କେନ୍ଦ୍ରାପଡ଼ା: ବାତ୍ୟା 'ଦାନା' ପ୍ରଭାବରେ କ୍ଷତିଗ୍ରସ୍ତ ଅଞ୍ଚଳ ବୁଲି ଦେଖିଲେ କେନ୍ଦ୍ରୀୟ ଟିମ୍ । ଗତକାଲି (ସୋମବାର) କେନ୍ଦ୍ରାପଡ଼ା ଜିଲ୍ଲାର ବାତ୍ଯା ପ୍ରଭାବିତ ଅଞ୍ଚଳ ପରିଦର୍ଶନ କରିଥିଲେ ଦୁଇ ଜଣିଆ କେନ୍ଦ୍ରୀୟ ପ୍ରତିନିଧି ଦଳ । ରାଜନଗର ବ୍ଲକର ତାଳଚୁଆ, ଟିକାୟତନଗର, ପଟାପାରିଆ, ରଙ୍ଗଣୀ ଆଦି ଅଞ୍ଚଳରେ କ୍ଷୟକ୍ଷତି ଆକଳନ ଆକଳନ କରିବା ସହ ବିଭିନ୍ନ ସ୍ଥାନରେ ବିପନ୍ନଙ୍କ ସହ ଆଲୋଚନା କରିଛି କେନ୍ଦ୍ରୀୟ ଟିମ ।
ବାତ୍ୟା କ୍ଷତିଗ୍ରସ୍ତ ଅଞ୍ଚଳ ବୁଲିଲେ କେନ୍ଦ୍ରୀୟ ଟିମ:
ଭାରତ ସରକାରଙ୍କ ପରିବହନ, ଯୋଗାଯୋଗ ଓ ଜାତୀୟ ରାଜପଥ ପ୍ରାଧିକରଣ ଅଧିକାରୀ ସୁନୀଲ କୁମାରଙ୍କ ନେତୃତ୍ୱରେ ଆସିଥିବା ଏହି ଟିମରେ ବି. ସ୍ନେହା ସାମିଲ ହୋଇ ବାତ୍ୟା 'ଦାନା' କ୍ଷୟକ୍ଷତି ରିପୋର୍ଟ ଆଧାରରେ ଆକଳନ କରିଛନ୍ତି । ବିଶେଷ କରି ତାଳଚୁଆ, ରଂଗଣୀ, ପଟାପାରିଆ ଓ ଟିକାୟତ ନଗର ଅଞ୍ଚଳରେ ଧାନ ଓ ମତ୍ସ୍ୟଚାଷ ପ୍ରଭାବିତ ହୋଇଥିଲା । ଅନେକ ସ୍ଥାନରେ ଗଛ ଉପୁଡିବା ସହ ବହୁ କଚାଘର ଭାଙ୍ଗିଥିଲା । ସେପଟେ ବିଭିନ୍ନ ସ୍ଥାନରେ ଲୋକମାନେ ନଷ୍ଟ ହୋଇଥିବା ଧାନଗଛକୁ ଧରି କେନ୍ଦ୍ରୀୟ ଟିମକୁ ଦେଖାଇଥିଲେ । ବାତ୍ୟା କ୍ଷୟକ୍ଷତି ଆକଳନ ପାଇଁ କୌଣସି ସରକାରୀ ଅଧିକାରୀ ତାଙ୍କ ନିକଟକୁ ଆସିନଥିବା ସେମାନେ ଅଭିଯୋଗ କରିଥିଲେ ।
ଏକ ହଜାରରୁ ଉର୍ଦ୍ଧ୍ବ ଛେଳି ମୃତ !
ପଟାପରିଆ ଗାଁରେ ଏକ ହଜାରରୁ ଉର୍ଦ୍ଧ୍ବ ଛେଳିଙ୍କ ମୃତ୍ୟୁ ହୋଇଥିବା ନେଇ ଅଭିଯୋଗ କରିଛନ୍ତି ଗ୍ରାମବାସୀ । ସେହିପରି ବାତ୍ୟା ପରେ ଘର ଭାଙ୍ଗି ଯାଇଥିବାବେଳେ କେହି ଘରଭଙ୍ଗା ତଦନ୍ତ ପାଇଁ ମଧ୍ୟ ଆସିନଥିବା ଲୋକେ ଅଭିଯୋଗ କରିଥିଲେ । ଅନ୍ୟପଟେ ବାତ୍ୟା ଦାନାକୁ ଏକମାସ ବିତିବା ପରେ କେନ୍ଦ୍ରୀୟ ଟିମ ଅନୁଧ୍ୟାନ କରିବାକୁ ଆସିଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା ।
ଏମିତି କହିଲେ ଜିଲ୍ଲାପାଳ:
ଜିଲ୍ଲାପାଳ ସ୍ମୃତିରଞ୍ଜନ ପ୍ରଧାନ କହିଛନ୍ତି," କେନ୍ଦ୍ରୀୟ ଟିମ ଆସିଥିଲେ , କ୍ଷତିଗ୍ରସ୍ତ ଅଞ୍ଚଳ ବୁଲି ଦେଖିଲେ । ଲୋକଙ୍କ ଅଭିଯୋଗ ମଧ୍ୟ ଶୁଣିଲେ । ଆଉ କିଛି ଘରଭଙ୍ଗା ଅଭିଯୋଗ ଆସିଛି । ଖୁବଶୀଘ୍ର ତଦନ୍ତ କରାଯାଇ ନିୟମ ଅନୁସାରେ ସହାୟତା ପ୍ରଦାନ କରାଯିବ । ବାତ୍ୟ ପରେ କିଛି ଛେଳି ମରିଥିବା ଅଭିଯୋଗ ହୋଇଛି । ଏକ ସପ୍ତାହ ମଧ୍ୟରେ ପୁନଃତଦନ୍ତ କରି ରିପୋର୍ଟ ପ୍ରଦାନ କରିବା ପାଇଁ ମୁଁ ତହସିଲଦାରଙ୍କୁ ନିର୍ଦ୍ଦେଶ ଦେଇଛି ।"
ଇଟିଭି ଭାରତ, କେନ୍ଦ୍ରାପଡ଼ା
