ପରକୀୟା ପ୍ରୀତିର ପ୍ରତିଶୋଧ, ପତ୍ନୀର ପ୍ରେମିକକୁ ରାସ୍ତାରୁ ହଟାଇ ଦେଲା ସ୍ବାମୀ

ସ୍ତ୍ରୀକୁ ଅନ୍ୟ ପୁରୁଷ ସହ ଦେଖି ସହିପାରିଲାନି ସ୍ବାମୀ । ପିଟି ପିଟି ଯୁବକର ଜୀବନ ନେଲା । ମୟୂରଭଞ୍ଜ ହତ୍ୟାକାଣ୍ଡର ପର୍ଦ୍ଦାଫାସ କଲା ପୋଲିସ ।

ରାଇରଙ୍ଗପୁର: ସହିପାରିଲେନି ପତ୍ନୀର ପରକୀୟା ପ୍ରୀତି । ପ୍ରତିଶୋଧ ନିଆଁରେ ଜଳି ସନ୍ଦେହରେ ଯୁବକଙ୍କୁ ରାସ୍ତାରୁ ହଟାଇ ଦେଲେ ସ୍ବାମୀ । ଗତ ସୋମବାର ମୟୂରଭଞ୍ଜ ଜିଲ୍ଲା ତିରିଂ ଥାନା ଧୋବାଧୋବଣୀ ଗାଁରୁ ଯୁବକଙ୍କ ମୃତଦେହ ମିଳିବା ଘଟଣା ଉପରୁ ପରଦା ହଟାଇଛି ପୋଲିସ । ପରକୀୟା ପ୍ରୀତି ସନ୍ଦେହରୁ ଯୁବକଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା । ଅଭିଯୁକ୍ତକୁ ଝାଡ଼ଖଣ୍ଡରୁ ଗିରଫ କଲା ପୋଲିସ ।

କଣ ଥିଲା ପୂରା ମାମଲା:

ଗତ ସୋମବାର ମୟୂରଭଞ୍ଜ ଜିଲ୍ଲା ତିରିଂ ଥାନା ଅନ୍ତର୍ଗତ ଧୋବାଧୋବଣୀ ଗାଁର ମାଞ୍ଜୁରା ଶୁଣ୍ଡିଙ୍କ ରକ୍ତାକ୍ତ ମୃତଦେହ ପଡିଥିଲା । ସ୍ବାମୀଙ୍କୁ ରକ୍ତାକ୍ତ ଅବସ୍ଥା ଦେଖି ପତ୍ନୀ ମାଳତୀ ଶୁଣ୍ଡି ପ୍ରଥମେ ତିରିଂ ବ୍ଲକ ଚେୟାରମ୍ୟାନକୁ ଖବର ଦେଇ ତାଙ୍କ ସହାୟତାରେ ତୁରନ୍ତ ରାଇରଙ୍ଗପୁର ମେଡିକାଲ ଚିକିତ୍ସା ପାଇଁ ଆଣିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ତିରିଂ ଥାନାରେ ଏତଲା ଦେଇଥିଲେ ପତ୍ନୀ । ଏତଲାକୁ ଆଧାର କରି ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା ପୋଲିସ ।

ଝାଡ଼ଖଣ୍ଡରୁ ଧରାପଡିଲା ଅଭିଯୁକ୍ତ:

ତେବେ ମାଳତୀଙ୍କ ଅଭିଯୋଗକୁ ଗୁରୁତ୍ବର ସହ ନେଇ ତିରିଂ ପୋଲିସ ତଦନ୍ତ ଜାରି ରଖିଥିଲା । ତଦନ୍ତରେ ଜଣାପଡିଥିଲା ଗାଁର ଦୁଲମୁ ହେମ୍ବ୍ରମ ଫେରାର ରହିଛି । ଟ୍ରାକିଂ କରିବା ପରେ ସେ ଝାଡ଼ଖଣ୍ଡ ପଳାଇଥିବା ପୋଲିସ ସୂଚନା ପାଇଥିଲା । ଏକ ଟିମ୍‌ ଝାଡ଼ଖଣ୍ଡରୁ ଅଭିଯୁକ୍ତକୁ ଧରିଥିଲା ପୋଲିସ ।

ଦୋଷ ସ୍ବୀକାର କଲା ଦୁଲମୁ:

