ଖୋର୍ଦ୍ଧା: ଚାଷ କାମ ଯାହାର,କି ଆନନ୍ଦ ତାହାର । ସେହି ସିନା ଦୁନିଆକୁ ଯୋଗାଉଛି ଆହାର । କଠିନ ପରିଶ୍ରମ ଓ ମନରେ ଆତ୍ମବିଶ୍ୱାସ ଥିଲେ ଜଣେ ଶୀର୍ଷ ସ୍ଥାନରେ ପହଞ୍ଚିବ ନିହାତି । ଏହା କେବଳ କଥାରେ ନୁହେଁ ସତରେ ପ୍ରମାଣିତ କରି ଦେଖାଇଛନ୍ତି ଖୋର୍ଦ୍ଧା ଜିଲ୍ଲାର ଏକ ଦମ୍ପତି । ଉଭୟେ ଉଚ୍ଚ ଶିକ୍ଷିତ ହୋଇ ସମନ୍ବିତ ଚାଷ କରି ନିଜେ ସ୍ବାବଲମ୍ବୀ ହେବା ସହ ଅନ୍ୟଙ୍କୁ ଯୋଗାଇଛନ୍ତି ଆହାର ।
ଚାକିରି ପଛରେ ନ ଗୋଡାଇ, କରୁଛନ୍ତି ଚାଷ:
ଗ୍ରାମାଞ୍ଚଳର ଏହି ଦମ୍ପତିଙ୍କ ଜୀବନରେ ନୂଆ ଆଶା ସଂଚାର ହୋଇଛି । ସମନ୍ବିତ ପ୍ରଣାଳୀରେ ଚାଷ କରି ନିଜେ ସଶକ୍ତ ହେବା ସହ ସମାଜକୁ ଦେଇଛନ୍ତି ଆତ୍ମନିର୍ଭରଶୀଳତାର ବାର୍ତ୍ତା । ଯିଏକି ଚାକିରି ପଛରେ ନ ଗୋଡାଇ ଯୁବ ଅବସ୍ଥାରେ ଆପଣେଇ ନେଇଛନ୍ତି ଚାଷକୁ । ଏଭଳି ସଫଳ ଦମ୍ପତି ହେଲେ ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକର ବଡବେରଣା ପଞ୍ଚାୟତ କୋଲୁହାପାଟଣା ଗ୍ରାମର ସ୍ବାମୀ ବିରଜା ପ୍ରସାଦ ପଣ୍ଡା ଓ ସ୍ତ୍ରୀ ରାଜଶ୍ରୀ ପଣ୍ଡା । ଏ ଦମ୍ପତି ଦୁଇ ଜଣ ହେଉଛନ୍ତି ଉଚ୍ଚ ଶିକ୍ଷିତ । ଉଭୟେ ସଫଳ ଦମ୍ପତି ରୂପରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି ।
ସମନ୍ବିତ ଚାଷ ଦେଇଛି ପରିଚୟ:
ବିରଜା ଓ ରାଜଶ୍ରୀ ଗତ ୨୦୦୬ ମସିହା ବିବାହ କରିଥିଲେ । ଉଭୟଙ୍କ ଶିକ୍ଷାଗତ ଯୋଗ୍ୟତା ଗ୍ରାଜୁଏସନ । ଆଜିକା ସମୟରେ ଅଧିକାଂଶ ଚାଷ କାର୍ଯ୍ୟରୁ ମୁହଁ ଫେରାଇ ଚାକିରି ପଛରେ ଧାଉଁଥିବା ବେଳେ ଏମାନେ କିନ୍ତୁ ଚାକିରି ପଛରେ ଧାଇଁ ନଥିଲେ । ଶିକ୍ଷାକୁ କୃଷି କ୍ଷେତ୍ରରେ ପ୍ରୟୋଗ କରିଥିଲେ । ସମନ୍ବିତ ପ୍ରଣାଳୀରେ ଆଧୁନିକ ଯନ୍ତ୍ରପାତି ବ୍ଯବହାର କରି ଧାନ ଚାଷ,ଛତୁ, ଆଳୁ,ପିଆଜ,ହଳଦୀ,କଳା କୋଳଥ, ଆମ୍ବ,ମାଛ ଓ ଅଦାକୁ ତାହା କରି ନିଜେ ସଶକ୍ତ ହେବା ସହ ସମାଜକୁ ଦେଇଛନ୍ତି ଆତ୍ମନିର୍ଭରଶୀଳତାର ବାର୍ତ୍ତା । ଏଥିସହ ଚାଷ କାର୍ଯ୍ୟରୁ ବାର୍ଷିକ 7ରୁ 8 ଲକ୍ଷ ପର୍ଯ୍ୟନ୍ତ ରୋଜଗାର ମଧ୍ୟ କରିପାରୁଛନ୍ତି ।
ଚାଷ ପାଇଁ ମିଳିଛି ସମ୍ମାନ:
ଏଥିପାଇଁ ସରକାର ଓ ବିଭିନ୍ନ ଅନୁଷ୍ଠାନ ତରଫରୁ ତାଙ୍କୁ ମିଳିଛି ସମ୍ମାନ । ବିଭିନ୍ନ ପ୍ରକାର ଚାଷ କରି ନିଜେ ସ୍ୱାବଲମ୍ବୀ ହେବା ସହିତ ଅନ୍ଯ ଯୁବଗୋଷ୍ଠୀଙ୍କ ପାଇଁ ପାଲଟିଛନ୍ତି ଉଦାହରଣ । ଧାନ ଚାଷ କରିବା ସହ ଆଧୁନିକ ଯନ୍ତ୍ରପାତି ସହାୟତାରେ ଅମଳ କରି ଧାନ ସଂଗ୍ରହ କରି ଛଣଗୁଡିକ ମେସିନ ସହାୟତା କାଟି ଛତୁ ଚାଷ କରୁଛନ୍ତି । ସେହି ଚାଷ କାର୍ଯ୍ୟ କିପରି ଶ୍ରମିକସଂଖ୍ୟା ହ୍ରାସ କରିବେ ସେଥିପାଇଁ ସେ ବିଭିନ୍ନ ଯନ୍ତ୍ରପାତିର ସହାୟତା ନେଇଛନ୍ତି । ଏପରିକି ବିରଜାଙ୍କ ହାତ ତିଆରି ନିର୍ମିତ ଦୁଇ ଥାକ ବିଶିଷ୍ଟ ଛତୁ ବେଡ ମୁଖ୍ଯମନ୍ତ୍ରୀ ଅଭିନବ କୃଷି ଯନ୍ତ୍ରପାତି ଯୋଜନାରେ ସାମିଲ ପାଇଁ ମନୋନୀତ ହୋଇଛି ।
ପନିପରିବା ଚାଷ, ମାଛ ବି ଚାଷ କରିଛନ୍ତି:
ଏଥିସହ ଛାତ ଉପରେ ମଧ୍ଯ ସବୁଜ ପନିପରିବା ଚାଷ ମଧ୍ଯ କରି ଦମ୍ପତି ଆଜି ସ୍ବତନ୍ତ୍ର ପରିଚୟ ପାଇଛନ୍ତି । ସେପଟେ ଗୋଟିଏ ପୋଖରୀ ଖୋଳି ମାଛ ଚାଷ ମଧ୍ୟ ଆରମ୍ଭ କରିଛନ୍ତି । ପୋଖରୀରେ ରୋହି ଏବଂ ଭାକୁର ମାଛ ଛାଡ଼ିଛନ୍ତି । ପ୍ରତି ଛଅ ମାସକୁ ଥରେ ପୋଖରୀରୁ ମାଛ ଧରି ବେଶ ଦୁଇ ପଇସା ରୋଜଗାର କରୁଛନ୍ତି । ଆଗକୁ ପରିବା ଚାଷରେ ଆଧୁନିକ ପ୍ରଣାଳୀ ପ୍ରୟୋଗ କରି ଅଧିକ ଅମଳ କରିବାର ଲକ୍ଷ୍ୟ ରଖିଛନ୍ତି ଏହି ଦମ୍ପତି ।
