ସମ୍ବଲପୁର: ଡେବ୍ରିଗଡ଼ ଅଭୟାରଣ୍ୟ କେବଳ ଯେ ବନ୍ୟପ୍ରାଣୀ ଓ ଜଙ୍ଗଲ ସଂରକ୍ଷଣରେ ଉଲ୍ଲେଖନୀୟ ଭୂମିକା ଗ୍ରହଣ କରିଛି ତା ନୁହେଁ, ବର୍ତ୍ତମାନ ଏହା ରାଜ୍ୟର ଏକ ପ୍ରମୁଖ ପର୍ଯ୍ୟଟନ ସ୍ଥଳରେ ପରିଣତ ହୋଇଛି । ଏଥର ଏଠାକୁ ରେକର୍ଡ ସଂଖ୍ୟକ ପର୍ଯ୍ୟଟକ ଆସିଛନ୍ତି l କେବଳ ଏତିକି ନୁହେଁ ସାରା ରାଜ୍ୟରେ ଇକୋ ଟୁରିଜିମରେ ଚଳିତ ଥର ଏଠାରେ ସର୍ବାଧିକ ରାଜସ୍ୱ ଆଦାୟ ହୋଇଥିବା ସୂଚନା ମିଳିଛି l ପର୍ଯ୍ୟଟନ ହବ୍ ଭାବେ ରାଜସ୍ବ ବୃଦ୍ଧି ସହିତ ଅଭୟାରଣ୍ୟ ଉପରେ ନିର୍ଭରଶୀଳ ସ୍ଥାନୀୟ ବାସିନ୍ଦାଙ୍କୁ ବର୍ଷ ତମାମ ରୋଜଗାର ଯୋଗାଇ ସେମାନଙ୍କ ଅର୍ଥନୈତିକ ଓ ସାମାଜିକ ବିକାଶରେ ସହାୟକ ହୋଇପାରିଛି l
2023-24 ଆର୍ଥିକ ବର୍ଷରେ ଇକୋ ଟୁରିଜିମ କ୍ଷେତ୍ରରେ ଏଠାରେ ରାଜ୍ୟର ସବୁଠାରୁ ଅଧିକ ରାଜସ୍ୱ ଆଦାୟ ହୋଇଥିବା ସୂଚନା ମିଳିଛି l 3.45 କୋଟି ରାଜସ୍ବ ସଂଗ୍ରହ କରି ସମଗ୍ର ରାଜ୍ୟରେ ରେକର୍ଡ଼ ସୃଷ୍ଟି କରିଛି ଡେବ୍ରିଗଡ । 23-24 ଆର୍ଥିକ ବର୍ଷରେ ଅଭୟାରଣ୍ୟରେ ପ୍ରାୟ 70 ହଜାର ଦେଶୀ ଓ ବିଦେଶୀ ପର୍ଯ୍ୟଟକଙ୍କ ଆଗମନ ହୋଇଥିଲା l ରାଜ୍ୟ ବାହାର ସହ ଆମେରିକା, ଅଷ୍ଟ୍ରେଲିଆ, ଋଷିଆ, ଇଂଲଣ୍ଡର ପର୍ଯ୍ୟଟକ ଡେବ୍ରିଗଡ଼ ଆସିଛନ୍ତି l ଏନେଇ ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀ ଅଂଶୁପ୍ରଜ୍ଞା ଦାସ ସୂଚନା ଦେଇଛନ୍ତି ।
ଏହା ମଧ୍ୟ ପଢନ୍ତୁ-କମ୍ୟୁନିଟି ଇକୋ ଟ୍ୟୁରିଜିମର ସଫଳ ରୂପାୟନ, ପର୍ଯ୍ୟଟକଙ୍କୁ ଆକୃଷ୍ଟ କରୁଛି ଡେବ୍ରିଗଡ
2022-23 ଆର୍ଥିକ ବର୍ଷରେ ମାତ୍ର 30 ହଜାର ପର୍ଯ୍ୟଟକଙ୍କ ଆଗମନ ହୋଇଥିବା ବେଳେ ରାଜସ୍ବ ସଂଗ୍ରହ ମାତ୍ର 2.5 କୋଟିରେ ସୀମିତ ରହିଥିଲା । 