ଭୁବନେଶ୍ବର: ରାଜ୍ୟରେ 450 ଟଙ୍କା ହେଲା ସର୍ବନିମ୍ନ ମଜୁରୀ । ଆଜି ବସିଥିବା କ୍ୟାବିନେଟ ବୈଠକରେ ମୋହନ ସରକାର ଏହି ନିଷ୍ପତ୍ତି ଗ୍ରହଣ କରିଛନ୍ତି । ପୂର୍ବରୁ ରାଜ୍ୟରେ ସର୍ବନିମ୍ନ ମଜୁରୀ 352 ଟଙ୍କା ଥିବା ବେଳେ ଆଜି ଏହାକୁ ବୃଦ୍ଧି କରାଯାଉଛି । ଏହା ସହ ଅନ୍ୟ 5ଟି ଗୁରୁତ୍ବପୂର୍ଣ୍ଣ ପ୍ରସ୍ତାବରେ ମଧ୍ୟ ମୋହର ଲାଗିଛି । ଏହା ମଧ୍ୟରେ ଓଡିଆ ଅସ୍ମିତା ପାଇଁ କର୍ପସ ଫଣ୍ଡ ଗଠନ, ଐତିହାସିକ ବାଲିଯାତ୍ରାକୁ ଅନ୍ତର୍ଜାତୀୟ ମହୋତ୍ସବ ମାନ୍ୟତା, ଶିକ୍ଷକ ନିଯୁକ୍ତି ପରି 4ଟି ପ୍ରମୁଖ ପ୍ରସ୍ତାବରେ ମୋହର ଲାଗିଛି । ପୂର୍ବରୁ ପ୍ରଥମ କ୍ୟାବିନେଟ ବୈଠକରେ ଶ୍ରୀମନ୍ଦିର ସହ ଜଡିତ ପ୍ରସ୍ତାବ ସହ 4 ପ୍ରସ୍ତାବକୁ ଅନୁମୋଦନ ଦେଇଥିଲା ମୋହନ ସରକାର ।
ଆଜି କ୍ୟାବିନେଟ ବୈଠକ ଶେଷ ହେବା ପରେ ପ୍ରେସମିଟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ, ବିଜେପି ସରକାରର ଦ୍ଵିତୀୟ କ୍ୟାବିନେଟ ବୈଠକରେ 5ଟି ପ୍ରସ୍ତାବରେ ମୋହର ବାଜିଛି । ଶ୍ରମ, ଓଡ଼ିଆ ଭାଷା ସାହିତ୍ୟ ଏବଂ ସଂସ୍କୃତି, ଗଣଶିକ୍ଷା, ଜଳ ସମ୍ପଦ, କୃଷି ବିଭାଗର ଗୋଟିଏ ଗୋଟିଏ ପ୍ରସ୍ତାବରେ ମୋହର ଲଗେଇଛି କ୍ୟାବିନେଟ ।
1- ରାଜ୍ୟରେ ଶ୍ରମିକଙ୍କ ସର୍ବନିମ୍ନ ମଜୁରୀ ସଂଶୋଧନ ହୋଇଛି । ଶ୍ରମ ବିଭାଗର ଏହି ପ୍ରସ୍ତାବକୁ କ୍ୟାବିନେଟ ମୋହର ମାରିଛି । ରାଜ୍ୟରେ 4 ପ୍ରକାର ଅଣକୁଶଳୀ, ଅର୍ଦ୍ଧକୁଶଳୀ, କୁଶଳୀ ଓ ଅତି କୁଶଳୀ ଶ୍ରମିକ ବ୍ୟବସ୍ଥା ରହିଛି । ସବୁ ବର୍ଗର ଶ୍ରମିକଙ୍କର ଦୈନିକ ମଜୁରୀ ବୃଦ୍ଧି ହୋଇଛି । ଗତ ଅକ୍ଟୋବର ମାସରେ ପୂର୍ବ ସରକାର ଶ୍ରମିକଙ୍କ ଦୈନିକ ମଜୁରୀରେ 7 ଟଙ୍କା ବୃଦ୍ଧି କରିଥିଲେ । ଚଳିତ ଥର ଶ୍ରମିକର ଦୈନିକ ମଜୁରୀ 352ରୁ 450 ଟଙ୍କାକୁ ବୃଦ୍ଧି ପାଇଛି । ଅର୍ଦ୍ଧକୁଶଳୀଙ୍କ ଦୈନିକ ମଜୁରୀ 392ରୁ 500 ଟଙ୍କା ପର୍ଯ୍ୟନ୍ତ ବୃଦ୍ଧି ହୋଇଛି । କୁଶଳୀ ଶ୍ରମିକଙ୍କ ଦୈନିକ ମଜୁରୀ 442ରୁ 550କୁ ବୃଦ୍ଧି ହୋଇଛି । ସେହିପରି ଉଚ୍ଚ କୁଶଳୀ ଶ୍ରମିକଙ୍କ ମଜୁରୀ 502ରୁ 600କୁ ବୃଦ୍ଧି ପାଇଛି ।
