କୋରାପୁଟ: ଆଦିବାସୀ ମହିଳାଙ୍କ ପାଇଁ ପ୍ରେରଣା ପାଲଟିଛନ୍ତି ଲାକି ଜାନି । ନିଜ ସମ୍ପ୍ରଦାୟର ଲୋକଙ୍କ ପାଇଁ ସେ ଦୀର୍ଘ ବର୍ଷ ଧରି କାର୍ଯ୍ୟ କରି ଆସୁଛନ୍ତି । ସମାଜରେ ସକାରାତ୍ମକ ପରିବର୍ତ୍ତନ ଆଣିବାରେ ତାଙ୍କର ନିରନ୍ତର ଉଦ୍ୟମ ଆଜି ତାଙ୍କୁ ସଫଳତା ଦେଇଛି । ‘ଜାତିସଂଘ ମହିଳା’ ଦ୍ୱାରା ସେ ସ୍ୱୀକୃତିପ୍ରାପ୍ତ ହେବା ପରେ ତାଙ୍କ କାର୍ଯ୍ୟକୁ ଏହାର ପତ୍ରିକା 'ହମ୍' ର ସମ୍ମାନଜନକ ବାର୍ଷିକ ସଂସ୍କରଣରେ ସ୍ଥାନ ଦିଆଯାଇଛି । ଯେଉଁଥିରେ ଲାକି ଜାନିଙ୍କ ସଂଘର୍ଷର କହାଣୀକୁ ସ୍ଥାନ ଦିଆୟାଇଛି । ଲାକି ଜାନି କୋରାପୁଟ ଜିଲ୍ଲାର ଦେଓମାଳି ଅଞ୍ଚଳର ତୃଣମୂଳ ସ୍ତରରେ କାର୍ଯ୍ୟ କରୁଥିବା ଏକ ସଂଗଠନ ସହିତ କିପରି ଶିକ୍ଷକ ଭାବରେ କାର୍ଯ୍ୟ ଆରମ୍ଭ କରିଥିଲେ ସେ ବିଷୟରେ ବର୍ଣ୍ଣନା କରାଯାଇଛି । ବର୍ତ୍ତମାନ ସେ ଜିଲ୍ଲାରେ ମହିଳା ଦକ୍ଷତା ବିକାଶ, ସାମୁହିକ ଜଙ୍ଗଲ ସୃଷ୍ଟି ଓ ନିରନ୍ତର କୃଷି ଉପରେ ଶିକ୍ଷା ଦେଉଛନ୍ତି ।
2018 ମସିହାରେ ଯେତେବେଳେ ଏହି ଅଞ୍ଚଳରେ କୃଷି ଉତ୍ପାଦନ କ୍ଲଷ୍ଟର (ଏପିସି) ପ୍ରକଳ୍ପ ଆରମ୍ଭ ହୋଇଥିଲା, ବିଶେଷ କରି ମହିଳା କୃଷକମାନଙ୍କ ମଧ୍ୟରେ ଦୀର୍ଘସ୍ଥାୟୀ ଓ ନିରନ୍ତର କୃଷିର ପ୍ରୋତ୍ସାହନ ପାଇଁ ବିଭିନ୍ନ ଆଦିବାସୀ ଗ୍ରାମ ଚିହ୍ନଟ କରାଯାଇଥିଲା | ଏହି ପ୍ରକଳ୍ପର ଉଦ୍ଦେଶ୍ୟ ଥିଲା କୃଷକଙ୍କ ଆୟକୁ ଦ୍ୱିଗୁଣିତ କରିବା ଏବଂ ଜୈବିକ ଚାଷକୁ ପ୍ରୋତ୍ସାହିତ କରିବା । ଫାଉଣ୍ଡେସନ ଫର ଇକୋଲୋଜିକାଲ ସିକ୍ୟୁରିଟି (ଏଫଇଏସ ) ଏହି ପ୍ରକଳ୍ପର କାର୍ଯ୍ୟକାରିତାକୁ ଆଗେଇ ନେବା ପାଇଁ ସ୍ଥାନୀୟ ସମ୍ପ୍ରଦାୟ ସହିତ ଭଲ ସମ୍ପର୍କ ଥିବା ମହିଳା କ୍ୟାଡର ଖୋଜୁଥିଲେ । ସେମିଲିଗୁଡା ବ୍ଲକର ପାଖୋଲା ଗ୍ରାମ ପଞ୍ଚାୟତ ପାଇଁ କମ୍ୟୁନିଟି ରିସୋର୍ସ ପର୍ସନ୍ (CRP) ର ଭୂମିକା ଗ୍ରହଣ କରିବା ପାଇଁ ଲାକି ଜାନିଙ୍କୁ ଏହି କ୍ରମରେ ଚିହ୍ନଟ କରାଯାଇଥିଲା ।