ପୋଲିସ ଆଗରେ ଦୋଷ ସ୍ବୀକାର କରିଛି ଅଭିଯୁକ୍ତ ଦୁଲମୁ । ତାର ପତ୍ନୀ ସହ ମୃତ ମାଞ୍ଜୁରାଙ୍କ ଅନୈତିକ ସମ୍ପର୍କ ଥିବା ସନ୍ଦେହ କରୁଥିଲା ଦୁଲମୁ । ପ୍ରତିଶୋଧ ପରାୟଣ ହୋଇ ଏକ କାଠ ଫାଳିଆରେ ମାଞ୍ଜୁରାଙ୍କୁ ନିର୍ମମ ଭାବେ ହତ୍ୟା କରିଥିଲା । ତେବେ ଗିରଫ ପରେ ଅଭିଯୁକ୍ତକୁ କୋର୍ଟ ଚାଲାଣ କରିଛି ପୋଲିସ । ଏଥିସହ ହତ୍ୟାକାଣ୍ଡରେ ବ୍ୟବହାର ହୋଇଥିବା କାଠ ଫାଳିଆକୁ ଜବତ କରିଛି ।

ସହିପାରିଲେନି ପତ୍ନୀର ପରକୀୟା ପ୍ରୀତି:

ରାଇରଙ୍ଗପୁର ଏଏସପି ନାରାୟଣ ନାୟକ କହିଛନ୍ତି, ‘ତିରିଂ ଥାନା ଅଞ୍ଚଳରେ ଧୋବାଧୋବଣୀ ଗାଁର ମାଳତୀ ଶୁଣ୍ଡି ନାମକ ଜଣେ ମହିଳା ଅଭିଯୋଗ କଲେ, ତାଙ୍କ ସ୍ବାମୀ ମାଞ୍ଜୁରା ଏକ ଟେଣ୍ଟ ହାଉସରେ କାମ କରନ୍ତି । ସେ ଘରକୁ ଫେରିନଥିଲେ । ପରେ ତାଙ୍କୁ ଖବର ମିଳିଥିଲା । ତାଙ୍କ ରକ୍ତାକ୍ତ ଶରୀର ଏକ ସ୍ଥାନରେ ପଡିଛି । ଏହାପରେ ସେ ସ୍ଥାନୀୟ ବ୍ଲକ ଚେୟାରମ୍ୟାନଙ୍କୁ ଫୋନ ଯୋଗେ ଜଣାଇଥିଲେ । ସେ ପହଞ୍ଚିବା ପରେ ମାଞ୍ଜୁରାଙ୍କୁ ରାଇରଙ୍ଗପୁର ହସ୍ପିଟାଲ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହା ପରେ ସେ ତିରିଂ ଥାନାରେ ଲିଖିତ ଆକାରରେ ଜଣାଇଥିଲେ ଯାହାର କେସ ନଂ ହେଉଛି, 178, ଦଫା 103 BNS । ସେହି ଗାଁର ଦୁଲମୁ ହେମ୍ବ୍ରମ ସନ୍ଦେହ କରୁଥିଲା ତାଙ୍କ ପତ୍ନୀଙ୍କ ସହ ମୃତକଙ୍କ କୌଣସି ଅନୈତିକ ସମ୍ପର୍କ ଅଛି । ପ୍ରତିଶୋଧ ପରାୟଣ ହୋଇ ତାଙ୍କୁ ମାରିବାକୁ ଯୋଜନା କରିଥିଲେ । ଘଟଣା ଦିନ ସନ୍ଧ୍ୟା ସମୟରେ ପତ୍ନୀ ଆଉ ମୃତ ମାଞ୍ଜୁରାଙ୍କୁ ଏକାଠି ଦେଖି ଉତ୍ୟକ୍ତ ହୋଇପଡିଥିଲେ । ତାଙ୍କୁ ପିଟି ପିଟି ହତ୍ୟା କରିଥିଲେ । ପୋଲିସ ଅଭିଯୁକ୍ତ ଦୁଲମୁକୁ ଗିରଫ କରିଛି । ସେ ତାଙ୍କ ଦୋଷ ସ୍ବୀକାର ମଧ୍ୟ କରିଛନ୍ତି । ହତ୍ୟାରେ ବ୍ୟବହୃତ କାଠ ଫାଳିଆ ବି ଜବତ କରାଯାଇଛି ।’

ଏହା ମଧ୍ୟ ପଢନ୍ତୁ:

ଇଟିଭି ଭାରତ, ରାଇରଙ୍ଗପୁର