ଭୁବନେଶ୍ବର: ଦେଶରେ ବାୟୁ ପ୍ରଦୂଷଣ ଏବେ ଉଦବେଗଜନକ ସ୍ଥିତିରେ ରହିଛି । ଏପରିକି ଜାତୀୟ ରାଜଧାନୀ ଦିଲ୍ଲୀର ବାୟୁ ଗୁଣବତ୍ତା ଏବେ ସମସ୍ତଙ୍କ ଚିନ୍ତା ବଢାଇ ଦେଇଛି । ସେହିପରି ରାଜ୍ୟର ବିଭିନ୍ନ ପ୍ରମୁଖ ସହରରେ ମଧ୍ୟ ବାୟୁ ପ୍ରଦୂଷଣ ମାତ୍ରା ବୃଦ୍ଧି ପାଇବାରେ ଲାଗିଛି । ଏହାରି ମଧ୍ୟରେ ଆସନ୍ତାକାଲି (31 ତାରିଖ)ରେ ଦୀପାବଳି ପାଳନ ହେବାକୁ ଯାଉଥିବାରୁ ପ୍ରଦୂଷଣ ବହୁମାତ୍ରାରେ ବଢିବା ସହ ନିୟନ୍ତ୍ରଣ ବାହାରକୁ ଚାଲିଯିବା ନେଇ ମଧ୍ୟ ଆଶଙ୍କା ପ୍ରକାଶ ପାଇଲାଣି । ଚଳିତବର୍ଷ ଦୀପାବଳିକୁ ନେଇ ‘ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ’ ପକ୍ଷରୁ ସ୍ୱତନ୍ତ୍ର ଗାଇଡ଼ଲାଇନ୍ ଜାରି କରାଯାଇଛି ।
- କଣ ରହିଛି ଗାଇଡଲାଇନ:-
୧ କେବଳ ଦୀପ ଜାଳି ଦୀପାବଳି ପାଳନ କରନ୍ତୁ । ସନ୍ଧ୍ୟା ୭ଟାରୁ ରାତି ୯ଟା ପର୍ଯ୍ୟନ୍ତ କମ ଶବ୍ଦ ସୃଷ୍ଟି କରୁଥିବା ବାଣ ଫୁଟାନ୍ତୁ ।
୨ ବିଶେଷ ଭାବରେ ୧୨୫ ଡେସିବେଲରୁ ଅଧିକ ମାତ୍ରାର ଶବ୍ଦ ସୃଷ୍ଟି କରୁଥିବା ବାଣ ବ୍ୟବହାର ଉପରେ କଟକଣା ଜାରି କରାଯାଇଛି । ଅତ୍ୟଧିକ ଶବ୍ଦ ସୃଷ୍ଟି କରୁଥିବା ସିରିଜ୍ ଫାୟାର ବାଣ ଏବଂ ଏଗୁଡିକର ବିସ୍ଫୋରଣଠାରୁ ମଧ୍ୟ ଦୂରେଇ ରହିବାକୁ ପରାମର୍ଶ ଦେଇଛି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ।
୩ ଡାକ୍ତରଖାନା, ଶିକ୍ଷାନୁଷ୍ଠାନ, ନ୍ୟାୟାଳୟ, ଧାର୍ମିକସ୍ଥଳର ୧୦୦ ମିଟର ବ୍ୟବଧାନରେ କୌଣସି ପ୍ରକାର ବାଣ ଫୁଟାଇବାକୁ ଗାଇଡଲାଇନରେ ବାରଣ କରାଯାଇଛି । କେବଳ ଖୋଲା ସ୍ଥାନଗୁଡିକରେ କେବଳ ସବୁଜ ବାଣ (ଗ୍ରୀନ୍ ଫାଏର କ୍ରାକର) ଫୁଟାଇବାକୁ ଅନୁମତି ଦିଆଯାଇଛି ।
