ରାଉରକେଲା: ସୁନ୍ଦରଗଡ଼ରେ ଛତିଶଗଡ଼ ମୁଖ୍ୟମନ୍ତ୍ରୀ । ରାଜ୍ୟରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ଯେତିକି ପାଖେଇ ଆସୁଛି ରାଜନୀତି ସେତିକି ଗରମ ହେବାରେ ଲାଗିଛି । ଦ୍ୱିତୀୟ ପର୍ଯ୍ୟାୟ ନିର୍ବାଚନକୁ ମାତ୍ର ଆଉ ତିନି ଦିନ ରହିଥିବାବେଳେ ନିର୍ବାଚନୀ ପ୍ରଚାର ଜୋରଦାର ରହିଛି । ପଶ୍ଚିମ ଓଡିଶାକୁ ବିଜେପି ନେତାଙ୍କ ଫୋକ୍ସ ସହ ସୁନ୍ଦରଗଡ଼ ଜିଲ୍ଲାକୁ ପୁଣି ଦଖଲ କରିବା ପାଇଁ ବିଜେପିର ପ୍ରୟାସ ।ତେବେ ଦଳୀୟ ପ୍ରାର୍ଥୀ ପାଇଁ ଭୋଟ ମାଗିଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ ।
ସୁନ୍ଦରଗଡ଼ ଜିଲ୍ଲାରେ ଆଜି ପୁଣି ଗର୍ଜିଲେ ଭାରତୀୟ ଜନତା ପାର୍ଟିର ଷ୍ଟାର ପ୍ରଚାରକ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ । ସୁନ୍ଦରଗଡ଼ ଲୋକସଭା ଅଧିନସ୍ଥ ସୁନ୍ଦରଗଡ଼, ବୀରମିତ୍ରପୁର ଏବଂ ରାଜଗାଙ୍ଗପୁର ବିଧାନସଭା ନିର୍ବାଚନ ମଣ୍ଡଳୀରେ ଆଜି ମାରାଥନ ପ୍ରଚାର କରିଛନ୍ତି । ଏହି ଅବସରରେ ବିଷ୍ଣୁ ଦେଓ କହିଛନ୍ତି ଯେ, ଓଡ଼ିଶାର ପ୍ରଗତି ହୋଇପାରୁ ନାହିଁ ଏହାକୁ ଅଟକାଉଛି ବିଜେଡି ସରକାର । ଏଠାରେ ଡବଲ ଇଞ୍ଜିନ ସରକାର ଦରକାର । ଡବଲ ଇଞ୍ଜିନ ସରକାର ହେଲେ ଓଡ଼ିଶାର ପ୍ରଗତି ହେବ । ସେହିପରି ବର୍ତ୍ତମାନ ସମ୍ପୂର୍ଣ୍ଣ ଓଡ଼ିଶାର ଅସ୍ମିତାକୁ ବିପଦରେ ପକାଇଛି ବିଜେଡି ଏବଂ ଭିକେ ପାଣ୍ଡିଆନ ବୋଲି କହି ଟାର୍ଗେଟ କରିଥିଲେ ଛତିଶଗଡ଼ ମୁଖ୍ୟମନ୍ତ୍ରୀ ।
ସେ ଆହୁରି ମଧ୍ୟ କହିଛନ୍ତି ଯେ, ଏଥର ରାଜ୍ୟରେ ପରିବର୍ତ୍ତନର ହାୱା ଚାଲୁଛି ଏବଂ ରାଜ୍ୟବାସୀ ଜାଣି ସାରିଲେଣି ଯେ କେଉଁଠି ଅଧିକ ବିକାଶ ହେଉଛି । ରାଜ୍ୟରେ ନା କେନ୍ଦ୍ରରେ ତେବେ ମୋଦିଙ୍କ ନେତୃତ୍ବରେ ଏଥର ରାଜ୍ୟରେ ବିପୁଳ ସଂଖ୍ୟାରେ ବିଜେପିର ବିଜୟ ହେବ । କେନ୍ଦ୍ର ସରକାର ଯୋଜନାରେ 10 ବର୍ଷ ମଧ୍ୟରେ ଆଜି ଦେଶ ବହୁ ଉନ୍ନତି ହୋଇ ପାରିଛି ଆଗକୁ ମଧ୍ୟ ହେବ । କିନ୍ତୁ ଓଡିଶାରେ ୨୫ ବର୍ଷର ସରକାର ଥାଇ ମଧ୍ୟ ବିକାଶ ନଥିବା ଭଳି ଅବସ୍ଥାରେ ପହଞ୍ଚିଛି । ଆଜି ବି ମୌଳିକ ସୁବିଧାରୁ ବଞ୍ଚିତ ଅଛନ୍ତି ଲୋକେ । ଛତିଶଗଡ଼ ରାଜ୍ୟ ସହ ଓଡ଼ିଶାର ଭଲ ସମ୍ପର୍କ ଅଛି କିନ୍ତୁ ଛତିଶଗଡ଼ ଅପେକ୍ଷା ଆଜି ଓଡିଶା ବହୁତ ପଛୁଆ ରହିଛି ।
ଇଟିଭି ଭାରତ, ରାଉରକେଲା