ଏନେଇ ଚାଷୀ ବିରଜା ପ୍ରସାଦ ପଣ୍ଡା କହିଛନ୍ତି, ‘ 15 ବର୍ଷ ହେଲା ଚାଷ ସହ ସଂଶ୍ଲିଷ୍ଟ ଅଛି । ପ୍ରଥମେ ଚାଷ କାର୍ଯ୍ୟ ଆରମ୍ଭ କଲା ବେଳେ ବିଭିନ୍ନ ସମସ୍ୟା ଦେଇ ଗତି କରୁଥିଲି । ମୁଖ୍ୟ ସମସ୍ୟା ଥିଲା ଶ୍ରମିକ । ଏଥିପାଇଁ ମେସିନ ବ୍ୟବହାର କରି କିପରି ଭଲ ଚାଷ ହୋଇପାରିବ ଅମଳ ହୋଇପାରିବ । ଏଥି ଉପରେ ଧ୍ୟାନ ଦେଲି । ଏହା ପରେ କୃଷି ବିଭାଗ ସହାୟତାରେ ଯାହା ଯନ୍ତ୍ରପାତି ମିଳୁଥିଲା ତାହା ନେଲି । ଅଧିକ ମଧ୍ୟ ଅନଲାଇନରୁ ଅର୍ଡର କଲି । କେବଳ ଧାନ ଚାଷ କଲେ ହେବନି । ବାହାରୁ ଥିବା ଛଣରୁ ମୁଁ ବର୍ଷ ସାରା ଛତୁ ଚାଷ କଲି ସେଥିରୁ ଭଲ ଦୁଇ ପଇସା ରୋଜଗାର କରୁଛି ।’
ଏହା ମଧ୍ୟ ପଢନ୍ତୁ: ସମନ୍ବିତ ଚାଷ ସାଜିଛି ଉଦାହରଣ, ଜମିହୀନଙ୍କୁ ବିନା ଶୁଳ୍କରେ ଜମି ଦେଲେ ଯୁବଚାଷୀ ଚର୍ଚ୍ଚାରେ କୋରାପୁଟ ମହିଳା ଚାଷୀ ହୀରା, ସମନ୍ୱିତ ଚାଷ କରି ହେଲେ ସ୍ୱାବଲମ୍ବୀ |
ରାଜଶ୍ରୀ ପଣ୍ଡା କହିଛନ୍ତି, ‘15ରୁ 20 ପ୍ରକାର ଚାଷ ଆମେ କରୁଛୁ । 2ରୁ 3 ପରିବାରକୁ ରୋଜଗାର ମଧ୍ୟ ଦେଇଛୁ । ଯୋଉଟା ବହୁତ ଲାଗେ । ଧାନ, ଛତୁ, ପୋଖରୀ କରିକି ମାଛ ଚାଷ ବି କରୁଛୁ । ମୁଗ, ବିରି, କୋଳଥ, ଚାଷ ବି କରୁଛୁ । ହଳଦୀ, ହରଡ, ମାଣ୍ଡିଆ, ପନିପରିବା ଚାଷ କରୁଛୁ । ଚାଷ କଲେ କିଛି କ୍ଷତି ନାହିଁ କେବଳ ଧାନ ଚାଷ ନୁହେଁ ଅନ୍ୟ ଚାଷ ବି କରିବା କଥା ।’
ଇଟିଭି ଭାରତ, ଖୋର୍ଦ୍ଧା
