ରାଉରକେଲା: ଅନଲାଇନ୍ ଗେମିଂ ସହ ବେଟିଂରେ କୋଟି କୋଟି ଟଙ୍କା କାରବାର । ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ପକ୍ଷରୁ ସୁନ୍ଦରଗଡ଼ ଜିଲ୍ଲା ବଣାଇ ଅଞ୍ଚଳରେ ଚାଲିଛି ବଡଧରଣର ଚଢ଼ାଉ । ଅନଲାଇନ୍ ଗେମ ସହ କୋଟି କୋଟି ଟଙ୍କା ବେଟିଂ ହେଉଥିବା ଅଭିଯୋଗରେ ଏହି ଚଢାଉ କରିଛି ପଶ୍ଚିମବଙ୍ଗ ଇଡି । ଚଢ଼ାଉରେ ସାମିଲ ହୋଇଛନ୍ତି ୨୦ରୁ ଊର୍ଦ୍ଧ୍ବ ଅଧିକାରୀ ।
ବଣାଇରେ କୋଲକାତା ଇଡି ରେଡ୍:
ମିଳିଥିବା ସୂଚନା ଅନୁଯାୟୀ, ଆଜି ସକାଳୁ କୋଲକାତାରୁ ଇଡିର ଏକ ୨୦ ଜଣିଆ ଟିମ୍ ୮ ଟି ଗାଡ଼ିରେ ଆସି ବଣାଇ ଅଞ୍ଚଳରେ ପହଞ୍ଚିଛନ୍ତି ।ଏହି ଟିମ ବିଭିନ୍ନ ଅଞ୍ଚଳରେ ଚଢ଼ାଉ ଜାରି ରଖିଛି । ବଣାଇ ଅଞ୍ଚଳର ୬ଟି ଘରେ ଏକ କାଳୀନ ଚଢ଼ାଉ କରିଥିଲେ । ବିଶେଷ ସୂତ୍ର ଅନୁଯାୟୀ ଚଢ଼ାଉର ସଠିକ୍ କାରଣ ହେଉଛି ଅନଲାଇନ୍ ଗେମ ସହ ବେଟିଂ । ଅନଲାଇନ ଗେମ ଏବଂ ବେଟିଂରେ କୋଟି କୋଟି ଟଙ୍କା କାରବାର ବାବଦରେ ଏହି ଚଢ଼ାଉ ହୋଇଥିବା ଜଣାପଡ଼ିଛି । ପ୍ରଥମେ କୋଲକାତାର ଇଡି ଏହି ଅନଲାଇନ ଗେମ ଏବଂ ବେଟିଂ ମାମଲାରେ ସୁରାକ ପାଇଥିବା ଗୁପ୍ତ ସୂତ୍ରରୁ ସୂଚନା ମିଳିଛି । ତେବେ 'ଫି ଉଇନ୍' ନାମକ ଏକ ଅନଲାଇନ ଗେମିଙ୍ଗ ଏବଂ ବେଟିଂ ଆପ ସମ୍ପର୍କରେ କୋଟି କୋଟି ଟଙ୍କା ବେଟିଂ ହେଉଥିବା ସୂଚନା ପାଇ ଇଡି ଏହି ଚଢ଼ାଉ କରିଥିବା ଜଣାପଡ଼ିଛି ।
ଏକକାଳୀନ ୬ଟି ଘରେ ଚଢ଼ାଉ:
ତେବେ ଏହି ଗେମ ବା ବେଟିଂ ଆପରେ ଏହି ଅଞ୍ଚଳରେ କିଛି ଯୁବକ ସମ୍ପୃକ୍ତ ରହିଛନ୍ତି । କୋଟି କୋଟି ଟଙ୍କାର ଗେମ ଖେଳି ବେଟିଂ କରୁଛନ୍ତି । ଯାହାକୁ ନେଇ ଇଡି ଏହି ଚଢ଼ାଉକୁ ଜୋରଦାର କରିଛି । ସମସ୍ତ ଅଧିକାରୀମାନେ ବଣାଇ ଥାନା ଅନ୍ତର୍ଗତ ବଡ ଗୋଗୁଆ, ଜଙ୍ଗଳା ଏବଂ ରୁଗୁଡ଼ା ଗ୍ରାମର ୬ଟି ଘରେ ଏକ କାଳୀନ ଚଢ଼ାଉ କରିଥିଲେ । ତେବେ ଏହି ଗେମିଙ୍ଗ ସହ ବେଟିଂ ଆପର ଚେର କେଉଁ ଯାଏ ଲମ୍ବିଛି । ତାହା ତଦନ୍ତ ପରେ ହିଁ ଜଣା ପଡିବ ।
ତେବେ ଏହି ଚଢ଼ାଉ ବାବଦରେ ଇଡି ଅଧିକାରୀଙ୍କ କୌଣସି ପ୍ରତିକ୍ରିୟା ମିଳି ପାରିନାହିଁ । ପ୍ରଥମ ଥର ବଣାଇ ଭଳି ଏକ ଛୋଟ ସହରରେ ଇଡି ଚଢ଼ାଉ ଘଟଣା ବର୍ତ୍ତମାନ ସମ୍ପୂର୍ଣ୍ଣ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ତେବେ ଏହି ବିଶାଳ ଚଢ଼ାଉ ବଣାଇ ଅଞ୍ଚଳରେ ବିଭିନ୍ନ ସ୍ଥାନରେ ହେଉଛି । ଏହି ଚଢ଼ାଉରେ କେନ୍ଦ୍ରୀୟ ଫୋର୍ସଙ୍କୁ ମଧ୍ୟ ନିୟୋଜିତ କରାଯାଇଛି ।
ଇଟିଭି ଭାରତ, ରାଉରକେଲା
