କେନ୍ଦୁଝର: ଦୁଷ୍କର୍ମକାରୀକୁ ଜେଲଦଣ୍ଡ । ଆଜି(ଶୁକ୍ରବାର) ନାବାଳିକାକୁ ଅପହରଣ ଓ ଦୁଷ୍କର୍ମ ଏକ ମାମଲାର ଶୁଣାଣି କରି କେନ୍ଦୁଝର ଫାଷ୍ଟଟ୍ରାକ କୋର୍ଟ ଅଭିଯୁକ୍ତକୁ 20 ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି । ଗତ 2020 ମସିହାରେ ଘଟିଥିଲା ଏହି ଅପହରଣ ଦୁଷ୍କର୍ମ ଘଟଣା । ଯାହାର ଆଜି ରାୟ ପ୍ରକାଶ ପାଇଛି ।
ଘଟଣା ସମ୍ପର୍କରେ...
ଗତ 2020 ମସିହା, ମେ’ ମାସ 31 ତାରିଖରେ କେନ୍ଦୁଝର ଚାଇଲ୍ଡ ଲାଇନ ଟିମକୁ ଜଣେ ନାବାଳିକାକୁ ଅପହରଣ କରିନେଇ ଦୁଷ୍କର୍ମ କରାଯାଇଥିବା ଖବର ଆସିଥିଲା । ବିଦେଶିୟା ପ୍ରଧାନ ନାମକ ବ୍ୟକ୍ତି ଏହା କରିଥିବା ଖବର ପାଇଥିଲେ ଚାଇଲ୍ଡ ଲାଇନ ଟିମର ଶୁକାନ୍ତି ପାତ୍ର । ଏନେଇ ସେ ଘଟଣା ସ୍ଥଳରେ ପହଞ୍ଚି ନାବାଳିକାକୁ ଉଦ୍ଧାର କରିବା ସହ ସଦର ଥାନାରେ ଏତଲା ଦେଇଥିଲେ । ସଦର ପୋଲିସ ଏହି ଏତଲା ଆଧାରରେ ବିଦେଶିୟା ପ୍ରଧାନକୁ ଅପହରଣ ଦୁଷ୍କର୍ମ ଓ ଶିଶୁ ବିବାହ ଆଇନ ଅନୁସାରେ ଗିରଫ କରି କୋର୍ଟଚାଲାଣ କରିଥିଲା । ଆଜି ମାମଲାର ଶୁଣାଣି କରିଛନ୍ତି ବିଚାରପତି ବିଜୟ କୁମାର ମିଶ୍ର ।
ଦୋଷୀକୁ 20 ବର୍ଷ ଜେଲ ଦଣ୍ଡାଦେଶ ଶୁଣାଇଲେ କୋର୍ଟ:
ଆଜି(ଶୁକ୍ରବାର) ୧୮ ଜଣ ସାକ୍ଷ୍ୟ ବୟାନକୁ ଆଧାର କରି କେନ୍ଦୁଝର ଫାଷ୍ଟଟ୍ରାକ କୋର୍ଟର ବିଚାରପତି ବିଜୟ କୁମାର ମିଶ୍ର ବିଦେଶିୟା ପ୍ରଧାନ ଦୋଷୀ ସାବ୍ୟସ୍ତ କରି ଅଭିଯୁକ୍ତକୁ 20 ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି । ଏହା ସହ ପୀଡ଼ିତାକୁ ପାଞ୍ଚ ଲକ୍ଷ ଟଙ୍କାର ଅନୁକମ୍ପା ମୂଳକ ରାଶି ପ୍ରଦାନ କରିବା ନିମନ୍ତେ ଲିଗାଲଏଡକୁ ସୁପାରିସ କରିଛନ୍ତି । ଉକ୍ତ କେସକୁ ସରକାରଙ୍କ ପକ୍ଷରୁ ସ୍ପେଶାଲ ପିପି ଜ୍ଞାନେନ୍ଦ୍ର ନାଥ ଜେନା ପରିଚାଳନା କରିଥିଲେ ।
ଗଣଦୁଷ୍କର୍ମର ରାୟ:
ସେହିପରି ଗତକାଲି(ବୁଧବାର) କଳାହାଣ୍ଡିରେ ଘନା ଜଙ୍ଗଲରେ ୫ବର୍ଷ ତଳେ ହୋଇଥିବା ବହୁଚର୍ଚ୍ଚିତ ଗଣଦୁଷ୍କର୍ମ ଘଟଣାର ରାୟ ପ୍ରକାଶ ପାଇଛି । ଏହି ମାମଲାରେ ଧର୍ମଗଡ଼ ଅତିରିକ୍ତ ଜିଲ୍ଲା ଦୌରା ଜଜ୍ ସୁରେଶ ଚନ୍ଦ୍ର ପ୍ରଧାନ ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତିକରି ୬ ଅଭିଯୁକ୍ତଙ୍କୁ ଆଜୀବନ ଜେଲ ଦଣ୍ଡାଦେଶ ଶୁଣାଇଛନ୍ତି । ସେମାନେ ହେଲେ ପର୍ଲା ଗ୍ରାମର ଲଳିନ୍ଦ୍ର ଶବର, ବକ୍ସିତୁଳସୀପାଲି ଗ୍ରାମର ଲାବଣ୍ୟ ଛତ୍ରିଆ, ଅନିରୁଦ୍ଧ ଛତ୍ରିଆ, ପ୍ରକାଶ ଓରଫ ଲୁକୁ ନାଏକ, ଶାନ୍ତ ନାଏକ ଓ ଅମିତ ନାଏକ । ଅନ୍ୟପକ୍ଷେ ସେତେବେଳେ ଭିଡିଓ ଭାଇରାଲ ପାଇଁ ଗିରଫ ହୋଇଥିବା ଅନ୍ୟ ୩ଜଣଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି କୋର୍ଟ ।
ଇଟିଭି ଭାରତ, କେନ୍ଦୁଝର
