ରାଇରଙ୍ଗପୁର: ମରଣଯନ୍ତା ପାଲଟିଛି ଦୁଆରଶୁଣି ଘାଟି ! ନିକଟରେ ଦୁଆରଶୁଣି ଘାଟିରେ ଯାତ୍ରାପାର୍ଟି ଟ୍ରକ ଓଲଟି 6 ଜଣଙ୍କ ଜୀବନ ଯାଇଥିଲା । ଘଟଣାକୁ ସପ୍ତାହେ ନପୁରୁଣୁ ପୁଣି ଘାଟିରେ ଯାଇଛି ଜୀବନ । ଗତକାଲି(ରବିବାର) ଦୁଆରଶୁଣି ଘାଟିରେ ପିଆଜ ବୋଝେଇ ଟ୍ରକ ଓଲଟି ହେଲପରଙ୍କ ଜୀବନ ଯାଇଛି । ସେପଟେ ଗୁରୁତର ଅବସ୍ଥାରେ ଡ୍ରାଇଭର ଜୀବନ ମରଣ ସହିତ କରୁଛି ସଂଘର୍ଷ ।
ପିଆଜ ବୋଝେଇ ଟ୍ରକ ଓଲଟି ପଡିବାରୁ ଟ୍ରକ ତଳେ ଚାପି ହୋଇ ପ୍ରାଣ ହରାଇଛନ୍ତି ହେଲପର । ଡ୍ରାଇଭର ଜଣକ ଗୁରୁତର ଅବସ୍ଥାରେ ଜୀବନ ମରଣ ସହିତ ସଂଘର୍ଷ କରୁଛନ୍ତି । ପ୍ରାଣ ହରାଇଥିବା ବ୍ୟକ୍ତି ସାଲିମ ଉଦିମ ଉଲ୍ଲା ବୋଲି ସୂଚନା ମିଳିଛି । ସୂଚନା ଅନୁଯାୟୀ, ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ଅନ୍ତର୍ଗତ ୪୯ ନଂ ଜାତୀୟ ରାଜପଥ ଦୁଆରଶୁଣି ଘାଟିରେ ଗତକାଲି ଅପରାହ୍ନରେ ଏକ ପିଆଜ ବୋଝେଇ ଟ୍ରକ ଦୁର୍ଘଟଣାଗ୍ରସ୍ତ ହୋଇଛି । ମହାରାଷ୍ଟ୍ର ରାଜ୍ୟର ନାସିକ ଅଞ୍ଚଳରୁ ପିଆଜ ଲୋଡ୍ କରି ଏକ ଟ୍ରକ କଲିକତା ଅଭିମୁଖେ ଯାଉଥିଲା । ସେହି ସମୟରେ ଦୁଆରଶୁଣି ଘାଟି ଗଡାଣିଆ ରାସ୍ତାରେ ଭାରସାମ୍ୟ ହରାଇ ଓଲଟି ପଡିଥିଲା । ଫଳରେ ଉଭୟ ଟ୍ରକ ଡ୍ରାଇଭର ହେଲପର ଚାପି ହୋଇ ଟ୍ରକ ମଧ୍ୟରେ ରହି ଯାଇଥିଲେ । ପରେ ପୋଲିସକୁ ଖବର ଦିଆ ଯିବାରୁ ଘଟଣାସ୍ଥଳରେ ପୋଲିସ ପହଞ୍ଚି ଦୁହିଁଙ୍କୁ ଉଦ୍ଧାର କରିଥିଲେ ।
ଏହା ମଧ୍ୟ ପଢ଼ନ୍ତୁ.... ଦୁଆରଶୁଣି ଘାଟି ଦୁର୍ଘଟଣା: ମୃତକଙ୍କ ପରିବାରକୁ ରାଣୀ ପଣ୍ଡାଙ୍କ ସହାୟତା
ଆମ୍ବୁଲାନ୍ସ ଯୋଗେ ଉଭୟଙ୍କୁ ନିକଟସ୍ଥ ବାଙ୍ଗିରିପୋଷି ମେଡିକାଲକୁ ପଠାଇଥିଲେ । ଉଭୟଙ୍କ ପ୍ରାଥମିକ ଚିକିତ୍ସା କରାଯାଇଥିଲା । ହେଲେ ଚିକିତ୍ସାଧିନ ଅବସ୍ଥାରେ ହେଲପରଙ୍କ ମୃତ୍ୟୁ ଘଟିଥିଲା । ଡ୍ରାଇଭରଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବାରିପଦା ପିଆରଏମ ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ତେବେ ରାସ୍ତା ଉପରେ ଦୁର୍ଘଟଣା ଘଟିବା ପରେ ଘାଟି ରାସ୍ତାର ଉଭୟ ପାର୍ଶ୍ୱରେ ବହୁ ସଂଖ୍ୟାରେ ଗାଡି ଅଟକି ରହିଥିଲା । ପରେ ବାଙ୍ଗିରିପୋଷି ଥାନା ପୋଲିସ ଘଟଣାସ୍ଥଳରେ ପହଞ୍ଚି ଡ୍ରାଇଭର ଓ ହେଲପରକୁ ଉଦ୍ଧାର କରି ମେଡିକାଲକୁ ପଠାଇ ଦୁର୍ଘଟଣା ଯୋଗୁଁ ହୋଇଥିବା ରାସ୍ତା ଜାମ ହଟାଇଥିଲା ।
ଏଠାରେ ସୂଚନାଯୋଗ୍ୟ ଯେ, ଗତ କିଛି ଦିନ ପୂର୍ବରୁ ସେହି ଦୁଆରଶୁଣି ଘାଟିରେ ରାଇରଙ୍ଗପୁରରୁ ଜଳେଶ୍ଵର ଅଭିମୁଖେ ଯାଉଥିବା ଧଉଳି ଗଣନାଟ୍ୟର ଲାଇଟ ଓ ମାଇକ ବୋଝେଇ ଟ୍ରକ ଓଲଟି ପଡିବାରୁ ୬ଜଣ ମୃତ୍ୟୁବରଣ କରିଥିଲେ । ବାରମ୍ବାର ଘାଟି ରାସ୍ତାରେ ଛୋଟ ବଡ଼ ଦୁର୍ଘଟଣା ଘଟି ଧନ ଜୀବନ ହାନି ହେଉଛି । ତେବେ ଆଗକୁ ଦୁଆରଶୁଣି ଘାଟି ରାସ୍ତା ପ୍ରଶସ୍ତିକରଣ କରା ନଗଲେ ଆହୁରି ଦୁର୍ଘଟଣା ଘଟି ଧନ ଜୀବନ ହାନି ହେବ ବୋଲି ସାଧାରଣରେ ଚର୍ଚ୍ଚା ହେଉଛି ।
ଇଟିଭି ଭାରତ,ରାଇରଙ୍ଗପୁର
