ଭୁବନେଶ୍ବର: ଆଉ ଦିନ କେଇଟା ପରେ ଆଲୋକର ପର୍ବ ଦୀପାବଳି । ଏହାକୁ ନେଇ ବଜାରରେ ମେଲିଲାଣି ଭଳିକି ଭଳି ଦୀପର ସମ୍ଭାର । ଏପଟେ ଦୀପ ପ୍ରସ୍ତୁତିରେ ଲାଗି ପଡିଛନ୍ତି ରାଜଧାନୀର ବସ୍ତିରେ ରହୁଥିବା କୁନି କୁନି ପିଲାଏ । ମାଟି ଦୀପ ନୁହଁ ବରଂ ବୈଦ୍ୟଶାସ୍ତ୍ରରେ ଥିବା ପଞ୍ଚଗବ୍ୟ ଆଧାରରେ ଗୋବରରେ ପ୍ରସ୍ତୁତ କରୁଛନ୍ତି ଦୀପ । ନିଜେ ସ୍ୱାବଲମ୍ବୀ ସହ ଭବିଷ୍ୟତକୁ ଆଲୋକିତ କରିବାକୁ ଦୀପ ପ୍ରସ୍ତୁତିରେ ଲାଗି ପଡ଼ିଛନ୍ତି । ପରିବେଶକୁ ସୁରକ୍ଷା ଦେବାକୁ ପାଇଁ ଗୋବର ଦୀପ ତିଆରି କରୁଛନ୍ତି ।
କୁନି ହାତରେ ଦୀପ ତିଆରି:
ପରିବେଶ ଅନୁକୂଳ ଦୀପ ତିଆରି କରିବା ସହ ପରିବେଶ ସୁରକ୍ଷାର ବାର୍ତ୍ତା ପ୍ରଦାନ କରୁଛନ୍ତି ରାଜଧାନୀର ବିଭିନ୍ନ ବସ୍ତିର କୁନି କୁନି ପିଲା । ଗୋବରରେ ଦୀପ ତିଆରି କରି ତା ଉପରେ ନାଲି, ନେଳି, ହଳଦିଆ, ଧଳା, ସବୁଜ ରଙ୍ଗ ଉପରେ ସୁନେଲୀ ରଙ୍ଗ ଦେଇ ଦୀପ ତିଆରି କରୁଛନ୍ତି ସଭିଏଁ । ହାତର ଆଉ ମାତ୍ର କମ ଦିନ ଥିବାରୁ କାହାରୁ ହାତରେ ଯେମିତି ତର ନାହିଁ । କେବଳ ଭୁବନେଶ୍ବରରେ ନୁହଁ ବରଂ ଏହି ଦୀପ ଦିଲ୍ଲୀରେ ମଧ୍ୟ ବିକ୍ରି ହେଉଛି । ସାମାଜିକ ଅନୁଷ୍ଠାନ ଆଶାଏଁ ପକ୍ଷରୁ ଏହି ଦୀପ ତିଆରି କରାଯାଉଛି ।
ଏହା ମଧ୍ୟ ପଢନ୍ତୁ-ଦୀପାବଳିରେ ଘରେ ଲଗାନ୍ତୁ ଏହି ୬ ଗଛ, ପରିବାର ଉପରେ ହେବ ମା' ଲକ୍ଷ୍ମୀଙ୍କ କୃପା
ଏହା ମଧ୍ୟ ପଢନ୍ତୁ-ପ୍ରଦୂଷଣ ଟେନସନ, ଦୀପାବଳିରେ ସତର୍କ ରହିବାକୁ ଏହି ଉପାୟ ଆପଣାନ୍ତୁ
ପଞ୍ଚଗବ୍ୟ ଦୀପ ବା ଗୋବର ଦୀପ କଣ ?
ଦୀପ ତିଆରି କରୁଥିବା ଜଣେ ବସ୍ତି ଝିଅଙ୍କ କହିବା ଅନୁଯାୟୀ, ଗୋମାତାଙ୍କ ୫ଟି ଦ୍ରବ୍ୟରୁ ପ୍ରସ୍ତୁତ ହେଉଛି ଏହି ଦୀପ । ପ୍ରଥମେ ଗୋବରକୁ ସୁଖାଇ ପାଉଡର କରାଯିବା ପରେ, ଏଥିରେ ଗୋଲାପ ଜଳ ମିଶାଯାଏ । ପରେ ଘିଅ, ଦହି, କ୍ଷୀର ଓ ଗୋମୁତ୍ର ମିଶାଇ ଯାଇ ଦୀପ ତିଆରି କରାଯାଏ ।
ଦୀପ ପୋତିଲେ ଗଛ ଉଠିବ:
ଭାରତର ରାଜଧାନୀ ନୂଆଦିଲ୍ଲୀରେ ବିକ୍ରି ହେଉଛି ଗୋବର ଦୀପ । କାହିଁକିନା ଏହି ଦୀପ ପ୍ରକୃତି ସୁହାଇଲା ଭଳି । ଦିଲ୍ଲୀକୁ 2 ହଜାର ଦୀପ ପଠାଇଯାଇଛି । ଏହି ଦୀପକୁ ବ୍ୟବହାର କରିବା ପରେ ଏହାକୁ ମାଟିରେ ପୋତି ଦେଲେ ଗଛ ହେବ । ପାଠ ସହିତ ଏହାକୁ କଲେ ଆମକୁ ଖୁସି ଲାଗୁଛି ବୋଲି କହିଛନ୍ତି ବସ୍ତି ପିଲା ।
ପଞ୍ଚଗବ୍ୟ ଦୀପର ଦାମ କେତେ ?
