ପୁରୀ: ଚଳିତ ବର୍ଷର ରଥଯାତ୍ରା ପାଇଁ ଆରମ୍ଭ ହୋଇଛି ରଥ ନିର୍ମାଣ କାର୍ଯ୍ୟ । ତେବେ ରଥ ନିର୍ମାଣ ପାଇଁ ଆବଶ୍ୟକ ଥିବା ଫାଶୀ କାଠ ଓଡ଼ିଶାର ବିଭିନ୍ନ ଅଞ୍ଚଳରୁ ମିଳିବା କଷ୍ଟକର ହେଉଥିବା ରଥଯାତ୍ରା ସମନ୍ବୟ କମିଟି ବୈଠକରେ ବନ ବିଭାଗ ପକ୍ଷରୁ ସୂଚନା ଦିଆଯାଇଥିଲା । ଯାହାକୁ ନେଇ ସେବାୟତ ମହଲରେ ଚିନ୍ତା ପ୍ରକଟ କରାଯାଇଛି । ମହାପ୍ରଭୁଙ୍କ ରଥ ନିର୍ମାଣ ପାଇଁ ଫାଶୀ କାଠ ଯେଭଳି ମିଳିବାରେ କୌଣସି ସମସ୍ୟା ନଉପୁଜେ ସେନେଇ ସେବାୟତମାନେ କେନ୍ଦ୍ରାଞ୍ଚଳ ଆରଡିସିଙ୍କ ଦୃଷ୍ଟି ଆକର୍ଷଣ କରିଥଲେ । ତେବେ ଓଡ଼ିଶାରେ ଥିବା ଫାଶୀ ଗଛ ଗୁଡିକର ତଥ୍ୟ ବନ ବିଭାଗ ରଖି ଏହାକୁ କିଭଳି ଆଗାମୀ ଦିନରେ ରଥ ନିର୍ମାଣ ପାଇଁ ସଂରକ୍ଷଣ କରିହେବ, ସେନେଇ କାର୍ଯ୍ୟ କରିବାକୁ ବନ ବିଭାଗକୁ କେନ୍ଦ୍ରାଞ୍ଚଳ ଆରଡିସି ନିର୍ଦ୍ଦେଶ ଦେଇଥିଲେ ।
ତେବେ ଏହା ଉପରେ 'ଇଟିଭି ଭାରତ'କୁ ପ୍ରତିକ୍ରିୟା ଦେଇ ନନ୍ଦିଘୋଷ ରଥର ମୁଖ୍ୟ ମହାରଣା ବିଜୟ ମହାପାତ୍ର କହିଛନ୍ତି, "ଫାଶୀ ଗଛର ସଂରକ୍ଷଣ ନିହାତି ଜରୁରୀ । ବନ ବିଭାଗ ଏହା ଉପରେ ଗୁରୁତ୍ବ ଦେଇ ଉପଯୁକ୍ତ ପଦକ୍ଷେପ ନେବା ଉଚିତ । ଫାଶୀ କାଠକୁ ନେଇ ସଙ୍କଟ ଦେଖାଦେଲେ ଆଗାମୀ ଦିନରେ ରଥ ନିର୍ମାଣକୁ ନେଇ ଅଡ଼ୁଆ ସ୍ଥିତି ଉପୁଜିବା ଆଶଙ୍କା ରହିଛି । ଓଡ଼ିଶାରେ ଯେଉଁ ଅଞ୍ଚଳରେ ଫାଶୀ ଗଛ ରହିଛି, ତାହାର ସମ୍ପୂର୍ଣ୍ଣ ତଥ୍ୟ ବନ ବିଭାଗ ରଖୁ । ଏହାକୁ କେହି ଯେଭଳି ବ୍ୟବସାୟିକ ଭିତ୍ତିରେ ବିକ୍ରି ନକରନ୍ତି, ତାହା ଉପରେ ସରକାର କଟକଣା ଜାରି କରନ୍ତୁ । ଏବେଠାରୁ ଫାଶୀ ଗଛ ସଂରକ୍ଷଣ ନେଇ ସରକାର ପଦକ୍ଷେପ ନେଲେ ଫାଶୀ କାଠ ମିଳିବା ତଥା ରଥ ନିର୍ମାଣରେ କୌଣସି ଅସୁବିଧା ଆଗାମୀ ଦିନରେ ହେବନାହିଁ । ରଥ ନିର୍ମାଣରେ ଫାଶୀ କାଠର ବେଶ୍ ଗୁରୁତ୍ଵପୂର୍ଣ୍ଣ ଭୂମିକା ରହିଛି । ଏହି କାଠ ବେଶ ମଜଭୁତ । ତେଣୁ ଏହି ଫାଶୀ କାଠରେ ମହାପ୍ରଭୁଙ୍କ ରଥ ଚକ ନିର୍ମାଣ ହୁଏ । ଯଦି ଫାଶୀ କାଠ ମିଳିବାରେ ଅସୁବିଧା ହୁଏ, ଆଗାମୀ ଦିନରେ ରଥ ନିର୍ମାଣରେ ସମସ୍ୟା ହେବ ।
