ବୌଦ୍ଧ: ଗୋଟିଏ ନିର୍ବାଚନ ଯାଇ ଆଉ ଗୋଟିଏ ନିର୍ବାଚନ ଆସୁଛି କିନ୍ତୁ ପ୍ରତିଶ୍ରୁତି ପୂରଣ ହେଉନାହିଁ । ଫଳରେ ସମସ୍ୟା ଘେରରୁ ମୁକୁଳି ପାରୁନାହିଁ ଜିଲ୍ଲାର ମାତାଗାଡୁ ଗ୍ରାମବାସୀ । ଏହି ଦୁର୍ଗମ ଅଞ୍ଚଳର ଅଧିବାସୀଙ୍କ ନିକଟରେ ସରକାରୀ ଯୋଜନା ପହଞ୍ଚାଇବାକୁ ପ୍ରଶାସନ ଫେଲ ମାରିଥିବା ଅଭିଯୋଗରେ ଭୋଟ ବର୍ଜନ କରିଛନ୍ତି ଗ୍ରାମବାସୀ । ନିର୍ବାଚନର ସମୟ ସରିଲା, କିନ୍ତୁ ଗାଁର କୌଣସି ନାଗରିକ ମତଦାନ କଲେ ନାହିଁ । ଶେଷରେ ପ୍ରଶାସନ ମତଦାତାଙ୍କୁ ବୁଝାଇବାରେ ବିଫଳ ହୋଇ ପୋଲିଂ ପାର୍ଟି ଫେରିଥିଲେ ।
ଭୋଟ ବର୍ଜନ କଲେ ମାତାଗାଡୁ ବାସୀ:- ଜିଲ୍ଲାର ଉଭୟ ନିର୍ବାଚନ ମଣ୍ଡଳୀରେ ସରିଲା ଦ୍ବିତୀୟ ପର୍ଯ୍ୟାୟ ମତଦାନ ପ୍ରକ୍ରିୟା । ତେବେ ମାଓ ଅଧ୍ୟୁଷିତ ଅଞ୍ଚଳରେ ବିଭିନ୍ନ ସମସ୍ୟାର ସମାଧାନ ନହେବାରୁ ଜିଲ୍ଲାର ଏକମାତ୍ର ବୁଥର ମତଦାତା ଭୋଟ ବର୍ଜନ କରିଛନ୍ତି । ଗାଁରେ ଅଞ୍ଚଳର ଅଧିବାସୀଙ୍କ ପାଇଁ ମତଦାନ କେନ୍ଦ୍ର ପ୍ରତିଷ୍ଠା କରାଯାଇଥିବା ବେଳେ ରବିବାର ଅପରାହ୍ନରେ ପୋଲିଂ ପାର୍ଟି ଗାଁରେ ପହଞ୍ଚିଥିଲେ । କିନ୍ତୁ ସୋମବାର ଦିନ ଗ୍ରାମବାସୀ ଏକ ବୈଠକରେ ସମସ୍ତଙ୍କ ସହମତି କ୍ରମେ ମତଦାନ କରିବେ ନାହିଁ ବୋଲି ସ୍ପଷ୍ଟ କରିଥିଲେ । ମାତାଗାଡୁ ତଥା ଘାଟି ପାହାଚ ଉପରେ ଥିବା ପ୍ରାୟ ସାତ ଖଣ୍ଡ ଗ୍ରାମବାସୀଙ୍କ ସମସ୍ୟାର ସମାଧାନ ନହେବା ପର୍ଯ୍ୟନ୍ତ ସେମାନେ ମତଦାନରୁ ବିରତ ରହିବେ ବୋଲି ସୂଚନା ଦେଇଛନ୍ତି ।
ଗ୍ରାମବାସୀଙ୍କୁ ବୁଝାଇବାରେ ବିଫଳ ହେଲା ପ୍ରଶାସନ:- ସୂଚନା ମୁତାବକ ମାତାଗାଡୁ ୧୬୪ ନମ୍ବର ବୁଥ ହୋଇଥିବା ବେଳେ ଏଠାରେ ୨୩୫ ଜଣ ଭୋଟର ରହିଛନ୍ତି । ବିଭିନ୍ନ ସମସ୍ୟାକୁ ଭୋଟ ବର୍ଜନ କରିବାକୁ ନିଷ୍ପତ୍ତି ନେଲେ ଗ୍ରାମବାସୀ । ଏ ସମ୍ପର୍କରେ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ବାରମ୍ୱାର ସେମାନଙ୍କୁ ବୁଝାଇଥିଲେ ସୁଦ୍ଧା ଲୋକେ ଭୋଟ ଦେବାକୁ ମନା