ଭୁବନେଶ୍ବର: ଉତ୍କଳ ଦିବସର ଉପଲକ୍ଷେ ଶ୍ରୋତାର୍ପିତ ହୋଇଯାଇଛି “ଭାଷା ସଂଗୀତ”। ଚଳିତଥର ଉତ୍କଳ ଦିବସ ଅବସରରରେ ଭାଷା ପ୍ରୀତିକୁ ନେଇ “ଭାଷା ସଂଗୀତ”ର ଶ୍ରୋତାର୍ପଣ ଉତ୍ସବ ଜୟଦେବ ଭବନ ଠାରେ ଅନୁଷ୍ଠିତ ହୋଇଯାଇଛି । ଏହି ଅବସରରେ କଣ୍ଠଶିଳ୍ପୀ ପ୍ରଣବ ପଟ୍ଟନାୟକ, ଗୀତିକାର ଦେବଦାସ ଛୋଟରାୟ, ସମ୍ବାଦର ସମ୍ପାଦକ ତନୟା ପଟ୍ଟନାୟକ ଯୋଗ ଦେଇ ଏହି ଭାଷାଭିତ୍ତିକ ନିଚ୍ଛକ ଓଡ଼ିଆ ଗୀତର ଲୋକାର୍ପଣ କରିଛନ୍ତି । ଆଉ ପ୍ରତିଟି ଓଡ଼ିଆଙ୍କୁ ଭାଷା ସଂରକ୍ଷଣ ଓ ସୁରକ୍ଷା କରିବା ପାଇଁ ଆଗାମୀ ପିଢିଙ୍କୁ ଏହି ସଂଗୀତ ମାଧ୍ୟମରେ ଜାଗୃତ କରିଛନ୍ତି । ପ୍ରତି ଓଡ଼ିଆଙ୍କ ଭାବାବେଗ ଓ ଭାଷା ପ୍ରତି ଥିବା ଭଲପାଇବା ସମ୍ମାନକୁ ନେଇ ଏହି ଗୀତଟି ପ୍ରସ୍ତୁତ ହୋଇଥିବା ବେଳେ ପ୍ରତିଟି ଓଡ଼ିଆ ପ୍ରେମୀଙ୍କ ହୃଦୟ ଛୁଇଁବ ବୋଲି କହିଛନ୍ତି ଲେଖକ ।
ତେବେ ଏ ଗୀତର ପରିକଳ୍ପନା ଓ ରଚନା ଜଣାଶୁଣା ଲେଖକ ଶୁଭ୍ରାଂଶୁ ପଣ୍ଡା କରିଛନ୍ତି । ସେହିପରି ସଂଗୀତ ନିର୍ଦ୍ଦେଶନା ଓ କଣ୍ଠଦାନ କରିଛନ୍ତି ଅଭିଜିତ ମିଶ୍ର । ଓଡ଼ିଆ ମିଡିଆ ପ୍ରାଇଭେଟ ଲିମିଟେଡ ଦ୍ବାରା ପ୍ରସ୍ତୁତ ଏ ସଂଗୀତରେ ଓଡ଼ିଆ ଭାଷାର ମହିମାମଣ୍ଡନ ଓ ଓଡ଼ିଆ ଭାଷାର ଅସ୍ମିତା ସାଙ୍ଗକୁ ଓଡ଼ିଶାର କଳା, ସଂସ୍କୃତ, ପରମ୍ପରା ଓ ଐତିହ୍ୟ ବାବଦରେ ବର୍ଣ୍ଣନା ରହିଛି । ଓଡ଼ିଆ ଭାଷାର ଉତ୍ପତ୍ତି, ବିବର୍ତ୍ତନ, ଏହାର ସହସ୍ର ବର୍ଷରୁ ଦୀର୍ଘ ଇତିହାସ, ଭାଷାର କ୍ରମବିକାଶ, ସାହିତ୍ୟ, ସଂକଟ, ଉନବିଂଶ ଶତାବ୍ଦୀର ଭାଷା ଆନ୍ଦୋଳନ, ପ୍ରଥମ ଭାଷାଭିତ୍ତିକ ରାଜ୍ୟଗଠନ ଓ ଶାସ୍ତ୍ରୀୟ ମାନ୍ୟତା ପ୍ରାପ୍ତି ଯାଏଁ ନାନାଦି ବିଭବ ଏ ଗୀତରେ ଖଞ୍ଜାଯାଇଛି ।
ଏନେଇ କବି ଓ ଗୀତିକାର ଦେବଦାସ ଛୋଟରାୟ କହିଛନ୍ତି, 'ଭାଷା ଗୋଟିଏ ପରିବହନର ମାଧ୍ୟମ, ସେହିପରି ସାହିତ୍ୟ ବି ଗୋଟେ ପରିବହନର ମାଧ୍ୟମ । ଆଉ ଗୀତ ବା ସଂଗୀତ ସବୁଠୁ ବଡ଼ ପରିବହନର ମାଧ୍ୟମ ଅଟେ । ସଂଗୀତର ଧାର ଆଉ ଦୂରତା ବହୁତ ଅଧିକ । ଆମ ଓଡ଼ିଆ ଗୀତ ବି ସୁଦୂର ଆର୍ଜେଣ୍ଟିନାରେ ବି ଶୁଭାଯାଏ । ଅନ୍ୟ ଭାଷା ଶିଖ କିନ୍ତୁ ଓଡ଼ିଆ ଭାଷା ଭୁଲି ଯାଅନାହିଁ । ନିଜକୁ ଓଡ଼ିଆ ବୋଲି ଯେମିତି ଗର୍ବିତ ଅନୁଭବ କରୁଛ । ସେହିପରି ଓଡ଼ିଆ ସାହିତ୍ୟ, ସଂଗୀତକୁ ନେଇ ସବୁବେଳେ ଗର୍ବିତ ଅନୁଭବ କରନ୍ତୁ ।'