୪ ଯାତାୟାତ ରାସ୍ତା କିମ୍ବା ବ୍ୟସ୍ତବହୁଳ ସ୍ଥାନରେ କୌଣସି ଶକ୍ତିଶାଳୀ ବିସ୍ଫୋରଣ ତଥା ଉଚ୍ଚ ଶବ୍ଦ ସୃଷ୍ଟିକାରୀ ବାଣ ଫୁଟାଇବାଠାରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି ।
୫.୧୦ ବର୍ଷରୁ କମ୍ ପିଲାମାନଙ୍କୁ ଅତ୍ୟଧିକ ବିସ୍ଫୋରକ କିମ୍ବା ଉଚ୍ଚ ଶବ୍ଦ ସୃଷ୍ଟିକାରୀ ବାଣ ଦିଅନ୍ତୁ ନାହିଁ ।
୬. ବାଣ ଫୁଟାଇବା ସମୟରେ ସୂତା କପଡା ପିନ୍ଧିବାକୁ ପରାମର୍ଶ ଦିଆଯାଇଛି ।
୭. ସୁପ୍ରିମକୋର୍ଟ ସବୁଜ ବାଣ ବ୍ୟତୀତ କ୍ରାକର ଉତ୍ପାଦନ ଏବଂ ବିକ୍ରୟ ଉପରେ ମଧ୍ୟ ପ୍ରତିବନ୍ଧକ ଲଗାଇଛନ୍ତି । ଫାୟାର କ୍ରାକରରେ ବାରିୟମ ଏବଂ ନିଷିଦ୍ଧ ରାସାୟନିକ ପଦାର୍ଥ ବ୍ୟବହାରକୁ ମଧ୍ୟ ନିଷେଧ କରିଛନ୍ତି ବୋଲି ସ୍ୱତନ୍ତ୍ର ଗାଇଡ଼ଲାଇନରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସ୍ପଷ୍ଟ କରିଛି । ତେବେ ଉପରୋକ୍ତ ଗାଇଡଲାଇନ ଖିଲାପ କଲେ ‘ଓଡ଼ିଶା ଆଇନ-୧୯୫୮’ ଏବଂ ‘ଶବ୍ଦ ପ୍ରଦୂଷଣ ନିୟନ୍ତ୍ରଣ ନିୟମ-୨୦୦୦’ ଅନୁଯାୟୀ ଦଣ୍ଡ ବିଧାନ କରାଯିବ ବୋଲି ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ସ୍ୱତନ୍ତ୍ର ଗାଇଡଲାଇନ ଉଲ୍ଲେଖ ରହିଛି ।
‘ବାଣ ଧୂଆଁ ସ୍ୱାସ୍ଥ୍ୟ ପ୍ରତି ମାରାତ୍ମକ’
ବରିଷ୍ଠ ସ୍ୱାସ୍ଥ୍ୟ ବିଶେଷଜ୍ଞ ତଥା ଭୁବନେଶ୍ବର AIIMSର ପୂର୍ବତନ ନିର୍ଦ୍ଦେଶକ ଡା. ଅଶୋକ ମହାପାତ୍ର କହିଛନ୍ତି, ‘‘ଆମ ସ୍ୱାସ୍ଥ୍ୟ ପାଇଁ ସାଧାରଣ ଧୂଆଁ ଅତ୍ୟଧିକ ଖରାପ । ଏହା ସହ ବାଣ ଧୂଆଁ ମଧ୍ୟ ଆହୁରି ଖରାପ । ଯେଉଁମାନଙ୍କର ଆସ୍ତାମା ସମସ୍ୟା ରହିଛି, ସେମାନଙ୍କ ପାଇଁ ଏହା ବହୁତ ଖରାପ । ବାଣ ଫୁଟାନ୍ତୁ ନାହିଁ ଏହା ବଦଳାରେ ଦୀପ ଲଗାନ୍ତୁ । ଆଧ୍ୟାତ୍ମିକ ପରିବେଶ ସୃଷ୍ଟି କରନ୍ତୁ ।’’
ଇଟିଭି ଭାରତ, ଭୁବନେଶ୍ବର
