ବାଲେଶ୍ବର: ଇଦ୍ରେ ରଣକ୍ଷେତ୍ର ପାଲଟିଲା ବାଲେଶ୍ବର । ସହରର ଟାଉନ ଥାନା ଅଧିନ ସୁନହଟ ନିକଟରେ ଦୁଇ ଗୋଷ୍ଠୀଙ୍କ ମଧ୍ୟରେ ଜୋରଦାର ଗଣ୍ଡଗୋଳ ସୃଷ୍ଟି ହୋଇ ପଥର ମାଡ଼ ହୋଇଥିବା ଦେଖିବାକୁ ମିଳିଛି । ଘଟଣା ସ୍ଥଳରେ ନିଜେ ଜିଲ୍ଲା ଆରକ୍ଷୀ ଅଧିକ୍ଷକ ସାଗରିକା ନାଥ ଉପସ୍ଥିତ ରହି ସ୍ଥିତି ଅନୁଧ୍ୟାନ କରିବା ସହ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । କେଉଁ କାରଣରୁ ବିବାଦ ସୃଷ୍ଟି ହୋଇଛି ତାହା ସ୍ପଷ୍ଟ ହୋଇ ନଥିବା ବେଳେ ଏକ ରାସ୍ତାରୋକକୁ ନେଇ ଏମିତି ଘଟଣା ଘଟିଥିବା କଥା କୁହାଯାଉଛି ।
ଘଟଣାସ୍ଥଳରେ ତୀବ୍ର ଉତ୍ତେଜନା ଲାଗି ରହିଥିବା ବେଳେ ବାଇକ ଭଙ୍ଗାରୁଜା ସାଙ୍ଗକୁ ଦୁଇ ଗୋଷ୍ଠୀ ମଧ୍ୟରେ ଟେକା ପଥର ମାଡ଼ କରାଯାଇଥିବାରୁ ସ୍ଥାନୀୟ ଅଞ୍ଚଳରେ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ଉତ୍ତେଜନା ଅଧିକ ହେବାରୁ ପୋଲିସ ଫୋର୍ସ ଘଟଣା ସ୍ଥଳରେ ଉତ୍ୟକ୍ତ ଲୋକଙ୍କୁ ଘଉଡାଇବା ପାଇଁ ଚେଷ୍ଟା ଜାରି ରଖିଛି । ବର୍ତ୍ତମାନ ସୁଦ୍ଧା ଖବର ଅନୁସାରେ ପରିସ୍ଥିତି ନିୟନ୍ତ୍ରଣାଧୀନ ରହିଥିବା ବେଳେ 144 ଧାରା ଲାଗୁ କରାଯାଇଛି । ଟେକା ପଥର ମାଡ଼ରେ ଏସପି ସାଗରିକା ନାଥଙ୍କ ମୁଣ୍ଡରେ ପଥର ମାଡ ବାଜିଥିବା ବେଳେ ପ୍ରାୟ 5 ଜଣ ଆହତ ହୋଇଛନ୍ତି । ଏହାସହ ଅନେକ ଗୁଡିଏ ବାଇକ ଭାଙ୍ଗିବା ସହ କାର ଭାଙ୍ଗିଥିବା ଦେଖିବାକୁ ମିଳିଛି ।
ଏହି ଘଟଣାକୁ ନେଇ ବାଲେଶ୍ୱର ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ ବାଲେଶ୍ୱରବାସୀଙ୍କୁ ଶାନ୍ତି ବଜାୟ ରଖିବା ପାଇଁ ନିବେଦନ କରିଛନ୍ତି । ଏହାସହ ମୁଖ୍ୟମନ୍ତ୍ରୀଙ୍କ ସହ ନିଜେ କଥା ହେବାପରେ ଏହି ଘଟଣାର ପ୍ରକୃତ କାରଣ ଖୋଜା ହେବା ପରେ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବା ନେଇ କହିଛନ୍ତି ସାଂସଦ । ପୂର୍ବରୁ ବକରି ଇଦରେ କୌଣସି ପଶୁ ହତ୍ୟା ନ କରିବା ପାଇଁ ସାଂସଦ ଜିଲ୍ଲାପାଳଙ୍କୁ କହିଥିଲେ । ମାତ୍ର ଡ୍ରେନରେ ରକ୍ତ ଛିଟା ପଡ଼ିବାକୁ ନେଇ ଏମିତି ଘଟଣା ଘଟିଥିବା ସାଂସଦ କହୁଥିବା ବେଳେ ଉକ୍ତ ରକ୍ତ ନମୁନାକୁ ପରୀକ୍ଷା ପାଇଁ ପଠାଯାଇଛି । ପରୀକ୍ଷା ପରେ ପ୍ରକୃତ ଘଟଣା ସାମ୍ନାକୁ ଆସିବ ବୋଲି କହିଛନ୍ତି ସାଂସଦ ।
ଏହା ମଧ୍ୟ ପଢ଼ନ୍ତୁ...ମହଙ୍ଗା ପଡିଲା ରାଜନୈତିକ ହିଂସା, ବଙ୍ଗାଳି ସାହି ଗୋଷ୍ଠୀ ସଂଘର୍ଷରେ 5 ଗିରଫ - Group clash
ସୂଚନା ଅନୁସାରେ, ବାଲେଶ୍ବର ସୁନାହଟ ଛକ ନିକଟରେ ଏକ ନାଳରେ ରକ୍ତ ଭାସୁଥିବା କିଛି ଲୋକ ଦେଖିଥିଲେ । ରକ୍ତ କେଉଁଠୁ ଆସିଲା କିପରି ଆସିଲାକୁ ନେଇ 2 ଗୋଷ୍ଠୀଙ୍କ ମଧ୍ୟରେ ବଚସା ହୋଇଥିଲା । ସେପଟେ ଖବର ପାଇ ଟାଉନ ଥାନ ପୋଲିସ ସହ ଆଡିସନାଳ ଏସପି ଘଟଣା ସ୍ଥଳରେ ପହଞ୍ଚି ବୁଝାସୁଝା କରିଥିଲେ । କିନ୍ତୁ ଏକ ନିର୍ଦ୍ଦିଷ୍ଟ ଗୋଷ୍ଠୀ ଅନ୍ୟ ଏକ ଗୋଷ୍ଠୀ ଉପରକୁ ପଥର ମାଡ କରିବା ସହ ଗାଡି ଭଙ୍ଗାରୁଜା କରିଥିଲେ । ଏହି ଢେଲା ପଥର ମାଡ଼ରେ କିଛି ସାଧାରଣ ଲୋକଙ୍କ ସହ ପୋଲିସ କର୍ମଚାରୀ ମଧ୍ୟ ଆହତ ହୋଇଥିବା ଜଣାପଡ଼ିଛି ।
ଇଟିଭି ଭାରତ, ବାଲେଶ୍ବର
