ଭୁବନେଶ୍ବର: ନିର୍ବାଚନ ବେଳେ ଜାମିନ ବିହୀନ ଗିରଫ ପରଓ୍ବାନାରେ ଥିବା ଦାଗିଙ୍କୁ ଖୋଜିବା ଆରମ୍ଭ କରିଛି କମିଶନରେଟ ପୋଲିସ । ରାଜଧାନୀରେ ଫେରାର ଦାଗିଙ୍କ ପାଇଁ ଜାରି ହେଲା ଲଟକା । ଜାମିନ ବିହୀନ ଓ୍ବାରେଣ୍ଟ ବା NBW ଲାଗିଥିବା ଦାଗିଙ୍କ ଘର ଆଗରେ ଲଟକା ଲଗାଇଛି ପୋଲିସ । ଅର୍ଥାତ ଘରେ କି ସ୍ଥାନୀୟ ଅଞ୍ଚଳରେ ନଥିଲେ ମଧ୍ୟ ଯେଉଁଠି ଥିଲେ ତୁରନ୍ତ ସ୍ଥାନୀୟ ଥାନାରେ ଆତ୍ମସମର୍ପଣ କରିବାକୁ କୁହାଯାଇଛି । ନଚେତ କୌଣସି ମୁହୂର୍ତ୍ତରେ ପୋଲିସ ଉଠାଇନେବ । ପୂର୍ବରୁ କମିଶନରେଟ ପୋଲିସର ଓ୍ବେବସାଇଟରେ ଏହି ଦାଗିଙ୍କ ତାଲିକା ଜାରି କରାଯାଇଥିବା ବେଳେ ଏବେ ସିଧା ସେମାନଙ୍କ ଘରକାନ୍ଥ ଓ ଅନ୍ୟ ସାର୍ବଜନୀନ ସ୍ଥାନରେ ଏହାକୁ ଲଗାଯାଇଛି ।
ଏନେଇ ପୋଲିସ କମିଶନର ସଞ୍ଜୀବ ପଣ୍ଡା କହିଛନ୍ତି, ‘‘ଆମର ଇଲେକ୍ସନ ଏନଫୋର୍ସମେଣ୍ଟ ବେଶ ଭଲ ଭାବେ ଚାଲିଛି । ଗତ ଜାନୁଆରୀରୁ ଏହି ଏନଫୋର୍ସମେଣ୍ଟ ପ୍ରକ୍ରିୟା ଜାରି ରହିଛି । ଗତ ଚାରିମାସ ହେବ NBW ଡ୍ରାଇଭ ଅଧୀନରେ ମୋଟ ୪୫୭ ଜଣଙ୍କୁ କୋର୍ଟରେ ହାଜର କରାଯାଇଛି । ଯେଉଁମାନେ ଦାଗି ରହିଛନ୍ତି, ସେମାନଙ୍କୁ ପୋଲିସ ଖୋଜିବା ଜାରି ରଖିଛି । ଦୀର୍ଘ ଦିନ ହେବ ଯେଉଁମାନଙ୍କ ନାଁରେ NBW ଜାରି ହୋଇଛି, ସେମାନଙ୍କୁ ପୋଲିସ କୋର୍ଟରେ ସରେଣ୍ଡର କରିବାକୁ କହୁଛି, ନଚେତ ବିଭିନ୍ନ ସ୍ଥାନରେ ଚଢାଉ କରି ଗିରଫ କରିବା ପରେ କୋର୍ଟରେ ହାଜର କରୁଛି । ଲୋକଙ୍କ ସହାୟତାରେ NBW ଦାଗିଙ୍କୁ ଧରିବା ପାଇଁ ସେମାନଙ୍କ ତାଲିକା କମିଶନରେଟ ପୋଲିସ ଓ୍ବେବସାଇଟରେ ଜାରି କରାଯାଇଥିଲା । ଏବେ ସେମାନଙ୍କୁ ସିଧାସଳଖ ଅବଗତ ପାଇଁ ବିଭିନ ପଞ୍ଚାୟତ ଅଫିସ୍ ଓ ଥାନାର ନୋଟିସ ବୋର୍ଡରେ ଏହି ତାଲିକା ଲଗାଯାଇଛି । ଏଥିସହ ଯେଉଁ ଦାଗିମାନେ ଘରେ ନାହାନ୍ତି, ସେମାନଙ୍କ ଘରେ ମଧ୍ୟ ପୋଲିସ ଏହି ଲଟକା ଜାରି କରିଛି ।’’
ଅଧିକ ଦିନ ଧରାନପଡ଼ି ଲୁଚି ରହିଲେ କୋର୍ଟ ସେମାନଙ୍କ ନାମରେ ଓ୍ବାରେଣ୍ଟ ଜାରି କରିଥାନ୍ତି । ଫଳରେ NBW ଭୟରେ ବେଶୀ ଦିନ ଲୁଚି ପାରିବେନି । କିନ୍ତୁ ଦୀର୍ଘ ଦିନ ଧରି ଅନେକ ମାମଲା ବିଭିନ୍ନ ଥାନା ଅଧୀନରେ ପଡ଼ି ରହିଥିଲା । ଯେଉଁମାନଙ୍କ ପାଇଁ ନିର୍ବାଚନ ପ୍ରଭାବିତ ହେବା ଆଶଙ୍କା କରି ଏଭଳି ଦାଗୀଙ୍କୁ ଧରିବା ପାଇଁ ପୋଲିସ ରଣନୀତି ଆରମ୍ଭ କରିଛି । ତେବେ କମିଶନରେଟ ପୋଲିସ ଅଧୀନରେ ଥିବା ଦାଗୀଙ୍କୁ ଧରିବା ପାଇଁ ପୋଲିସ ଡ୍ରାଇଭ ଜାରି ରଖିଥିଲା । ଏଥିପାଇଁ ଟ୍ବିନସିଟିରେ ଥିବା ୪୧୧୯ ଜଣ ଓ୍ବାରେଣ୍ଟ ତାଲିକାକୁ ସାର୍ବଜନୀନ କରିଥିଲା ପୋଲିସ । ଭୁବନେଶ୍ୱରରେ ୨୯୩୪ ଜଣଙ୍କ ନାମରେ ଓ୍ବାରେଣ୍ଟ ରହିଥିବା ବେଳେ କଟକରେ ୧୧୮୫ ଜଣ ନାମରେ ବିଭିନ୍ନ ଥାନାରେ ଓ୍ବାରେଣ୍ଟ ରହିଥିଲା । ତେବେ ୪୫୭ ଜଣଙ୍କୁ ପୋଲିସ ନିଜ ଆଡୁ ନେଇ କୋର୍ଟରେ ହାଜର କରିବା ପରେ ନିଜ ଆଡୁ 1965 ଜଣ ଦାଗି ମଧ୍ୟ କୋର୍ଟରେ ଆତ୍ମସମର୍ପଣ କରି ‘ରିକଲ ନୋଟିସ’ ଆଣିଛନ୍ତି ।
ଇଟିଭି ଭାରତ, ଭୁବନେଶ୍ବର
