁ ଲୋଭ ହୋଇଥିଲା । ୧ କୋଟି ଟଙ୍କା ଯୋଗାଡ କରି ପୁନର୍ବାର ନିବେଶ କରିଥିଲେ । ମାତ୍ର ଟଙ୍କା ଉଠାଇବାକୁ କହିବାରୁ ସାଇବର ଠକମାନେ ତାଙ୍କୁ ଗ୍ରୁପରୁ କାଢି ଦେଇଥିଲେ । ଏଭଳି ଠକେଇର ଶିକାର ହେବା ପରେ କୁନ୍ତଳା କ୍ରାଇମବ୍ରାଞ୍ଚର ଦ୍ୱାରସ୍ଥ ହୋଇଥିଲେ ।
ସାଇବର ଥାନାରେ କ'ଣ ଅଭିଯୋଗ କରିଥିଲେ କୁନ୍ତଳ !
ଗତ ଅଗଷ୍ଟ 24 ତାରିଖରେ ସାଇବର ଅପରାଧ ହୋଇଥିବା ନେଇ କ୍ରାଇମବ୍ରାଞ୍ଚରେ ଅଭିଯୋଗ ହୋଇଥିଲା । ସାଇବର ଥାନା (କ୍ରାଇମବ୍ରାଞ୍ଚ)କଟକ ଠାରେ ଅଭିଯୋଗ କରାଯାଇଥିଲା । ଅଭିଯୋଗ ମୁତାବକ, କୁନ୍ତଳ ଗତ ଜୁଲାଇ-2024ରେ ଗୋଟେ WhatsApp Group ‘KOTAK INVESTMENT CLUB’ ଗ୍ରୁପ୍ର ଆଡମିନିଷ୍ଟ୍ରେଟର (617-2594164) ମେମ୍ବର ଭାବରେ ଆଡ କରାଯାଇଥିଲା । ଗ୍ରୁପ୍ ଆଡମିନି ସେହି ଗ୍ରୁପରେ ପୁଞ୍ଜି ନିବେଶ ବାବଦରେ ପ୍ରବର୍ତ୍ତାଇବାରୁ ଅଭିଯୋଗକାରୀ WhatsApp Group ଏକ ପ୍ରକୃତ investment group ବୋଲି ବିଶ୍ବାସ କରିଥିଲେ । ଗ୍ରୁପ ଆଡମିନ କହିବା ଅନୁସାରେ ମୋଟ 25,40,000 ଅଂଶଧନ କ୍ରୟ କରି ସେ ବାବଦକୁ 6.28 କୋଟି ବିନିଯୋଗ କରିଥିଲେ । ନିବେଶ ପରେ ତୁରନ୍ତ ସେୟାରର ମୂଳ ମୂଲ୍ୟ ହଠାତ୍ ୧୧୦/- ଟଙ୍କାକୁ ବୃଦ୍ଧି ପାଇ ନିଜ ନିବେଶର ଫଣ୍ଡ ଭ୍ୟାଲୁ 25 କୋଟିରେ ପହଞ୍ଚିବାରୁ, କୁନ୍ତଳ ତାଙ୍କର ଟଙ୍କା ଉଠାଇବାକୁ ଗ୍ରୁପ୍ ଆଡମିନିଙ୍କୁ କହିଥିଲେ । ଅଗଷ୍ଟ ୧ ତାରିଖରୁ ଅଗଷ୍ଟ ୭ ତାରିଖ ମଧ୍ୟରେ ଏଥିସହ ଗ୍ରୁପ୍ ଆଡମିନି ୨୩ କୋଟି ଟଙ୍କା ଉଠାଇବାକୁ ଅନୁମତି ବି ଦେଇଥିଲେ । 21. 08. 2024 ତାରିଖରେ ଯେତେବେଳେ ସେ ତାଙ୍କ ଟଙ୍କା ଉଠାଇବାକୁ ଚେଷ୍ଟା କଲେ ସେହି ସମୟରେ ତାଙ୍କୁ ଗ୍ରୁପ୍ ହଟାଇ ଦିଆଗଲା ଏବଂ କାରବାର ପାଇଁ ବ୍ୟବହୃତ ଆପ୍ ନିଷ୍କ୍ରିୟ ହୋଇଗଲା ।