2-ଓଡ଼ିଆ ଭାଷା ସାହିତ୍ୟ ସଂସ୍କୁତି ବିଭାଗର ଏକ ପ୍ରସ୍ତାବକୁ ମୋହର ମାରିଛି କ୍ୟାବିନେଟ । ଓଡ଼ିଆ ଅସ୍ମିତାକୁ ଉଜ୍ଜୀବିତ ପାଇଁ ଏହାର ପ୍ରଚାର ପ୍ରସାର ଆବଶ୍ୟକ । ଏଥି ପାଇଁ କର୍ପସ ଫଣ୍ଡର ବ୍ୟବସ୍ଥା କରାଯାଇଛି । 200 କୋଟି ଟଙ୍କା ବ୍ୟବସ୍ଥା କରାଯାଇଛି । ଓଡ଼ିଆ ଅସ୍ମିତା ଭବନ ନିର୍ମାଣ, ତାଳ ପାତ୍ର ପୋଥି ସଂଗ୍ରହ, କଳାକାର ଗୌରବ ନିଦ୍ଦି ଯୋଜନା, ଜାତୀୟ ବିଶ୍ୱ ବିଦ୍ୟାଳୟରେ ଓଡ଼ିଆ ଚେୟାର ପ୍ରତିଷ୍ଠା ପାଇଁ ସ୍ଥିର କରାଯାଇଛି । ଗାଇଡଲାଇନ ପାଇଁ ବିଭାଗକୁ ନିର୍ଦ୍ଦେଶ ଦିଆଯାଇଛି । ଏକ୍ସପଟଙ୍କୁ ନେଇ କମିଟି ଗଠନ ହେବ ।
3- ଗଣଶିକ୍ଷା ବିଭାଗ ପକ୍ଷରୁ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟରେ 20 ହଜାର ଶିକ୍ଷକ ନିଯୁକ୍ତି ପାଇଁ ବିଜ୍ଞପ୍ତି ପ୍ରକାଶ ହୋଇଥିଲା । ଏ ନେଇ ଉଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଥିଲେ । ଓଡ଼ିଶା ବିଦ୍ୟାଳୟ 18 ହଜାର 788 ପ୍ରାଥୀଙ୍କ ଚୟନ ଓ ନିଯୁକ୍ତି ପାଇଁ ନିର୍ଦ୍ଦେଶ ଦିଆଯାଇଛି ।
ଏହା ମଧ୍ୟ ପଢନ୍ତୁ:- ରାଜ୍ୟରେ ଶିଳ୍ପ ଅନୁକୂଳ ପରିବେଶ ସୃଷ୍ଟି କରିବା ପାଇଁ ମୁଖ୍ୟମନ୍ତ୍ରୀଙ୍କ ପରାମର୍ଶ - CM Mohan Majhi Review Meeting
4- ଜଳସମ୍ପଦ ବିଭାଗ ଅନ୍ତର୍ଗତ ଅଚଳ ହୋଇପଡିଥିବା 2 ହଜାର 65ଟି ଉଠା ଜଳସେଚନ ପ୍ରକଳ୍ପକୁ ସଚଳ କରାଯିବ । ଆସନ୍ତା 5 ବର୍ଷରେ 1 ହଜାର 44 କୋଟି 84 ଲକ୍ଷ ବିନିଯୋଗ ହେବ ।
5- ପିଏମ କିଷାନରୁ ବାଦ ପଡ଼ିଥିବା ହିତାଧିକାରୀଙ୍କୁ ସାମିଲ କରାଯିବ । ମାର୍ଗଦର୍ଶିକା ଅନୁଯାଇ ସେମାନେ ସାମିଲ ହେବେ । ସମସ୍ତ କୃଷକ ପାରିବାର ହେବେ ପିଏମ କିଷାନରେ ସାମିଲ । କ୍ଷୁଦ୍ର, ମଧ୍ୟମ ଓ ବଡ଼ ଚାଷୀଙ୍କୁ ସାମିଲ କରାଯିବ । ଉଭୟ ଗ୍ରାମାଞ୍ଚଳ ଓ ସହରାଞ୍ଚଳରେ ରହୁଥିବା ଯୋଗ୍ୟ ବିବେଚିତ କୃଷକ ପିଏମ କିଷାନରେ ସାମିଲ ହେବେ । 5 ଲକ୍ଷରୁ 6 ଲକ୍ଷ ଚାଷୀ ଯୋଗ୍ୟ ବିବେଚିତ ଥିଲେ । କାଳିଆ ଯୋଜନା ତାଲିକା ଅନୁଯାୟୀ ଚାଷୀ ବଞ୍ଚିତ ହେଉଥିଲେ ତାହା ଉଠିଲା । 6 ଲକ୍ଷ ଚାଷୀ ଏଥିରେ ଅନ୍ତର୍ଭୁକ୍ତ ହେବେ । ଆଗାମୀ କିସ୍ତି ପାଇବେ ।
ଇଟିଭି ଭାରତ, ଭୁବନେଶ୍ବର
