ଭୁବନେଶ୍ବର: ଆସୁଛି ଗଣେଶ ପୂଜା । ଜମିବ ବାଜା-ବାଣର ଆସର । ହେଲେ ବିନା ଡିଜେ ସାଉଣ୍ଡରେ ଫିକା ପଡିବ ପୂଜାର ଆସର । କାରଣ ଏଥର ଭସାଣିରେ ଡିଜେ ନବଜାଇବାକୁ କଡା ନିର୍ଦ୍ଦେଶ ଦେଇଛି ପୋଲିସ । ଏହାକୁ ନେଇ ଡିଜେ ମାଲିକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ସିଜନ୍ ବେପାର ସମୟରେ ପୋଲିସ ଏହି ନିଷ୍ପତ୍ତିକୁ ବିରୋଧ କରି କମିଶନରେଟ ପୋଲିସ ମୁଖ୍ୟାଳୟ ଘେରାଉ କରିଛି ଭୁବନେଶ୍ବର ଡିଜେ ମାଲିକ ସଂଘ । ନିଷ୍ପତ୍ତି ସମ୍ପର୍କରେ ପୁନଃବିଚାର କରାନଗଲେ ପୂଜାରେ ପେଣ୍ଡାଲ ଓ ମେଲୋଡିରେ ବି ସାମିଲ ହେବେନାହିଁ ବୋଲି କହିଛନ୍ତି ବିରୋଧ ପ୍ରଦର୍ଶନକାରୀ ।
ଏନେଇ ‘ସାଉଣ୍ଡ ଆଣ୍ଡ ଲାଇଟ୍’ ମାଲିକ ଆସୋସିଏସନ ସମ୍ପାଦକ ଜଗଦୀଶ ଚନ୍ଦ୍ର ମହାରଣା କହିଛନ୍ତି,'' ଆମେ ଏଭଳି ବନ୍ଦ ନିଷ୍ପତ୍ତି ନେଇ ଡିସିପି ଅଫିସରେ ସକାଳ ୧୦ଟାରେ ଠିଆ ହୋଇଥିଲୁ । ଆମେ ଧାରଣା ଦେଇନଥିଲୁ କି ପ୍ରତିବାଦ କରିନଥିଲୁ । ଆମେ ଯାଇଥିଲୁ ସାରଙ୍କୁ ସହ ଆଲୋଚନା କରିବାକୁ । ଭସାଣ ସମୟରେ କାହିଁକି ଡିଜେ ବାଜିବ ନାହିଁ ତାହା ପଚାରିବାକୁ । ହେଲେ ସେ କହିଲେ ପେଣ୍ଡାଲରେ ବାଜିବ ମେଲୋଡିରେ ବାଜିବ, ମାତ୍ର ଭସାଣରେ ଡିଜେ ବାଜିବ ନାହିଁ । ଏହାପରେ ଆମେ କହିଥିଲୁ ସମସ୍ତଙ୍କ ଲାଇସେନ୍ସ ବାତିଲ କରନ୍ତୁ । ଡିଜେ ନବାଜିଲେ ଆମର ରୋଜଗାର କିପରି ହେବ । ''
ପୂର୍ବରୁ ମଧ୍ୟ ଦାବି ଜଣାଇଥିଲେ:
ଏନେଇ ପୂର୍ବରୁ ପୋଲିସ କମିଶନରଙ୍କୁ ଭେଟି ଦାବି ଜଣାଇଥିଲେ ଡିଜେ ମାଲିକମାନେ। ଆଗକୁ ଏ ବିଷୟରେ ଆଲୋଚନା ଓ ନିଷ୍ପତ୍ତି ନେବେ ବୋଲି ପ୍ରତିଶୃତି ଦେଇଥିଲେ । ହେଲେ ପାଳନ କଲେନାହିଁ । ତେଣୁ ନିଷ୍ପତ୍ତିକୁ ପୁନଃବିଚାର କରାଯାଉ ବୋଲି ଡିଜେ ମାଲିକ ସଂଘ ଦାବି କରିଛନ୍ତି ।
ପେଟ ପାଟଣାରେ ଆଘାତ:
ଭସାଣରେ ଡିଜେ ବନ୍ଦ ହେଲେ ଟେଣ୍ଟ ହାଉସରେ କାମ କରୁଥିବା କର୍ମଚାରୀ ଓ ମାଲିକ କ୍ଷତିରେ ପଡିବେ । ନିତିଦିନିଆ ଶ୍ରମିକ ଭଳି କାମ କରୁଥିବା ଲୋକେ ହଇରାଣ ହେବେ । ଏଇଟା ବେପାର ସିଜିନ, କିନ୍ତୁ ଏ ସମୟରେ ଡିଜେକୁ ଭସାଣରେ ବନ୍ଦ କରାଯିବା ନିଷ୍ପତ୍ତି ଦିନ ମଜୁଆରଙ୍କ ପେଟକୁ ସିଧା ଲାତ ମାରୁଛି । ପେଟପାଟଣା ପାଇଁ 20 ହଜାର ପରିବାର ପ୍ରଭାବିତ ହେବ ବୋଲି କହିଛନ୍ତି ‘ସାଉଣ୍ଡ ଆଣ୍ଡ ଲାଇଟ୍’ ଓନର ଆସୋସିଏସନ ସମ୍ପାଦକ ।
ଏହା ମଧ୍ୟ ପଢନ୍ତୁ-କଟକ ଗଣେଶ ପୂଜା; ମଦ ମୁକ୍ତ ହେବ ଭସାଣ, ଡିଜେ ମୁକ୍ତ ରୋଷଣୀ - Ganesh Puja preparation meeting
ଡିଜେ ସାଉଣ୍ଡ ଯୋଗୁଁ ବୃଦ୍ଧଙ୍କ ମୃତ୍ୟୁ ! ଗତବର୍ଷ ପାର୍ବଣ ସମୟରେ ଡିଜେ ବାଜିବା କାରଣରୁ ଜଣେ ବୃଦ୍ଧଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଥିଲା । ତେଣୁ ଚଳିତବର୍ଷ ଡିଜେ ଉପରେ ପ୍ରତିବନ୍ଧକ ଲଗାଇଛି ପୋଲିସ । ପ୍ରତିବର୍ଷ ପାର୍ବଣକୁ ଅପେକ୍ଷା କରିଥାନ୍ତି ଡିଜେ ବାଲା । ଏହି ସମୟରେ ଭଲ ରୋଜଗାର ହୋଇଥାଏ । ଭସାଣରେ ଡିଜେ ବଜାଇବାକୁ ମଧ୍ୟ ପୂଜା କମିଟିଗୁଡିକ ବେଶ ଇଚ୍ଛୁକ । କିନ୍ତୁ ଚଳିତବର୍ଷ ଡିଜେ ଉପରେ ପ୍ରତିବନ୍ଧକ ଡିଜେ ମାଲିକଙ୍କୁ ଶକ୍ତ ଝଟକା ଦେଇଛି ।
ଇଟିଭି ଭାରତ, ଭୁବନେଶ୍ବର
