କେନ୍ଦ୍ରାପଡା/ଭଦ୍ରକ/ବାଲେଶ୍ବର: ମଧ୍ୟରାତ୍ରିରେ ଲ୍ୟାଣ୍ଡଫଲ କରିବାକୁ ଯାଉଥିବା ଆସନ୍ନ ବାତ୍ୟା ‘ଦାନା’ ଓଡିଶା ଉପକୂଳର ନିକଟତର ହେଉଛି । ଲ୍ୟାଣ୍ଡଫଲ ପୂର୍ବରୁ ଏହାର ପ୍ରାକ-ପ୍ରଭାବ ଉତ୍ତର ଉପକୂଳରେ ଆରମ୍ଭ ହୋଇସାରିଛି । ଆଜି ସକାଳୁ ବର୍ଷା ସହ ହାଲୁକା ପବନ ବୋହିବା ଆରମ୍ଭ କରିଛି । ବିଶେଷ ଭାବେ କେନ୍ଦ୍ରପଡା, ଭଦ୍ରକ, ବାଲେଶ୍ବରରେ ବାତ୍ୟାର ପ୍ରଭାବ ଅନୁଭୂତ ହେବା ଆରମ୍ଭ କରିସାରିଛି ।
କେନ୍ଦ୍ରାପଡାରେ ପବନରେ ଗଛ ଭାଙ୍ଗିଲା: -
ପୂର୍ବ କେନ୍ଦ୍ରପଡାରେ ଗତକାଲିଠାରୁ ବର୍ଷା ଜାରି ରହିଛି । ଆଜି ସକାଳୁ ବର୍ଷାର ପରିମାଣ ମଧ୍ୟ ବଢିଛି । ତୁହାକୁ ତୁହା ଝଟକା ପବନ ମଧ୍ୟ ବୋହିବା ଆରମ୍ଭ କରିଛି । କେନ୍ଦ୍ରାପଡା ବ୍ଲକ ଅଧୀନ ଖମାରସାହି ପଞ୍ଚାୟତର କିଛି ସ୍ଥାନରେ ବଡ଼ ବଡ଼ ଗଛ ସବୁ ଉପୁଡି ପଡିଥିବା ଦେଖିବାକୁ ମିଳିଛି । ଯୋଗାଯୋଗ ସାମୟିକ ବିଛିନ୍ନ ହୋଇଛି । ସ୍ଥାନୀୟ ଜନପ୍ରତିନିଧି ଓ ଗ୍ରାମବାସୀଙ୍କ ଦ୍ବାରା ଏହି ଗଛଗୁଡିକୁ କଟାଯାଇ ରାସ୍ତା ସଫା କରାଯାଇଛି ।
ଭଦ୍ରକରେ ବର୍ଷା ସାଙ୍ଗକୁ ପବନ:-
ସେହିପରି ସର୍ବାଧିକ ପ୍ରଭାବିତ ହେବାକୁ ଥିବା ଅନ୍ୟତମ ଜିଲ୍ଲା ଭଦ୍ରକରେ ମଧ୍ୟ ଅନ୍ୟ ଉପକୂଳବର୍ତ୍ତୀ ଜିଲ୍ଲା ପରି ସମାନ ସ୍ଥିତି ଦେଖିବାକୁ ମିଳିଛି । ଧାମରା, ଚାନ୍ଦବାଲି, ଧାମନଗର ଓ ଏହାର ଆଖପାଖ ଅଞ୍ଚଳରେ ପବନର ଗତି ବଢିବା ସାଙ୍ଗକୁ ହାଲୁକା ବର୍ଷା ଆରମ୍ଭ ହୋଇଛି । ସମୁଦ୍ର ମଧ୍ୟ ଅଶାନ୍ତ ହେବାରେ ଲାଗିଛି ।
ବାଲେଶ୍ବରରେ ବଢୁଛି ବର୍ଷା:
ଉତ୍ତର-ଉପକୂଳ ଜିଲ୍ଲା ବାଲେଶ୍ବରରେ ବାତ୍ୟାର ପ୍ରଭାବ ଆରମ୍ଭ ହୋଇଗଲାଣି । ଜିଲ୍ଲାରେ ଗତକାଲି ସଂଧ୍ୟାରୁ ବର୍ଷା ଆରମ୍ଭ ହୋଇଥିବା ବେଳେ ଆଜି ସକାଳେ ବର୍ଷାର ପରିମାଣ ବଢିଛି । ପବନର ବେଗ ମଧ୍ୟ କ୍ରମଶଃ ତୀବ୍ର ହେବାରେ ଲାଗିଛି । ସମୁଦ୍ର ମଧ୍ୟ ଅଶାନ୍ତ ହେବା ଆରମ୍ଭ କରିଛି । ଧିରେ ଧିରେ ବର୍ଷା ଓ ପବନର ବେଗ ବଢିବ । ଆଜି ଅପରାହ୍ନ ସୁଦ୍ଧା ପ୍ରାୟ ୪୦ ରୁ ୫୦ କି.ମି ବେଗରେ ପବନ ବୋହିବା ନେଇ ପୂର୍ବାନୁମାନ କରାଯାଉଛି । ମଧ୍ୟରାତ୍ରିରେ ବାତ୍ୟା ଧାମରା ଓ ଭିତରକନିକା ମଧ୍ୟରେ ବାତ୍ୟା ମଧ୍ୟରାତ୍ରିରେ ଲ୍ୟାଣ୍ଡଫଲ କରିବ ।
The severe cyclonic storm “DANA” (pronounced as Dana) over northwest & adjoining central Bay of Bengal moved north-northwestwards with a speed of 12 kmph during past 6 hours and lay centred at 0830 hrs IST of today, the 24th October, over northwest Bay of Bengal, near latitude… pic.twitter.com/6uQs63lztL
— India Meteorological Department (@Indiametdept) October 24, 2024
ବ୍ୟୁରୋ ରିପୋର୍ଟ, ଇଟିଭି ଭାରତ
