ରାଉରକେଲା: କାୟା ବିସ୍ତାର କରୁଛି ଡେଙ୍ଗୁ । ରାଉରକେଲାରେ ବର୍ତ୍ତମାନ ଚିନ୍ତା ବଢ଼ାଉଛି ଡେଙ୍ଗୁ । ଦିନକୁ ଦିନ ବଢ଼ିବାରେ ଲାଗିଛି ଡେଙ୍ଗୁ ରୋଗୀଙ୍କ ସଂଖ୍ୟା । ରାଉରକେଲା ସେକ୍ଟର ଅଞ୍ଚଳରୁ ଚିହ୍ନଟ ହେଉଛନ୍ତି ଅଧିକାଂଶ ଲୋକ । ବର୍ତ୍ତମାନ ସୁଦ୍ଧା ସହରର ମହାନଗର ନିଗମ ଅଞ୍ଚଳ ଏବଂ ରାଉରକେଲା ଇସ୍ପାତ କାରଖାନା ଅଞ୍ଚଳରୁ ମିଶାଇ ମୋଟ 300ରୁ ଊର୍ଦ୍ଧ୍ବ ରୋଗୀ ଚିହ୍ନଟ ହେଲେଣି । ଯାହାକୁ ନେଇ ଭୟରେ ସହରବାସୀ ।
ଡରାଉଛି ଡେଙ୍ଗୁ:
ରାଉରକେଲାରେ ଡ଼ାରାଇଲାଣି ଡେଙ୍ଗୁ । ବର୍ତ୍ତମାନ ବର୍ଷା ବଢୁଥିବା ବେଳେ ଆହୁରି ଆକ୍ରାନ୍ତ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି । ରାଉରକେଲା ସହରର ସେକ୍ଟର ଅଞ୍ଚଳରୁ ହିଁ ବହୁ ରୋଗୀ ବାହାରୁ ଥିବାରୁ ଏହି ଅଞ୍ଚଳକୁ ହଟସ୍ପଟ ଅଞ୍ଚଳ ଘୋଷଣା କରାଯାଇଛି । ତେବେ ରାଉରକେଲାର ବିଭିନ୍ନ ହସ୍ପିଟାଲରେ ବର୍ତ୍ତମାନ ମଧ୍ୟ ୧୧୨ ରୋଗୀ ଚିହ୍ନଟ ହୋଇ ଚିକିତ୍ସା ହେଉଛନ୍ତି । ରୋଗୀଙ୍କ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି ।
ଡେଙ୍ଗୁ ନିରାକରଣ ପାଇଁ ପ୍ରସ୍ତୁତ ମହାନଗର ନିଗମ:
ରାଉରକେଲାରେ ଡେଙ୍ଗୁ ବଢ଼ୁଥିବା ବେଳେ ଏନେଇ ମହାନଗର ନିଗମ କମିଶନର ଆଶୁତୋଷ କୂଲକର୍ଣ୍ଣି କହିଛନ୍ତି, "ପୁରା ଘଟଣା ଉପରେ ରାଉରକେଲା ମହାନଗର ନିଗମ, ସ୍ୱାସ୍ଥ୍ୟ ବିଭାଗ ନଜର ରଖିବା ସହିତ ସମସ୍ତ ଔଷଧ ମେଡିକାଲରେ ମହଜୁଦ ରଖାଯାଇଛି । ଟେଷ୍ଟିଂକୁ ବୃଦ୍ଧି କରାଯାଇଛି । ସମସ୍ତ ସ୍ୱାସ୍ଥ୍ୟକେନ୍ଦ୍ର ସହ ହସ୍ପିଟାଲରେ ଡେଙ୍ଗୁକୁ ନେଇ ପ୍ରସ୍ତୁତ ରହିଛି । ବର୍ଷାଦିନେ ଡେଙ୍ଗୁ ମୁକାବିଲା ପାଇଁ ସମସ୍ତ ବ୍ୟବସ୍ଥା ଜାରି ରହିଛି । କୌଣସି ସ୍ଥାନରେ ପାଣି ଜମିବାକୁ ନଦେବା ସହ ଶୋଇବା ସମୟରେ ମଶାରୀ ବ୍ୟବହାର କରିବାକୁ ଲୋକଙ୍କୁ ପରାମର୍ଶ ଦିଆଯାଉଛି । ରାଉରକେଲା ମହାନଗର ନିଗମର ଟିମ ରାଉରକେଲା ମହାନଗର ନିଗମ ଅଞ୍ଚଳ ସହ ସେକ୍ଟର ଅଞ୍ଚଳ ବୁଲି ଡେଙ୍ଗୁ ସଚେତନ କରିବା ସହ ମଶା ଅଣ୍ଡା ଦେଇଥିବା ସ୍ଥାନ, ପାଣି ଜମିଥିବା ସ୍ଥାନକୁ ସାନିଟାଇଜ କରିଛନ୍ତି ।"
କ'ଣ କହୁଛନ୍ତି ରୋଗୀ:
ସେପଟେ ରୋଗୀ କହିଛନ୍ତି ଯେ, ହଠାତ ଜ୍ୱର ହେଉଛି ଏବଂ ଦେହ ଅସୁସ୍ଥ ଲାଗୁଛି । ତେଣୁ ହସ୍ପିଟାଲ ଆସି ଚିକିତ୍ସା ହେଉଛୁ । ରାଉରକେଲା ସହରର ବସ୍ତି ଅଞ୍ଚଳ ଏବଂ ସେକ୍ଟର ଅଞ୍ଚଳରେ ପରିମଳ ସୁବିଧା ଭଲ ନଥିବାରୁ ଏଭଳି ମଶା କାମୁଡିବା ଦ୍ୱାରା ଡେଙ୍ଗୁ ରୋଗ ହେଉଛି । ତେବେ ବର୍ତ୍ତମାନ ସେକ୍ଟର ଅଞ୍ଚଳର ୯୦ ପ୍ରତିଶତ ରୋଗୀ ଚିହ୍ନଟ ହୋଇଛନ୍ତି ।
ଇଟିଭି ଭାରତ, ସୁନ୍ଦରଗଡ଼
