ନିଆଳି: ବାଲିଗାଡି ଯୋଗୁଁ ରାସ୍ତା ସାରା ଖାଲ । ଫଳରେ ବିପଦଶଙ୍କୁଳ ଅବସ୍ଥାରେ ଯାତୟାତ କରୁଛନ୍ତି ଲୋକେ । ଝାରପଡାଠାରୁ ଖଲର୍ଦ୍ଦା ପର୍ଯ୍ୟନ୍ତ ରାସ୍ତାର ଅବସ୍ଥା ଶୋଚନୀୟ । ଯାହାକି ବର୍ଷା ଦିନେ ପୋଖରୀର ଭ୍ରମ ସୃଷ୍ଟି କରୁଛି ।
ଯାତାୟତ ସମସ୍ୟା:
ଯେଉଁ ଆଡେ ଚାହିଁଲେ ରାସ୍ତା ସାରା ଆଣ୍ଠୁଏ ଲେଖାଏଁ ଗାତ । ପୋଖରୀ ଭଳି ଦୃଶ୍ୟମାନ ହେଉଛି ରାସ୍ତା । ଆଉ ବର୍ଷା ହେଲେ ଖାଲରେ ପାଣି ଜମି ଯାଉଛି । ଫଳରେ ଦୁର୍ଘଟଣା ଘଟି ଜୀବନ ଯାଉଥିବାବେଳେ ଅନେକ ଲୋକେ ଆହତ ହେଉଛନ୍ତି । "ବେଆଇନ ବାଲିଗାଡି ଯୋଗୁଁ ରାସ୍ତା ଏଭଳି ସଂକୀର୍ଣ୍ଣ ହୋଇଛି" ବୋଲି ଅଭିଯୋଗ କରିଛନ୍ତି ସ୍ଥାନୀୟଲୋକେ । ମିଳିଥିବା ଅଭିଯୋଗ ଅନୁସାରେ, କଟକ ଜିଲ୍ଲା କଣ୍ଟାପଡ଼ା ବ୍ଲକ ଅଧୀନରେ ରହିଛି ଇଚ୍ଛାପୁରଠାରୁ ପ୍ରତାପ ନଗରୀ କେନାଲ ବନ୍ଧ ରାସ୍ତା । ଏହି ରାସ୍ତା କଟକ ଆର.ଆଣ୍ତ.ବି ବିଭାଗ ଅଧୀନରେ ରହିଛି । ଝାରପଡାଠାରୁ ଖଲର୍ଦ୍ଦା ପର୍ଯ୍ୟନ୍ତ ପାଖାପାଖି ୧୨ କିଲୋମିଟର ମିଟର ରାସ୍ତା ଖାଲଖମାରେ ପରିପୂର୍ଣ୍ଣ ଥିବା ଦେଖିବାକୁ ମିଳୁଛି ।
ବାଲିଗାଡି ବନ୍ଦ ପାଇଁ ଦାବି:
ସ୍ଥାନୀୟ ଅଞ୍ଚଳର ଅଶୋକ କୁମାର ସ୍ବାଇଁ କହିଛନ୍ତି," ଶହ ଶହ ବାଲିଗାଡି ଯିବା ଆସିବା ଯୋଗୁଁ ଝାରପଡ଼ା ଓ ଖଲର୍ଦ୍ଦା ରାସ୍ତାରେ ଆଣ୍ଠୁଏ ଆଣ୍ଠୁଏ ଗାଡ ହୋଇଛି । ଯାହାଫଳରେ ପିଲାମାନେ ସ୍କୁଲ ଓ ଟ୍ୟୁସନ ଯିବା ଆସିବାରେ ଅସୁବିଧା ହେଉଛି । ପ୍ରତିଦିନ ଦୁର୍ଘଟଣା ଘଟୁଛି । ସରକାର ଏ ଦିଗରେ ଦୃଷ୍ଟିଦେଇ ରାସ୍ତା ନିର୍ମାଣ ସହିତ ବାଲିଗାଡି ବନ୍ଦ କରନ୍ତୁ ।" ସେହିପରି ଆଉ ଜଣେ ସ୍ଥାନୀୟ ବାସିନ୍ଦା କୁସୁମା ପ୍ରଧାନ କହିଛନ୍ତି, "ଏକାଧିକ ବାଲିଗାଡି ଯିବା ଯୋଗୁଁ ରାସ୍ତା ମରଣଯନ୍ତା ପାଲଟିଛି । ଇଚ୍ଛାପୁରଠାରୁ ପ୍ରତାପ ନଗରୀ ପର୍ଯ୍ୟନ୍ତ ଏହି ରାସ୍ତା ଯାଇଛି । କଟକ ଭୁବନେଶ୍ଵରକୁ ଏହି ରାସ୍ତା ସଂଯୋଗ କରିଛି । ଖାଲଖମା ଯୋଗୁଁ ପ୍ରତିଦିନ ଦୁର୍ଘଟଣା ଘଟୁଛି । ଧନ ଜୀବନ କ୍ଷୟକ୍ଷତି ହେଉଛି । ରାସ୍ତା କାମ ତୁରନ୍ତ କରାଯାଉ ଏବଂ ବାଲିଗାଡି ବନ୍ଦ ହେଉ ।"
ରାସ୍ତା ମରାମତି ପ୍ରତିଶ୍ରୁତି:
ଝାରପଡ଼ାଠାରୁ ଖଲର୍ଦ୍ଦା ପର୍ଯ୍ୟନ୍ତ ରାସ୍ତାର ଅବସ୍ଥାକୁ ନେଇ ଆର୍.ଆଣ୍ତ.ବି ବିଭାଗ ସହକାରୀ ଯନ୍ତ୍ରୀ ମନୋଜ ମିଞ୍ଜ କରିଛନ୍ତି, "ରାସ୍ତାଟି ଏବେ ଆମ୍ଭକୁ ହସ୍ତାନ୍ତର କରାଯାଇଛି । ପୂର୍ବରୁ ଏହି ରାସ୍ତା ଖରାପ ଥିଲା, ଏଥିପାଇଁ ଟେଣ୍ଡର ହୋଇଛି । କାମ ସରିବା ପାଇଁ ସମୟ ଲାଗିବ । ଖାଲଖମାକୁ ମରାମତି କରାଯିବ ।"
ଇଟିଭି ଭାରତ, ନିଆଳି
