ଭୁବନେଶ୍ବର: ଆସିଛି ବହୁ ଚର୍ଚ୍ଚିତ ହଂସପାଳ ହତ୍ୟାକାଣ୍ଡର ରାୟ । ଯେଉଁଥିରେ ସାଙ୍ଗ ନେଇ ଥିଲା ଆଉ ଏକ ସାଙ୍ଗର ଜୀବନ । ଭୁବନେଶ୍ବର ଏଡିଜେ ୨ କୋର୍ଟ ଅଭିଯୁକ୍ତକୁ ଆଜୀବନ କରାଦଣ୍ଡରେ ଦଣ୍ଡିତ କରିଛନ୍ତି । ସୂଚନା ଅନୁଯାୟୀ ୨୦୧୭ ମସିହାରେ ୨୧ ମେ ଦିନ ସନ୍ଧ୍ୟା ୭ଟା ସମୟରେ ଏହି ହଚ୍ୟାକାଣ୍ଡ ଘଟିଥିଲା । ଘର ମାଲିକ ସୁର୍ଯପ୍ରସାଦ ପଟ୍ଟନାୟକଙ୍କ ଘରେ ରହୁଥିବା ୧୦ରୁ ୧୨ଜଣ କପଡା ବ୍ୟବସାୟୀ ଙ୍କ ମଧ୍ୟରୁ ମହମ୍ମଦ ଜାହାଙ୍ଗୀର ଓରଫ ବଲ୍ଲା ନାମକ ଯୁବକଙ୍କ ହତ୍ୟା ହୋଇଥିଲା । ସେ ରହୁଥିବା ସ୍ଥାନର ବାରଣ୍ଡାରେ ରକ୍ତାକ୍ତ ଅବସ୍ଥାରେ ମିଳିଥିଲା ମୃତଦେହ । ସେ ପଶ୍ଚିମବଙ୍ଗ ର ଚବିଶ ପ୍ରଗନାରୁ ଆସି ନିଜର କିଛି ସହଯୋଗୀଙ୍କ ସହ ରହି କପଡା ବ୍ୟବସାୟୀ କରୁଥିଲା ।
ପୋଲିସ ତଦନ୍ତରୁ ଜଣା ପଡିଥିଲା ଯେ ପୁର୍ବରୁ ସହଯୋଗୀ ମହମ୍ମଦ ରହମତୁଲାର ସ୍ତ୍ରୀର ଚରିତ୍ରକୁ ଆକ୍ଷେପ କରି କିଛି ଅପଶବ୍ଦ କହିଥିଲା ବଲ୍ଲା । ଯାହାର ରାଗ ରଖି ସେଦିନ ରହମତୁଲା ନିଜର ଏକ ବ୍ଲେଡ ଯୋଗେ ବଲ୍ଲାର ବେକକୁ ଅତି ନିର୍ମମ ଭାବେ କାଟି ହତ୍ୟା କରି ଫେରାର ହୋଇଯାଇଥିଲା । ଏନେଇ ମଞ୍ଚେଶ୍ବର ପୋଲିସ ସହ ସାଇଣ୍ଟିଫିକ୍ ଟିମ୍ ତଦନ୍ତ କରି ଅଭିଯୁକ୍ତ ରହମତୁଲାକୁ ଭୁବନେଶ୍ବର ରେଳ ଷ୍ଟେସନରୁ ଯିବା ବେଳେ ଗିରଫ କରିଥିଲା । ପରେ ତାକୁ ୩୨୦ ଦଫାରେ ହତ୍ୟା ମାମଲାରେ କୋର୍ଟ ଚାଲାଣ କରାଯାଇଥିଲା । ଏଇ ଘଟଣାର ତଦନ୍ତ ପରେ ଚାର୍ଜସିଟ ସହ ସମସ୍ତ ସାକ୍ଷୀ ପ୍ରମାଣ କୋର୍ଟରେ ଦାଖଲ କରିଥିଲା ପୋଲିସ । ଏନେଇ ଏହାର ୫ ବର୍ଷ ପରେ ୮ ଜଣ ସାକ୍ଷୀ ଓ ୨୭ଟି ଦସ୍ତାବିଜ ଆଧାରରେ ହତ୍ୟାକାରୀ ମହମ୍ମଦ ରହମତୁଲା ବିରୋଧରେ ବଳିଷ୍ଠ ଯୁକ୍ତି ବାଢ଼ିଥିଲେ ସରକାରୀ ଓକିଲ ସଲିଳ ପ୍ରଧାନ ।
ଏହା ମଧ୍ୟ ପଢନ୍ତୁ ... ଗୁଣିଗାରେଡ଼ିରୁ ପିଟି ପିଟି ହତ୍ୟା ଘଟଣା; 11 ଗିରଫଙ୍କୁ କୋର୍ଟ ଚାଲାଣ
ଏନେଇ ସମସ୍ତ ସାକ୍ଷ୍ୟ ପ୍ରମାଣ ଓ ପ୍ରତ୍ୟକ୍ଷଦର୍ଶୀଙ୍କ ବୟାନ ଆଧାରରେ ଦୋଷୀକୁ ଆଜୀବନ ସଜ୍ଜା ଶୁଣାଇଥିଲେ ଏଡିଜେ ୨ କୋର୍ଟ । ଏଥି ସହ ଅନାଦେୟ ୫୦୦୦୦ଟଙ୍କା ଜରିମାନା ସହ ୧ବର୍ଷ ଅଧିକ ଦଣ୍ଡ ଶୁଣାଇଥିଲେ କୋର୍ଟ । ତେବେ ଠିକ ସମୟରେ କେସର ଚାର୍ଜସିଟ୍ ଓ କେସ କ୍ଲୋଜ ଯୋଗୁଁ ଶୀଘ୍ର ଦଣ୍ଡ ବିଧାନ ହେବାରେ ସଫଳ ହୋଇଛି ପୋଲିସ । କାରଣ ଠିକ କିଛି ଦିନ ପୂର୍ବରୁ ଖଣ୍ଡଗିରି ଟ୍ରିପଲ ମର୍ଡର ଘଟଣାରେ ମଧ୍ୟ ଅଭିଯୁକ୍ତକୁ ଆଜୀବନ ସଜ୍ଜା ଶୁଣାଇଥିଲେ କୋର୍ଟ । ସେହିପରି ପୁର୍ବରୁ ଚନ୍ଦୁ ହତ୍ୟାକାଣ୍ଡ ଭଳି ଅନେକ ହାଇପ୍ରୋଫାଇଲ ଘଟଣାର ଧିରେ ଧିରେ ଫିଟୁଛି ଗୁମର ।
ଇଟିଭି ଭାରତ, ଭୁବନେଶ୍ବର