ଲାକିଙ୍କ କହିବାନୁଯାୟୀ, ସେ ଅନେକ ବିଷୟରେ ଜାଣି ନ ଥିବାରୁ ଗାଁର ଅନ୍ୟମାନଙ୍କ ସହ କଥାବାର୍ତ୍ତା କରିବାକୁ ଡରୁଥିଲେ । କିନ୍ତୁ ଧୀରେ ଧୀରେ ସେ ଅନେକ ଜ୍ଞାନ ଏବଂ କୌଶଳ ହାସଲ କରିଥିବା ବେଳେ ITDA ଏବଂ ଅନ୍ୟମାନଙ୍କ ଦ୍ବାରା ପରିଚାଳିତ କୃଷି କାର୍ଯ୍ୟକଳାପ, ପଶୁପାଳନ, ଉଦ୍ୟାନ ଓ କୃଷି ଉପରେ ବିଭିନ୍ନ ତାଲିମ କାର୍ଯ୍ୟକ୍ରମ ତଥା ବୈଠକରେ ଯୋଗ ଦେବାର ସୁଯୋଗ ନେଇ ଲାଭବାନ ହୋଇଥିଲେ । ବର୍ତ୍ତମାନ ତାଙ୍କୁ ସମ୍ପୃକ୍ତ ସରକାରୀ ବିଭାଗ ମାଧ୍ୟମରେ ବିଭିନ୍ନ ସରକାରୀ ଯୋଜନା ହାସଲ କରିବାକୁ ଗ୍ରାମବାସୀଙ୍କୁ, ବିଶେଷକରି ସବୁଠାରୁ ଅସୁରକ୍ଷିତ ଲୋକଙ୍କୁ ସାହାଯ୍ୟ କରିବାକୁ ଯଥେଷ୍ଟ ତାଲିମ ଦିଆଯାଇଥିଲା।
ଏଫଇଏସର ସଂଯୋଜକ ଅଧିକାରୀ ପ୍ରଦିପ ମିଶ୍ରଙ୍କ କହିବାନୁଯାୟୀ, ''ଲାକି ପୂର୍ବ ଅପେକ୍ଷା ବର୍ତ୍ତମାନ ଅଧିକ ଆତ୍ମବିଶ୍ୱାସୀ ଥିଲେ ଏବଂ ଅଞ୍ଚଳର ଲୋକଙ୍କ ବହୁତ ବିଶ୍ୱାସ ହାସଲ କରିଥିଲେ । ଏପିସି ପ୍ରକଳ୍ପ ଅଧୀନରେ କରାଯାଇଥିବା କାର୍ଯ୍ୟରେ ସମଗ୍ର ଗ୍ରାମ ସମ୍ପ୍ରଦାୟ ଅତ୍ୟନ୍ତ ଖୁସି ହୋଇଥିଲେ। ଗାଁ ସରପଞ୍ଚ ମଧ୍ୟ ଏହି ପଦକ୍ଷେପକୁ ନେଇ ବହୁତ ଖୁସି ଥିଲେ ଏବଂ ଯେତେବେଳେ ସେ ସାମୁହିକ ସ୍ୱାର୍ଥ ପାଇଁ କୌଣସି ପ୍ରକାରର ସାହାଯ୍ୟ ଆବଶ୍ୟକ କରନ୍ତି ସେତେବେଳେ ଲାକିଙ୍କ ସହ ସହଯୋଗ କରିବାକୁ ସର୍ବଦା ପ୍ରସ୍ତୁତ ରହିଛନ୍ତି । ବର୍ତ୍ତମାନ ଲାକି ସମ୍ମାନଜନକ ପତ୍ରିକାରେ ସ୍ଥାନ ପାଇଥିବାରୁ ପରୋକ୍ଷରେ ଯେଉଁ ପ୍ରକ୍ରିୟା ପାଇଁ ସେ କଠିନ ପରିଶ୍ରମ କରିଥିଲେ ତାହା ସ୍ୱୀକୃତି ଲାଭ କରିଛି । ଲାକିଙ୍କ ପାଇଁ, ଏହି ସମ୍ମାନ ଜୀବନବ୍ୟାପୀ ସାଧନାର ସଫଳତାଠାରୁ କିଛି କମ୍ ନଥିଲା ।''
ଇଟିଭି ଭାରତ, କୋରାପୁଟ