23-24 ଆର୍ଥିକ ବର୍ଷ ଆସିଥିବା ପର୍ଯ୍ୟଟକଙ୍କ ମଧ୍ୟରେ ଓଡ଼ିଶାର ସର୍ବାଧିକ 50% ପର୍ଯ୍ୟଟକ ଥିବାବେଳେ ପଶ୍ଚିମବଙ୍ଗରୁ ପ୍ରାୟ 20% ଓ ଦେଶର ଅନ୍ୟ ରାଜ୍ୟ ଓ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ପ୍ରାୟ 30% ରହିଛି । ଏଠାରେ ପର୍ଯ୍ୟଟକଙ୍କ ପାଇଁ ସଫାରି, କୁଜ୍, ଟ୍ରାକିଂ, ହାଇକିଂ, କାୟାକିଂ ସହିତ ବିଦେଶୀ ତଥା ବିରଳ ପକ୍ଷୀ ଦେଖିବା ଆଦିର ସୁଯୋଗ ରହିଛି । ଏହି ଇକୋ ଟୁରିଜିମ ପରିଚାଳନା କ୍ଷେତ୍ରରେ ଆଖ ପାଖ ଗାଁର 87 ପରିବାର ମୁଖ୍ୟ ଭୂମିକା ଗ୍ରହଣ କରିଛନ୍ତି l ଏହି 87 ପରିବାରର ସଦସ୍ୟ ଯେଉଁମାନେ ଏଠାରେ ବିଭିନ୍ନ କାର୍ଯ୍ୟରେ ନିୟୋଜିତ ଅଛନ୍ତି ତାଙ୍କ କଠିନ ପରିଶ୍ରମ, ପ୍ରତିବଦ୍ଧତା ଓ ଅନୁଶାସନ ଯୋଗୁଁ ଏଠାରେ ରାଜସ୍ବ ସଂଗ୍ରହ ଶୀର୍ଷ ଛୁଇଁବା ସମ୍ଭବ ହୋଇପାରିଛି ବୋଲି କହିଛନ୍ତି DFO ଅଂଶୁପ୍ରଜ୍ଞା ଦାସ l
ଏଠାରେ ଭିତ୍ତିଭୂମିର କୌଣସି ଉନ୍ନତି କରାଯାଇନାହିଁ କେବଳ ଅଭୟାରଣ୍ୟ ଆଖପାଖ ଗାଁ ଲୋକଙ୍କୁ ଅନ୍ୟତ୍ର ଥଇଥାନ ଦ୍ୱାରା ବନ୍ୟପ୍ରାଣୀ ସଂଖ୍ୟା ବୃଦ୍ଧି ହୋଇଛି ଓ ଏହାଦ୍ୱାରା ପର୍ଯ୍ୟଟକଙ୍କ ପାଇଁ ବନ୍ୟଜନ୍ତୁ ଦେଖିବାର ସମ୍ଭାବନା ବୃଦ୍ଧି ପାଇଛି l ଏହାସହ ଅନୁଶାସନ, ପର୍ଯ୍ୟଟକଙ୍କ ସୁରକ୍ଷା ଓ କୌଣସି ସମସ୍ୟାର ଶୂନ୍ୟ ସମ୍ଭାବନା ପର୍ଯ୍ୟଟନଙ୍କୁ ବହୁ ପରିମାଣରେ ଆକର୍ଷିତ କରୁଛି l
ହୀରାକୁଦ ବନ୍ୟପ୍ରାଣୀ DFOଙ୍କ ସୂଚନା ଅନୁସାରେ, ଏଠାରେ ଗୟଳ, ସମ୍ବର, ହରିଣ, ବଣୁଆ ମଇଁଷି, କଲରାପତରିଆ ବାଘ, ଭାଲୁ, ଲଙ୍ଗୁର, ବାରହା, ମୟୂର ଭଳି ବନ୍ୟପ୍ରାଣୀ ସହିତ ଏଠାରେ ୟୋଲୋ ବାଇଲ୍ଡ ଡକ୍, ବ୍ଲାକ ଇବିସ୍, ଗ୍ଲୋସି ଇବିସ୍, ଗୁଲସ , ପ୍ରାଟିନ୍କୋଲେସ, ମୁରହେନ୍ସ, ଓପନ ବାଇଲ୍ଡ ଷ୍ଟର୍କ ଆଦି ବିଦେଶୀ ପକ୍ଷୀ ଦେଖିବାର ସମ୍ପୂର୍ଣ୍ଣ ସମ୍ଭାବନା ରହିଛି । ଏଭଳି ଏକ ବିଶାଳ ଆଉ ବିସ୍ତୀର୍ଣ୍ଣ ଅଭୟାରଣ୍ୟକୁ ସମ୍ପୂର୍ଣ୍ଣ ପ୍ଲାଷ୍ଟିକ ମୁକ୍ତ କରାଯାଇ ପରିବେଶ ଅନୁକୂଳ କ୍ଷେତ୍ରରେ ଏକ ଉଦାହରଣ ସୃଷ୍ଟି କରିଛି । ଏଥିପାଇଁ ପ୍ରକୃତ ଶ୍ରେୟର ଅଧିକାରୀ ସ୍ଥାନୀୟ ଆଖପାଖ ଗାଁର ଅଧିବାସୀ ଓ ଅଭୟାରଣ୍ୟରେ ବିଭିନ୍ନ ପର୍ଯ୍ୟଟନ କ୍ଷେତ୍ର ପରିଚାଳନାରେ ନିୟୋଜିତ ଥିବା 87 ପରିବାର ସଦସ୍ୟ ବୋଲି DFO ସୂଚନା ଦେଇଛନ୍ତି l
ଇଟିଭି ଭାରତ, ସମ୍ବଲପୁର
