ବଲାଙ୍ଗୀର: ଅଚାନକ ମଣ୍ଡି ଗସ୍ତ କରି ସ୍ଥିତି ପରଖିଲେ ସ୍ୱାସ୍ଥ୍ୟମନ୍ତ୍ରୀ । ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଆଜି(ସୋମବାର) ଅଚାନକ ବିଭିନ୍ନ ମଣ୍ଡି ପରିଦର୍ଶନ କରିଛନ୍ତି । ଏହି ସମୟରେ ଧାନ କଟନୀଛଟନୀ ନେଇ ଚାଷୀମାନେ ଅଭିଯୋଗ କରିଥିବା ବେଳେ 24 ବର୍ଷର ଦୁର୍ନୀତିକୁ ଆମେ ଧୀରେ ଧୀରେ ଠିକ କରୁଛୁ ବୋଲି କହିଛନ୍ତି ମନ୍ତ୍ରୀ ।
ମଣ୍ଡି ବୁଲିଲେ ମନ୍ତ୍ରୀ:
ଆଜି (ସୋମବାର) ନିଜ ନିର୍ବାଚନ ମଣ୍ଡଳୀ ପୁଇନ୍ତଳା ବ୍ଲକର ବିଭିନ୍ନ ଧାନ ମଣ୍ଡି ପରିଦର୍ଶନ କରିଛନ୍ତି ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ । ଏହି ସମୟରେ ଚାଷୀମାନେ ମଣ୍ଡିରେ ହେଉଥିବା ଧାନ କଟନୀଛଟନୀ ଓ ଫଟା ବସ୍ତା ଦିଆଯାଉଥିବା ନେଇ ଅଭିଯୋଗ କରିଛନ୍ତି । ସେମାନଙ୍କ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ନିଆଯିବ ଓ ଚାଷୀଙ୍କୁ ହଇରାଣ ହେବାକୁ ଦିଆଯିବ ନାହିଁ ବୋଲି ପ୍ରତିଶ୍ରୁତି ଦେଇଛନ୍ତି ସ୍ୱାସ୍ଥ୍ୟମନ୍ତ୍ରୀ ।
କଟନୀ ଛଟନୀ ଅଭିଯୋଗ ଆଣିଲେ ଚାଷୀ:
ଧାନ ଚାଷୀ ଗୋବିନ୍ଦ ପ୍ରଧାନ କହିଛନ୍ତି " ଅନ୍ୟ ମଣ୍ଡିରେ ଦୁଇ କେଜି କଟନୀ ହେଉଥିବା ବେଳେ ଆମ ସାଉଁତପୁର ମଣ୍ଡିରେ ପାଞ୍ଚ କେଜି କଟନୀ ହେଉଛି । ସେହିପରି ଏଠି ଫଟା ଅଖା ବସ୍ତା ଦେଉଛନ୍ତି ଯେଉଁଥିରେ ଧାନ ଆଣିବା ସମ୍ଭବ ହେଉ ନାହିଁ । ସେହିପରି ଆମେ ଜରି ବସ୍ତାରେ ଧାନ ଭରି ସାରିଥିବା ବେଲେ ଏବେ ପୁଣି ଅଖା ବସ୍ତାରେ ଧାନ ଭରିବୁ ଯାହାର ଖର୍ଚ୍ଚ କିଏ ଦେବ ? ସେହିପରି ଅନ୍ୟପଟେ ଅଖା ବସ୍ତା ବଦଳରେ ଜରି ବସ୍ତା ଗ୍ରହଣୀୟ ହେଉଛି । ତେଣୁ ଏଠି ମଧ୍ୟ ତାକୁ ଗ୍ରହଣ କରାଯାଉ । "
ଗ୍ରାଉଣ୍ଡରେ ସ୍ଥିତି ପରଖିଲେ ସ୍ବାସ୍ଥ୍ୟମନ୍ତ୍ରୀ:
ଅନ୍ୟପଟେ ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି, "ମୁଁ ଆଜି ନିଜ ନିର୍ବାଚନ ମଣ୍ଡଳୀର ବିଭିନ୍ନ ଧାନ ମଣ୍ଡି ବୁଲୁଛି । ଗ୍ରାଉଣ୍ଡର ସ୍ଥିତି ପରଖିଛି ଏବଂ ସବୁଠି ଲୋକେ କୃତଜ୍ଞତା ସହ ହୃଦୟରୁ ଏହି ସରକାରକୁ ଧନ୍ୟବାଦ ଜଣାଇଛନ୍ତି । ଯେହେତୁ ସେମାନେ 31 ଶହ ଟଙ୍କାରେ ଧାନ ବିକ୍ରି କରୁଛନ୍ତି ତା ପାଇଁ ଖୁସି ଅଛନ୍ତି । ଆମେ ଯାହା କହିଥିଲୁ ତାହା କରିକି ଦେଖାଇଛୁ । ଲୋକେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ପ୍ରଧାନମନ୍ତ୍ରୀ ନେରେନ୍ଦ୍ର ମୋଦିଙ୍କୁ ଧନ୍ୟବାଦ ଜଣାଉଛନ୍ତି । ଆମେ ନିଶ୍ଚିତ ଭାବରେ 24 ବର୍ଷର ସମସ୍ୟାକୁ ଉତ୍ତରାଧିକାରୀ ଭାବରେ ପାଇଛୁ । ଗତ ସରକାର ପ୍ଲାଷ୍ଟିକ ବସ୍ତା ଦୁର୍ନୀତି କରି ଆସିଥିଲା ହେଲେ ଆମେ ଚାଷୀଙ୍କୁ ଝୋଟ ବସ୍ତା ଯୋଗାଇ ଦେଉଛୁ । ସେହିପରି ଧାନ ଠିକରେ କିଣିବା ପାଇଁ ଆମେ ସବୁ ପ୍ରକାରର ମେସିନାରୀ ସବୁଠି ବ୍ୟବସ୍ଥା କରିଛୁ ।"
ବଲାଙ୍ଗୀରରୁ 2ରୁ ଆରମ୍ଭ ହୋଇଛି ଧାନକିଣା
ବଲାଙ୍ଗୀରରେ ଗତ ଡିସେମ୍ବର ଦୁଇ ତାରିଖରୁ ଧାନ କିଣା ପ୍ରକ୍ରିୟା ଆରମ୍ଭ ହୋଇଛି । 15 ଦିନ ବିଳମ୍ବରେ ଏବେ ଧାନ କିଣା ଚାଲିଛି । ସେହିପରି 147ଟି ପେକ୍ସ ଓ 18 ମହିଳା ଏସଏଚଜି ଦ୍ୱାରା ଧାନ କିଣା ହେବ । ଯେଉଁଥିରୁ ଏଯାଏଁ 140ଟି ପେକ୍ସ ସମ୍ପୂର୍ଣ୍ଣ ଭାବରେ କାର୍ଯ୍ୟକ୍ଷମ ହୋଇଛି । ସେହିପରି ମିଲରଙ୍କ ମନମାନି ଯୋଗୁଁ ସବୁଠି ୫ କିଲୋରୁ ୬ କିଲୋ ଧାନ କଟନୀ ହେଉଥିବାର ଅଭିଯୋଗ ଆସିଛି ।
ଏହାମଧ୍ୟ ପଢନ୍ତୁ... ମଣ୍ଡିରେ ପଡ଼ି ରହିଛି ଧାନ, ଚାଷୀଙ୍କୁ ଘାରିଛି ବର୍ଷା ଭୟ କଳାହାଣ୍ଡିରେ ଆରମ୍ଭ ହେଲା ଧାନ ମଣ୍ଡି ଧାନମଣ୍ଡି ପାଇଁ ଖୋଲିଲା ୨୪ ଘଣ୍ଟିଆ କଣ୍ଟ୍ରୋଲ ରୁମ୍, ଟୋଲ୍ ଫ୍ରି ନମ୍ବର ଜାରି |
ଇଟିଭି ଭାରତ, ବଲାଙ୍ଗୀର
