କେନ୍ଦ୍ରାପଡ଼ା: ରୋଜଗାର ଆଶାରେ ସୁଦୂର ଥାଇଲାଣ୍ଡ ଯାଇ ଫସିଛନ୍ତି ଓଡ଼ିଆ ପୁଅ । ସୂଚନା ଅନୁସାରେ, କେନ୍ଦ୍ରାପଡ଼ା ଜିଲ୍ଲା ରାଜକନିକା ଥାନାର ବିଭିନ୍ନ ଗାଁରୁ କୁଶଳୀ ଶ୍ରମିକ ଏବଂ କାରିଗରମାନେ ଆଙ୍ଗଥଙ୍ଗ ଅଞ୍ଚଳର 'ସାନଭି ଭିନିୟର ପ୍ଲାଇବୋର୍ଡ' କମ୍ପାନୀକୁ କାମ କରିବାକୁ ଯାଇଥିଲେ । ସେମାନଙ୍କ ମଧ୍ୟରେ ରହିଥିଲେ ସିକୁଡି ଗାଁର ଦୁଇ ଭାଇ ଅମୀୟ ନାୟକ ଓ ଅଶୋକ ନାୟକ, ଶିଳପୋଖରୀ ଗାଁର ଦୀନବନ୍ଧୁ ପଲାଇଙ୍କ ପୁଅ ସଞ୍ଜୟ ପଲାଇ, ସେହି ଗାଁର ଶତ୍ରୁଘ୍ନ ପଲାଇଙ୍କ ପୁଅ ସଞ୍ଜୟ ପଳାଇ ।
ସେହିପରି ରାଜନଗର ବ୍ଲକର ପଞ୍ଚୁପଲ୍ଲୀ ଗାଁର ସନାତନ ରାଉତ, ଜଗନ୍ନାଥ ରାଉତ ଓ ପଟ୍ଟାମୁଣ୍ଡାଇ ବ୍ଲକର ଅଶୋକ ସେଠୀ ମଧ୍ୟ ଥିବା ଜଣାପଡ଼ିଛି । ଗତ ୬ ମାସ ତଳେ କମ୍ପାନୀର ମ୍ୟାନେଜର ଦେବେନ୍ଦ୍ର ସିଂଙ୍କ ସହିତ ୭ ଜଣ ଓଡ଼ିଆ ଶ୍ରମିକ ଓ ୨ ଜଣ ବିହାର ରାଜ୍ୟର ଶ୍ରମିକ ଯାଇଥିଲେ । ଗଲାବେଳେ ଆବଶ୍ୟକୀୟ ଅର୍ଥ ପୈଠ କରିଥିଲେ ସୁଦ୍ଧା ଭିସା କନଫର୍ମ ହୋଇନଥିବା ଅଭିଯୋଗ ହୋଇଛି । ଫଳରେ ସେମାନେ ସେଠାକୁ ଟୁରିଷ୍ଟ ଭିସାରେ ଯାଇ ପହଞ୍ଚିଥିଲେ । ସେଠାରେ ସେମାନଙ୍କୁ ଦରମା ପ୍ରଦାନ କରାଯାଉନଥିବାବେଳେ ଭିସା କନଫର୍ମ ହୋଇନଥିବାରୁ ଫସିରହିଥିବା କହିଛନ୍ତି ପ୍ରବାସୀ ଶ୍ରମିକ । ଏନେଇ ସେମାନେ ଭିଡିଓ ଜାରି କରିବା ସହ ଉଦ୍ଧାର କରିବା ପାଇଁ ସରକାରଙ୍କୁ ନିବେଦନ କରିଛନ୍ତି ।
ଅଭିଯୋଗ ମୁତାବକ, "୩ ମାସର ଟୁରିଷ୍ଟ ଭିସାରେ ସେମାନଙ୍କୁ ଅଣାଯାଇଥିଲା । କୁହାଯାଇଥିଲା ଯେ, ପହଞ୍ଚିଲା ପରେ ଭିସା ଅବଧି ବୃଦ୍ଧି କରାଯାଇ ବାର୍ଷିକ କରି ଦିଆଯିବ । କାମ କରିବା ଆଗରୁ ଯେତିକି ଟଙ୍କା ପ୍ରାପ୍ୟ କଥା ହୋଇଥିଲା ସେତିକି ନଦେଇ ଖୁବ କମ ଟଙ୍କା ଦିଆଗଲା । ସମୟ ଅନୁସାରେ ବି ଦରମା ଦିଆଗଲା ନାହିଁ । ଅନ୍ୟପଟେ ଟୁରିଷ୍ଟ ଭିସାର ଅବଧି ସରିଗଲା ପରେ ଥାଇଲାଣ୍ଡ ପୋଲିସ ଖୋଜୁଥିବାରୁ ସେମାନଙ୍କୁ ଜଙ୍ଗଲରେ ଲୁଚିବାକୁ ପଡୁଥିବା କହିଛନ୍ତି । କମ୍ପାନୀ କର୍ତ୍ତୃପକ୍ଷ କିଛି ଶୁଣୁନଥିବାରୁ ଦୁଇ ମାସ ହେଲା ଭୋକ ଉପାସରେ ରହିବାକୁ ପଡୁଛି । ଏପରିକି କାମ ବନ୍ଦ କଲେ ଜେଲ ପଠାଇ ଦେବାକୁ କମ୍ପାନୀ ମାଲିକ ଧମକ ଦେଉଛନ୍ତି ।" ସେପଟେ ସେମାନଙ୍କ ଫେରିବା ବାଟକୁ ଚାହିଁ ରହିଛନ୍ତି ପରିବାର । ପରିବାର ପକ୍ଷରୁ ରାଜକନିକା ଥାନାରେ ଏତଲା ଦିଆଯାଇଛି। ଏନେଇ କେନ୍ଦ୍ରାପଡା ଜିଲ୍ଲାପାଳଙ୍କୁ ଅବଗତ କରାଯିବା ପରେ ସେ ଶ୍ରମ ବିଭାଗ ସହ କଥା ହୋଇ ଶ୍ରମିକମାନଙ୍କୁ ଫେରାଇ ଆଣିବା ପାଇଁ ପ୍ରୟାସ କରିବେ ବୋଲି କହିଛନ୍ତି।
ଇଟିଭି ଭାରତ, କେନ୍ଦ୍ରାପଡ଼ା
