ବରଗଡ଼: ଅନେକ ଗୁଡିଏ ଶିଳ୍ପରେ ପରିପୂର୍ଣ୍ଣ ଥିବା ବରଗଡ଼ ଜିଲ୍ଲା ପାଲଟିଛି ଶିଳ୍ପ ଶୂନ୍ୟ । ସୂତାକାଳ, ସାର କାରଖାନା, ଚିନି କଳ ସହିତ ଶତାଧିକ ଧାନମିଲ ଏବେ ବନ୍ଦ ପଡ଼ିଛି । ଫଳରେ ହଜାର ହଜାର ସଂଖ୍ୟାରେ କାମ କରୁଥିବା କର୍ମଚାରୀ ଦୁର୍ଦ୍ଦିନରେ ଦିନ କାଟୁଛନ୍ତି । ଏହାକୁ ନଜରରେ ରଖି ସରକାର ଚିନି କଳ ଥିବା ଜମିକୁ ଇଡକୋକୁ ହସ୍ତାନ୍ତର କରିବାକୁ ନିଷ୍ପତ୍ତି ନେଇଛନ୍ତି । ଫଳରେ କାରଖାନା ବନ୍ଦ ନେଇ ଅସୁବିଧାର ସମ୍ମୁଖୀନ ହେଉଥିବା ଅନେକ କର୍ମଚାରୀ ତଥା ଶ୍ରମିକଙ୍କ ପରିବାର ଏହାଦ୍ବାରା ଉପକୃତ ହେବେ ।
ସୂଚନା ଅନୁସାରେ, 2017 ମସିହାରୁ ବନ୍ଦ ହୋଇପଡିଥିବା ସେହି ଚିନିକଳର 149 ଜଣ କର୍ମଚାରୀଙ୍କୁ ତାଙ୍କର ବକେୟା ଦରମା ଆଜି ପର୍ଯ୍ୟନ୍ତ ଦିଆଯାଇନାହିଁ । କର୍ମଚାରୀଙ୍କ ପ୍ରାପ୍ୟ ପାଇଁ ବାରମ୍ବାର ଆନ୍ଦୋଳନ ସତ୍ତ୍ବେ ରାଜ୍ୟ ସରକାର ଶୁଣୁନଥିବା ଅଭିଯୋଗ ହୋଇଆସୁଥିଲା । ଏପରିିକି ଅନେକ କର୍ମଚାରୀଙ୍କ ପରିବାର ଭୋକ ଉପାସରେ ଜୀବନ କାଟିବାକୁ ବାଧ୍ୟ ହୋଇପଡିଥିଲେ ତ ଅନେକ ରୋଗାଗ୍ରସ୍ତ ହୋଇ ମୃତ୍ୟୁବରଣ କରିଥିଲେ । ନିଜର ହକ ଓ ଅଧିକାର ପାଇଁ ଦାବି ଜଣାଇ ଦୀର୍ଘ ମାସେ ହେଲା ଜିଲ୍ଲାପାଳଙ୍କ ଅଫିସ ଆଗରେ ଧାରଣାରେ ବସି ଆସୁଥିବା ଚିନି କାରଖାନାର କର୍ମଚାରୀଙ୍କ ଦାବି ଶେଷରେ ଶୁଣିଛନ୍ତି ରାଜ୍ୟ ସରକାର ।
୧୯୭୪ ମସିହାରେ ବରଗଡର ତୋରାଠାରେ ବସିଥିଲା ଏକ ଚିନି କାରଖାନା ଏବଂ ଏଠାରେ କାମ କରି ନିଜ ପରିବାର ପୋଷଣ କରୁଥିଲେ ବହୁ କର୍ମଚାରୀ । ରାଜ୍ୟ ତଥା ରାଜ୍ୟ ବାହାରୁ ଓ ବିଦେଶରୁ ମଧ୍ୟ ଅନେକ ଲୋକ ଆସି ଏଠାରେ କାମ କରୁଥିଲେ । ନେପାଳ, ବିହାର, ପଞ୍ଜାବ, ମଧ୍ୟପ୍ରଦେଶରୁ ଶ୍ରମିକ ଓ କର୍ମଚାରୀମାନେ ତାଙ୍କ ପରିବାର ସହିତ ଆସି ଏଠି ସ୍ଥାୟୀ ବାସିନ୍ଦା ଭାବେ ରହିଯାଇଥିଲେ । ଏହି କାରଖାନା ଯୋଗୁଁ ବରଗଡର ଚାଷୀମାନେ ପ୍ରଚୁର ଆଖୁ ଚାଷ କରି ଆଖୁଚାଷ ଏକ ଅର୍ଥ ପ୍ରଦାନକାରୀ ଫସଲ ବୋଲି ପ୍ରମାଣିତ କରିଦେଇଥିଲେ । ଉତ୍ଥାନ ଓ ପତନ ମଧ୍ୟରେ ଗତିକରି ଦୀର୍ଘ ୪୩ ବର୍ଷ ଧରି ଏହି ଚିନି କାରଖାନା ଚାଲିବା ପରେ ଶେଷରେ ୨୦୧୭ ମସିହାରୁ ଏହି କାରଖାନାରୁ ଆଉ ଚିନି ଉତ୍ପାଦନ କରାଯାଉନାହିଁ ଏବଂ କାରଖାନାଟି ଅଚଳ ହୋଇ ପଡିରହିଛି । କାରଖାନାଟିକୁ ସମ୍ପୂର୍ଣ୍ଣ ବନ୍ଦ କରାଗଲା ବୋଲି ନା ଘୋଷଣା କରାଯାଇଛି ନା କାର୍ଯ୍ୟରତ କର୍ମଚାରୀଙ୍କୁ ଦରମା ଦିଆଯାଇ ଅନ୍ୟତ୍ର ଥଇଥାନ କରାଯାଇଛି । ବିନା ଦରମାରେ କାରଖାନାଟିକୁ ଜଗିବ ସି ତାହାର ରକ୍ଷଣାବେକ୍ଷଣ କରିଆସୁଥିଲେ କିଛି କର୍ମଚାରୀ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଚିନି କାରଖାନାର ପୁନଉଦ୍ଧାର କରିବା ପାଇଁ 2019 ମସିହାରେ ୧୧ କୋଟି ଟଙ୍କାର ପ୍ୟାକେଜ ଘୋଷଣା କରିଥିଲେ । ଆଉ ଆଜି ଏହି କାରଖାନାକୁ ଇଡକୋକୁ ହସ୍ତାନ୍ତର କରାଯିବ ବୋଲି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । କାରଖାନ ବନ୍ଦ ଯୋଗୁ ରୋଜଗାର ହରାଇଥିବା ବହୁ କର୍ମଚାରୀଙ୍କ ମଧ୍ୟରେ ବର୍ତ୍ତମାନ ନୂଆ ଆଶା ସଞ୍ଚାର ହୋଇଛି ।
ଇଟିଭି ଭାରତ, ବରଗଡ଼