ପଞ୍ଚଗବ୍ୟ ଦୀପର ଦାମ୍ 25ଟଙ୍କା ରହିଥିବା ବେଳେ ମାଟି ଦୀପର ଦାମ 20ଟଙ୍କା ରହିଛି । ସେହିପରି ଦୀପାବଳି ଗିଫ୍ଟ ହାମ୍ପର ଦାମ୍ ରହିଛି 150ଟଙ୍କା । ଆଶାଏଁ ପକ୍ଷରୁ ପିଲାମାନଙ୍କୁ କ୍ରାଫ୍ଟ ଶିକ୍ଷା ଦିଆଯାଇଥିବା ବେଳେ ଆଗକୁ ବିଭିନ୍ନ କ୍ଷେତ୍ରରେ ପିଲାମାନଙ୍କୁ ସାମିଲ୍ କରାଯିବ ବୋଲି ଆଶାଏଁ ପକ୍ଷରୁ ଏହାର ପ୍ରତିଷ୍ଠାତା ରତ୍ନାକର ସାହୁ କହିଛନ୍ତି ।
ଆଶାଏଁ ପକ୍ଷରୁ ଗୋବର ଦୀପ ତିଆରି ଚାଲିଛି:
ଦିନ ଥିଲା ଏହି କୁନି ହାତବସ ଷ୍ଟାଣ୍ଡ, ରେଲୱେ ଷ୍ଟେସନ୍ରେ ଜରି, ପ୍ଲାଷ୍ଟିଲ୍ ବୋତଲ ଗୋଟାଉଥିଲା, ଆଉ ଏବେ ସେହି ହାତରେ ଦୀପ ତିଆରି କରି ନିଜ ଜୀବନ ପଥକୁ ଆଲୋକିତ କରିବାକୁ ଲାଗି ପଡିଛନ୍ତି ସଭିଏଁ । ରାଜଧାନୀ ଭୁବନେଶ୍ବରର ବିଭିନ୍ନ ବସ୍ତିର ପ୍ରାୟ 150 ପିଲା ଦୀପ ତିଆରିରେ ଲାଗି ପଡିଛନ୍ତି । 5 ହଜାର ଦୀପ ତିଆରି ଚାଲିଛି । ସାମାଜିକ ଅନୁଷ୍ଠାନ ଆଶାଏଁ ପକ୍ଷରୁ ପ୍ରାୟ 5ବର୍ଷ ହେବ ପିଲାମାନଙ୍କୁ ମୁଖ୍ୟସ୍ରୋତରେ ସାମିଲ କରିବାକୁ ଏଭଳି ପ୍ରଶିକ୍ଷଣ ଦିଆଯାଉଛି। ସରକାରୀ ବିଦ୍ୟାଳୟରେ ପାଠ ପଢୁଥିବା ଏହି ପିଲାମାନେ ସ୍କୁଲ ଛୁଟି ପରେ ସମୟ ନଷ୍ଟ ନ କରି ସହରର ବିଭିନ୍ନ ଆପାର୍ଟମେଣ୍ଟ ନିକଟରେ ଷ୍ଟଲ୍ ଖୋଲି ଏହି ସାମଗ୍ରୀଗୁ ଡ଼ିକ ବିକ୍ରି କରୁଥିବା ଦେଖୁବାକୁ ମିଳିଛି । କେବଳ ସେତିକି ନୁହେଁ, ପିଲାମାନଙ୍କ ଦ୍ବାରା ପ୍ରସ୍ତୁତ 2 ହଜାର ପଞ୍ଚଗବ୍ୟ ଦୀପ ଏବେ ନୂଆଦିଲ୍ଲୀର ଏମ୍୩ଏମ୍ ଫାଇଣ୍ଡେସନ୍ ସହଯୋଗରେ ବିକ୍ରି କରାଯାଉଛି ।
ଇଟିଭି ଭାରତ, ଭୁବନେଶ୍ବର
