ସମ୍ବଲପୁର: କୁଚିଣ୍ଡା ମହୁଲପାଲି ଥାନା ଅଞ୍ଚଳରେ ଜଣେ 14 ବର୍ଷୀୟ ନାବାଳିକାଙ୍କୁ ଗଣଦୁଷ୍କର୍ମ ଘଟଣା । 4 ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ମହୁଲପାଲି ଥାନା ପୋଲିସ । ଏନେଇ କୁଚିଣ୍ଡା ଏସଡ଼ିପିଓ ଅମିତାଭ ପଣ୍ଡା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି l
କ'ଣ ଥିଲା ସମ୍ପୂର୍ଣ୍ଣ ଘଟଣା ?
କୁଚିଣ୍ଡା ଉପଖଣ୍ଡ ମହୁଲପାଲି ଥାନା ଅଞ୍ଚଳର ଜଣେ ନାବାଳିକା ନିକଟସ୍ଥ ଏକ ଗାଁକୁ ଯାତ୍ରା ଦେଖି ବିଳମ୍ବିତ ରାତିରେ ପରିବାର ଲୋକଙ୍କ ସହିତ ଘରକୁ ଫେରିବା ବାଟରେ ଗଣଦୁଷ୍କର୍ମର ଶିକାର ହୋଇଥିବା ନେଇ ଥାନାରେ ଅଭିଯୋଗ ହୋଇଥିଲା । ଏହି ଘଟଣାରେ ସମ୍ପୃକ୍ତ 4 ଜଣ ଅଭିଯୁକ୍ତକୁ ପୋଲିସ ଗିରଫ କରି ପୋସ୍କୋ କୋର୍ଟରେ ହାଜର କରାଯାଇଛି ।
ଏମିତି କହିଲେ ଏସଡ଼ିପିଓ ଅମିତାଭ ପଣ୍ଡା:
କୁଚିଣ୍ଡା ଏସଡ଼ିପିଓ ଅମିତାଭ ପଣ୍ଡା କହିଛନ୍ତି,"ଡିସେମ୍ବର ୧ ତାରିଖ ଦିନ ରାତିରେ ଜଣେ ନାବାଳିକା ତାଙ୍କର ପରିବାର ସହ ମହୁଲପାଲି ଥାନାରେ ରିପୋର୍ଟ କରିଥିଲେ ଯେ ଗତ 30 ତାରିଖ ରାତିରେ ନିକଟସ୍ଥ ଗାଁରୁ ଅପେରା ଦେଖିବାକୁ ଯାଇଥିଲେ । ସେଠାରୁ ପରିବାର ସହ ଫେରିବା ବାଟରେ 4 ଜଣ ଯୁବକ ସେମାନଙ୍କୁ ଅଟକାଇ ଝଗଡ଼ା କରିଥିଲେ । ଏହି ସମୟରେ ଉକ୍ତ ଯୁବକମାନେ ଜଣେ ନାବାଳିକାକୁ ଜଙ୍ଗଲକୁ ଉଠାଇନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା ।ଏନେଇ ମହୁଲପାଲି ପୋଲିସ କେସ ନମ୍ବର 188ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ଘଟଣା ସ୍ଥଳକୁ ସାଇଣ୍ଟିଫିକ ଟିମ ଯାଇ ତଦନ୍ତ କରିଥିଲେ ଏବଂ ୪ ଜଣ ଯୁବକକୁ ଅଟକ ରଖାଯାଇଥିଲା । ଘଟଣାର ତଥ୍ୟ ପ୍ରମାଣ ସଂଗ୍ରହ କରାଯାଇ ସେମାନଙ୍କୁ ଗିରଫ କରାଯାଇଛି ।
ଅଭିଯୁକ୍ତମାନେ ହେଲେ...
ସେ ଆହୁରି ମଧ୍ୟ କହିଛନ୍ତି,"ଅଭିଯୋଗ ଆଧାରରେ ପୋଲିସ ୪ ଜଣଙ୍କୁ ଗିରଫ କରିଛି । ଅଭିଯୁକ୍ତମାନେ ହେଲେ ସୁନ୍ଦରଗଡ ଜିଲ୍ଲା ଗୁରୁଣ୍ଡିଆ ଥାନା ନୂଆପାଲିର ଅନୀଲ ମିଞ୍ଜ ,କୁତ୍ରା ଥାନା କର୍ମାବାହାଲର ସରୋଜ ଏକ୍କା ଏବଂ ମହୁଲପାଲି ଥାନା ବିଲୁଙ୍ଗ ଗାଁର ଜିତେନ୍ଦ୍ର ଭଞ୍ଜ ଓ ଦୁମକୁ ଗାଁର ଗୋବିନ୍ଦ କିସାନ । ସେମାନଙ୍କୁ ଗିରଫ କରିକି ପୋସ୍କୋ କୋର୍ଟରେ ହାଜର କରିଛୁ ।"
ଇଟିଭି ଭାରତ, ସମ୍ବଲପୁର
