ସମ୍ବଲପୁର: ଓଡ଼ିଶାରେ ନିର୍ବାଚନୀ ତାତି ଦେଖିବାକୁ ମିଳିଥିବା ବେଳେ ବର୍ତ୍ତମାନ ରାଜ୍ୟକୁ ଛୁଟୁଛନ୍ତି ବହୁ କେନ୍ଦ୍ରୀୟ ନେତା । ବିଭିନ୍ନ ଦଳର କେନ୍ଦ୍ରୀୟ ତଥା ହେବିଓ୍ୱେଟ ନେତା ନିଜ ଦଳୀୟ ପ୍ରାର୍ଥୀଙ୍କ ପାଇଁ ଜୋରଦାର ପ୍ରଚାର କରୁଛନ୍ତି । ଏପରି ସମୟରେ ବର୍ତ୍ତମାନ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଓଡ଼ିଶା ଗସ୍ତରେ ଆସିଛନ୍ତି । ଆଜି ସେ ସମ୍ବଲପୁର ଗସ୍ତ କରି ପ୍ରଥମେ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା' ସମଲେଶ୍ୱରୀଙ୍କ ମନ୍ଦିରକୁ ଯାଇ ଦର୍ଶନ କରିବା ସହ ଆଶୀର୍ବାଦ ନେଇଛନ୍ତି । ଏହି ସମୟରେ ସେ ଓଡ଼ିଶାର ରାଜନୀତି ଉପରେ ଆଲୋକପାତ କରିବା ସହ ପାଣ୍ଡିଆନ ଉପରେ ଖୁବ ବର୍ଷିଛନ୍ତି । ପାଣ୍ଡିଆନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କ୍ୟାପଚର କରି ରଖିଥିବା କହିଛନ୍ତି ହିମନ୍ତ ବିଶ୍ୱଶର୍ମା ।
ସୂଚନା ଅନୁସାରେ, କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନଙ୍କ ସହ ଆସାମ ମୁଖ୍ୟମନ୍ତ୍ରୀ ସମ୍ୱଲପୁର ଗସ୍ତ କରିଥିବା ବେଳେ ସେ ଏଠାକାର ଅହମିୟା କବି ଲକ୍ଷ୍ମୀନାଥ ବେଜବରୁଆଙ୍କ ସାଧନାଗୃହ ବୁଲି ଦେଖିଥିଲେ । ଏହା ପରେ ସେ ସ୍ଥାନୀୟ ଗଣମାଧ୍ୟମଙ୍କୁ ପତିକ୍ରିୟା ଦେଇ ଏହି ସାଧନାଗୃହକୁ ସୁରକ୍ଷିତ ରଖିଥିବାରୁ ଏଥିପାଇଁ ସେ ଓଡ଼ିଶା ତଥା ସମ୍ବଲପୁରବାସୀଙ୍କୁ ଧନ୍ୟବାଦ ଦେଇଛନ୍ତି । ଏହାସହ ଆସାମ ଓ ଓଡ଼ିଶା ବାସୀଙ୍କ ଚାଲିଚଳଣି, ଖାଦ୍ୟପେୟ, ସଂସ୍କୃତି ଓ ପରମ୍ପରାରେ ଅନେକ ସାମଞ୍ଜସ୍ୟ ରହିଥିବା ସେ କହିଛନ୍ତି ।