ଏହା ମଧ୍ୟ ପଢନ୍ତୁ ...ସିମ୍ ବକ୍ସ ପରେ ଫେକ୍ କଲ ସେଣ୍ଟର, ରାଜଧାନୀରେ ବଡ଼ ସାଇବର ଠକେଇର ପର୍ଦ୍ଦାଫାସ ଏହା ମଧ୍ୟ ପଢନ୍ତୁ ...ଏଇ ଭୁଲ ପାଇଁ ଶିକ୍ଷକ ହରାଇଲେ ଅଢେଇ କୋଟି... - Digital Arrest |
ଓଡିଶା କ୍ରାଇମବ୍ରାଞ୍ଚକୁ ବଡ଼ ସଫଳତା :
ଏହି ମାମଲାରେ 100ରୁ ଉର୍ଦ୍ଧ୍ବ ବ୍ୟାଙ୍କ ଆକାଉଣ୍ଟ ଠାବ କରିବାରେ ସଫଳ ହୋଇଛି କ୍ରାଇମବ୍ରାଞ୍ଚ । ତାମିଲନାଡୁ, ଗୁଜୁରାଟ ଓ ରାଜସ୍ଥାନରୁ ଠକମାନଙ୍କୁ ଧରିବାରେ ସଫଳ ହୋଇଛି ବିଭାଗ । ଏଥିସହ 60 ଲକ୍ଷ ଟଙ୍କା ଫ୍ରିଜ କରାଯିବା ସହ ବିଦେଶ ଲିଙ୍କ୍ ଥିବାର ପ୍ରମାଣ ମିଳିଛି ବୋଲି କ୍ରାଇମବ୍ରାଞ୍ଚ ଏଡିଜି ବିନୟତୋଷ ମିଶ୍ର । କ୍ରାଇମବ୍ରାଞ୍ଚର ସାଇବର କ୍ରାଇମ ୟୁନିଟ, ଏହି ଘଟଣାର ତଦନ୍ତ କରି ଜାଣିବାକୁ ପାଇଲେ ଯେ ଅଭିଯୋଗକାରୀ ମୁଖ୍ୟତଃ 100ରୁ ଅଧିକ ବିଭିନ୍ନ ବ୍ୟାଙ୍କ ଆକାଉଣ୍ଟରେ ମୋଟ ୬.୮ କୋଟି ଟଙ୍କା ଟ୍ରାନ୍ସଫର କରିଥିଲେ ।
ତାମିଲନାଡୁ, ଗୁଜୁରାଟ ଏବଂ ରାଜସ୍ଥାନ ଭଳି ରାଜ୍ୟରେ ମୋଟ ୨୪ ଅଭିଯୁକ୍ତଙ୍କୁ ସଫଳତାର ସହ ଚିହ୍ନଟ କରିବା ସହ ଆଜି ସୁଦ୍ଧା ତାମିଲନାଡୁର ୦୯ ଅଭିଯୁକ୍ତ, ଗୁଜୁରାଟର ୦୮ ଓ ରାଜସ୍ଥାନରୁ ୦୭ ଅଭିଯୁକ୍ତଙ୍କୁ ଗିରଫ ହୋଇଛନ୍ତି । ଅଭିଯୁକ୍ତମାନଙ୍କଠାରୁ ବ୍ୟବହୃତ ବ୍ୟାଙ୍କ ଆକାଉଣ୍ଟ, ମୋବାଇଲ ଆଦି ଜବତ କରାଯାଇଛି ।
ଇଟିଭି ଭାରତ, ଭୁବନେଶ୍ବର
