ଭୁବନେଶ୍ବର: ରାଜଧାନୀରେ ମାତିଛନ୍ତି ସାଇବର ଠକ । ବଡ଼ଧରଣର ସାଇଫ୍ରଡ ନେଟୱାର୍କର ଆଜି ଖୁଲାସା କରିଛି କମିଶନରେଟ ପୋଲିସ । ଆପାର୍ଟମେଣ୍ଟରେ ଚାଲୁଥିଲା ଫେକ କଲ ସେଣ୍ଟର । ସାଇବର ଫ୍ରଡକଲ କରୁଥିବା ସେଣ୍ଟରକୁ ଠାବ କରିଛି କମିଶନରେଟ ପୋଲିସ । ସୁନ୍ଦରପଦାର ଏକ ଆପାର୍ଟମେଣ୍ଟରୁ 6 ଜଣଙ୍କୁ ଅଟକ ରଖିଛି । ଲାପଟପ, ମୋବାଇଲ, ଇଣ୍ଟରନେଟ ରାଉଟରକୁ ଜବତ କରିଛି ପୋଲିସ ।ସାଇବର ଏକ୍ସପର୍ଟଙ୍କ ଜରିଆରେ ଏହି ରାକେଟର ଠକାମିର ତରିକା ଯାଞ୍ଚ କରିଛି ପୋଲିସ । ପ୍ରଥମିକ ତଦନ୍ତରୁ ଜଣାପଡ଼ିଛି ଏମାନେ ଓଡ଼ିଶାରୁ ଟଙ୍କାଟିଏ ଠକି ନାହାନ୍ତି ବରଂ ଠକମି ପାଇଁ ଏମାନେ ଦେଶ ବାହାରକୁ କଲ କରୁଥିଲେ । ଏପରିକି ଇ-ମେଲ ଜରିଆରେ ବିଭିନ୍ନ ଲିଙ୍କ୍ ପଠାଇ ଲଟୁ ଥିଲେ ଟଙ୍କା ।
ଭଡା ଘରେ ଚାଲିଥିଲା କଲ ସେଣ୍ଟର:
ଭୁବନେଶ୍ବର ଡିସିପି ପିନାକ ମିଶ୍ର କହିଛନ୍ତି, ‘ଭୁବନେଶ୍ବର ସୁନ୍ଦରପଦା ଅଞ୍ଚଳର କାଞ୍ଚନ ଟାଓ୍ବାର ଆପାର୍ଟମେଣ୍ଟରେ କମିଶନରେଟ ପୋଲିସ ଚଢାଉ କରିଛି । ଏଠାରେ ଫେକ କଲ ସେଣ୍ଟର ଠାବ କରାଯାଇଛି । ଏକ ଭଡା ଘରେ ଏହି କଲ ସେଣ୍ଟର ଚାଲୁଥିଲା । କାଞ୍ଚନ ଟାଓ୍ବାର ବ୍ଲକ-ଏ 205 ନମ୍ବର ଫ୍ଲାଟରେ ଚଢାଉ କରିଛି ପୋଲିସ ।’
6 ଅଭିଯୁକ୍ତ ଅଟକ:
ସୂଚନା ଥାଉକି, କାଞ୍ଚନ ଟାୱାର ଆପାର୍ଟମେଣ୍ଟରେ ନକଲି କଲ ସେଣ୍ଟର ଚାଲିଥିବା ଖବର ପାଇଥିଲା ପୋଲିସ । ଆଜି ଟିମ ସହ ଚଢାଉ କରିଥିଲା କମିଶନରେଟ ପୋଲିସ । ଏଇଠୁ ଲୋକଙ୍କୁ ଫ୍ରଡ କଲ କରି ଠକୁଥିଲେ ସାଇବର ଠକ । ତେବେ ପୋଲିସ ଏହି ନକଲି କଲ ସେଣ୍ଟର ଚଳାଉଥିବା 6 ଜଣଙ୍କୁ ଅଟକ ରଖିଛି । ସେମାନଙ୍କ ଠାରୁ ଲାପଟପ, ମୋବାଇଲ ସମେତ ଅନେକ ସାମଗ୍ରୀ ଜବତ କରାଯାଇଛି । ତେବେ ଘଟଣାର ଖୋଳତାଡ କରୁଛି କମିଶନରେଟ ପୋଲିସ । ତଦନ୍ତ ପରେ ଜଣାପଡିବ କିଏ କିଏ ଏହି ନେଟୱାର୍କରେ ସାମିଲ ଅଛନ୍ତି । କେମିତି ଲୋକଙ୍କୁ ଚୂନ ମରାଯାଉଥିଲା ତାହାର ତଦନ୍ତ କରୁଛି ପୋଲିସ ।
ଏହା ମଧ୍ୟ ପଢନ୍ତୁ: |
ନେଟଓ୍ବାର୍କ ପାଇଁ ରିପିଟର ବ୍ୟବହାର କରୁଥିଲେ:
ଅତ୍ୟାଧୁନିକ ଟେକ୍ନୋଲୋଜି ବ୍ୟବହାର କରୁଥିଲେ ସାଇବର ଠକ । ଲାପଟପ୍ ଓ ମୋବାଇଲ ସହ ସ୍ବତନ୍ତ୍ର ଇଣ୍ଟରନେଟ୍ କନେକ୍ସନ ନେଇ ଲୋକଙ୍କୁ ଠକୁ ଥିଲେ । ପୋଲିସର ଚଢାଉ ବେଳେ ରିପିଟର ଓ ବ୍ୟବହାର କରୁଥିବା ନେଟୱର୍କ ସମ୍ପର୍କିତ ସାମଗ୍ରୀ ସବୁ ଜବତ ହୋଇଛି ।
ଅପରାଧୀଙ୍କ ଆଡ୍ଡାସ୍ଥଳୀ ପାଲଟିଛି କି ରାଜଧାନୀ:
ପୂର୍ବରୁ ମଧ୍ୟ ସିମବକ୍ସ ରାକେଟ ଧରିଥିଲା ପୋଲିସ । ଏଥିରେ ବାଂଲାଦେଶ ଲିଙ୍କ ସାମ୍ନାକୁ ଆସିଥିଲା । ବାଂଲାଦେଶ ଯୁବକ ପଶ୍ଚିମବଙ୍ଗ ଯୁବକ ସହାୟତାରେ ଭୁବନେଶ୍ବରରେ ଲଗାଇଥିଲା ସିମବକ୍ସ । ଯାହାକି ବିଦେଶକୁ କଲ୍ କରାଯାଉଥିଲା । ଏହି ଘଟଣାର ଖୋଳତାଡ ପୋଲିସ କରିଥିବା ବେଳେ ପୁଣି ସାମ୍ନାକୁ ଆସିଛି ନକଲି କଲ ସେଣ୍ଟର ।
ଇଟିଭି ଭାରତ, ଭୁବନେଶ୍ବର