ଏହା ପରେ ଓଡ଼ିଶାରେ ସାଧାରଣ ବିର୍ବାଚନ ଲାଗି ରହିଥିବା ବେଳେ ବର୍ତ୍ତମାନର ରାଜନୈତିକ ସମୀକରଣ ନେଇ ମଧ୍ୟ ପତିକ୍ରିୟା ରଖିଛନ୍ତି । ଏହି ଅବସରରେ ସେ କହିଛନ୍ତି ଯେ "ଏହି ନିର୍ବାଚନ ଓଡ଼ିଶାର ଅସ୍ମିତାର ନିର୍ବାଚନ ଅଟେ l ମୁଁ ବି ଗୋଟିଏ ପ୍ରଦେଶର ମୁଖ୍ୟମନ୍ତ୍ରୀ ଅଟେ l କିନ୍ତୁ ମୁଁ ତ ଏକାକୀ ଆସିଛି, ମୁଁ ଏକାକୀ କଥା ହୋଇପାରୁଛି, ମୁଁ ଲୋକଙ୍କୁ ଭେଟୁଛି, ଲୋକ ମାନେ ମଧ୍ୟ ମତେ ସିଧାସଳଖ ଭେଟି ପାରୁଛନ୍ତି । ଯେମିତି ମୁଁ ଏବେ ଆପଣ ମାନଙ୍କ ସହ କଥାବାର୍ତ୍ତା ହୋଇପାରୁଛି । କିନ୍ତୁ ଓଡ଼ିଶାର ଯେଉଁ ମୁଖ୍ୟମନ୍ତ୍ରୀ ଅଛନ୍ତି, ସେ କାହାକୁ ଏକାକୀ ଭେଟି ପାରୁନାହାନ୍ତି । ଏକାକୀ ଲୋକଙ୍କ ସହ କଥା ହୋଇ ପାରୁନାହାନ୍ତି । ଆଉ ସବୁ ସମୟରେ ତାଙ୍କ ସହ ପାଣ୍ଡିଆନ ରହୁଛନ୍ତି । ଆମକୁ ଜାଣିବାକୁ ପଡିବା ଯେ ନିବୀନ ବାବୁ ସ୍ୱଇଚ୍ଛାରେ ପାଣ୍ଡିଆନ ସହ ରହୁଛନ୍ତି ନାଁ ପାଣ୍ଡିଆନ ଏମିତି କିଛି ଖେଳ କରିଛନ୍ତି ଯେ ନବୀନ ବାବୁ ପାଣ୍ଡିଆନଙ୍କର କବଜାରୁ ବାହାରି ପାରୁନାହାନ୍ତି ।
ସେଥିପାଇଁ ମୋର ମତ ହେଉଛି ଯେ କୌଣସି ହାଇକୋର୍ଟଙ୍କର ଜର୍ଜ ଅଥବା ରାଜ୍ୟପାଳ ନବୀନ ବାବୁଙ୍କ ସହ ଏକାକୀ ୧୦ ମିନିଟ କଥା ହେବାସହ ସେ ଭଲ ଅଛନ୍ତି ନାଁ ନାହିଁ ତାହା ପଚାରିବା ଦରକାର । ଗତ ୧୦ ବର୍ଷ ମଧ୍ୟରେ ବିଜେଡିର କୌଣସି ନେତା ନବୀନ ବାବୁଙ୍କ ସହ ଏକାକୀ କଥା ହୋଇନାହାନ୍ତି । ଯେତେବେଳେ ଭେଟନ୍ତି ତାଙ୍କ ସହ ପାଣ୍ଡିଆନ ଥାଆନ୍ତି ଓ ନବୀନ ବାବୁ କେବଳ ଓକେ ଓକେ କୁହନ୍ତି । ମୁଖ୍ୟମନ୍ତ୍ରୀଙ୍କ ପରି ସାମ୍ବିଧାନିକ ପଦବୀରେ ଥିବା ଜଣେ ବ୍ୟକ୍ତି ପଣ ବନ୍ଦୀ ପରି ପରିସ୍ଥିତିରେ ରହିବା କଥା ଦେଶ ଓ ଓଡିଶା ପାଇଁ ଶୁଭଙ୍କର ନୁହଁ । ମୋତେ ଲାଗୁଛି ନବୀନ ବାବୁଙ୍କୁ ପାଣ୍ଡିଆନ କବଜା (ପଣବନ୍ଦୀ)କରିକି ରଖିଛନ୍ତି । ଯଦି ଏପରି ନୁହଁ ତେବେ ନବୀନ ବାବୁଙ୍କୁ ଅନ୍ତତଃ ଥରେ ଅଧଘଣ୍ଟା ପାଇଁ ଓଡିଶା ଗଣମାଧ୍ୟମ ଙ୍କ ସହ ଭେଟିବାକୁ ଦିଆଯାଉ ବୋଲି ସେ ଦାବି କରଛନ୍ତି ।"
ଏହା ମଧ୍ୟ ପଢନ୍ତୁ: AI ରାଜନୀତି, ବିରୋଧୀଙ୍କୁ କଡା ଜବାବ ଦେଲେ ମୁଖ୍ୟମନ୍ତ୍ରୀ
ସମ୍ବଲପୁର, ଇଟିଭି ଭାରତ