କରିଥିଲେ । ସେପଟେ ଜିଲ୍ଲାପାଳ ଜେ. ସୋନାଲ କହିଛନ୍ତି ପୂର୍ବରୁ ବାରମ୍ବାର ଗ୍ରାମବାସୀଙ୍କ ସମସ୍ୟା ବିଶେଷ ଭାବରେ ରାସ୍ତା ସମସ୍ୟାର ସମାଧାନ ପାଇଁ ଆଲୋଚନା କରାଯାଇଛି ଏବଂ ଏହାର ସମାଧାନ ପାଇଁ ଉଦ୍ୟମ ବି ଆରମ୍ଭ କରାଯାଇଛି । ତେବେ ଆଚରଣବିଧି ଲାଗୁ ଥିବାରୁ ରାସ୍ତା ନିର୍ମାଣ ନିର୍ବାଚନ ପରେ ହେବ ସୂଚନା ଦେଇଛନ୍ତି ।
ମାତାଗାଡୁ ଗାଁରେ ଫେଲ ମାରିଛି ସରକାରୀ ଯୋଜନା:- ବୌଦ୍ଧ ଜିଲ୍ଲା ସଦର ବ୍ଲକ ଆମ୍ବଝରୀ ପଞ୍ଚାୟତର ଅତ୍ୟନ୍ତ ଦୁର୍ଗମ ଅଞ୍ଚଳ ଭାବରେ ପରିଚିତ ମାତାଗାଡୁ ଗାଁ । ଏହି ମାଓ ପ୍ରଭାବିତ ମାତାଗାଡୁ ଗ୍ରାମ ଚତୁର୍ଦ୍ଦିଗକୁ ବଣ ଜଙ୍ଗଲ ଘେରି ରହିଥିବା ବେଳେ ପାହାଡିଆ ଘାଟି ରାସ୍ତା ଅତିକ୍ରମ କରି ଏଠାକୁ ପହଞ୍ଚିବା ପାଇଁ ପଡ଼ିଥାଏ । ଦୁର୍ଗମ ଅଞ୍ଚଳ ହେତୁ ଏଠାରେ ସରକାରୀ ଯୋଜନା ଅପହଞ୍ଚ ହୋଇରହିଛି । ମାଓ ଅଧ୍ୟୁଷିତ ଏହି ଅଞ୍ଚଳକୁ ଯୋଗାଯୋଗ ଭଳି ଆବାସ ଯୋଜନା, ରାସନ, ପାନୀୟଜଳ, ସାମାଜିକ ସୁରକ୍ଷା, ବିଦ୍ୟୁତ, ମହିଳା ଶିଶୁ ବିକାଶ ସବୁକିଛି ଯୋଜନା ଅପହଞ୍ଚ ହୋଇରହିଛି ।
ଏହା ମଧ୍ୟ ପଢନ୍ତୁ: ବିଦ୍ୟାଳୟ ନାହିଁ ତ ଭୋଟ ନାହିଁ, ନାରା ଦେଇ ଭୋଟ ବର୍ଜନ କରିଲେ ଗ୍ରାମବାସୀ
ଏ ସମ୍ପର୍କରେ ଦୀର୍ଘ ବର୍ଷ ହେଲା ଅଞ୍ଚଳବାସୀ ଅଭିଯୋଗ ପରେ ଗତ ଦୁଇ ମାସ ମଧ୍ୟରେ ଅନେକ ପ୍ରଶାସନିକ ଅଧିକାରୀ ଏପରିକି ଖୋଦ ଜିଲ୍ଲାପାଳ ଓ ଏସପି ମାତାଗାଡୁ ଗାଁରେ ପହଞ୍ଚି ଲୋକଙ୍କ ଦୁଃଖ ଦୁର୍ଦ୍ଦଶା ନିଜ ଆଖିରେ ଦେଖିବା ସହ ବିଭିନ୍ନ ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେଇଥିଲେ । ହେଲେ ପ୍ରତିଶ୍ରୁତି କେବଳ ପ୍ରତିଶ୍ରୁତିରେ ରହିଯାଇଛି । ସୋମବାର ମାତାଗାଡୁ ଅଞ୍ଚଳବାସୀ ଭୋଟ ବର୍ଜନ କରିଥିଲେ । ଯାହା ପରେ ପୋଲିଂ ପାର୍ଟି ସେମାନଙ୍କୁ ବୁଝାଇବାକୁ ଚେଷ୍ଟା କରି ବିଫଳ ହେବାପରେ ପୋଲିଂ ପାର୍ଟି ଘାଟି ପାହାଡ ଓହ୍ଲାଇ ଫେରି ଆସିଥିଲେ ।
ବୌଦ୍ଧ, ଇଟିଭି ଭାରତ
