ବୌଦ୍ଧ: ବ୍ୟାପକ ସମସ୍ୟା ଘେରରେ ଛନ୍ଦି ହୋଇ ରହିଛି ଜିଲ୍ଲାର ସର୍ବପୁରାତନ ତଥା ଅଞ୍ଚଳର ପ୍ରଥମ ଉଚ୍ଚ ଶିକ୍ଷାନୁଷ୍ଠାନ ବୌଦ୍ଧ ପଞ୍ଚାୟତ ମହାବିଦ୍ୟାଳୟ । ଦୀର୍ଘ ୪୫ ବର୍ଷର କଲେଜ ଆଜି ପର୍ଯ୍ୟନ୍ତ ସମ୍ପୂର୍ଣ୍ଣ ସରକାରୀ ହୋଇ ନଥିବା ବେଳେ ପାନୀୟଜଳ, ଶୌଚାଳୟ, କମ୍ପ୍ୟୁଟର ଲାବ, କଲେଜ ଗୃହ ଭଳି ବିଭିନ୍ନ ସମସ୍ୟାକୁ ନେଇ ଆଜି କଲେଜର ଛାତ୍ରଛାତ୍ରୀମାନେ ଜିଲ୍ଲାପାଳଙ୍କ ନିକଟରେ ଫେରାଦ ହୋଇଛନ୍ତି । ଗତକାଲି ଜିଲ୍ଲାର ପ୍ରଥମ କଲେଜରେ ଆଗାମୀ ନିର୍ବାଚନରେ ଭୋଟିଂ ପାଇଁ ଭିତ୍ତିଭୂମି ତଦାରଖ ପାଇଁ ପହଞ୍ଚିଥିଲେ ନୂତନ ଜିଲ୍ଲାପାଳ ଜେ ସୋନାଲ ।
ସେ କଲେଜର ଶ୍ରେଣୀଗୃହ, ପାରିପାର୍ଶ୍ବିକ ଅବସ୍ଥିତିକୁ ଅନୁଧ୍ୟାନ କରିଥିଲେ । ବୌଦ୍ଧ ଜିଲ୍ଲାପାଳ ଜେ ସୋନାଲ ବୌଦ୍ଧ ପଞ୍ଚାୟତ ମହାବିଦ୍ୟାଳୟ ଠାରେ ବରିଷ୍ଠ ପ୍ରଶାସନିକ ଅଧିକାରୀଙ୍କ ସହିତ ପହଞ୍ଚିଥିଲେ । ବୌଦ୍ଧ ଜିଲ୍ଲାର ଏହି ସର୍ବପୁରାତନ ତଥା ଅଞ୍ଚଳର ପ୍ରଥମ କଲେଜ ଦୀର୍ଘ ବର୍ଷ ହେଲା ବ୍ୟାପକ ସମସ୍ୟା ଘେରରେ ଛନ୍ଦି ହୋଇ ରହିଛି । ବୌଦ୍ଧ ପଞ୍ଚାୟତ ମହାବିଦ୍ୟାଳୟରେ ଆଜି ପର୍ଯ୍ୟନ୍ତ ଏମ.ଏ ଖୋଲି ନ ଥିବା ବେଳେ ଜିଲ୍ଲାର ଏହି ୪୫ ବର୍ଷର କଲେଜ ଆଜି ପର୍ଯ୍ୟନ୍ତ ସମ୍ପୂର୍ଣ୍ଣ ସରକାରୀ ମାନ୍ୟତା ପାଇନାହିଁ । କଲେଜରେ ଆବଶ୍ୟକତା ମୁତାବକ ଶ୍ରେଣୀ କକ୍ଷର ଅଭାବ ସାଙ୍ଗକୁ ଛାତ୍ରଛାତ୍ରୀଙ୍କ କମନରୁମ, ଶୌଚାଳୟ, କମ୍ପ୍ୟୁଟର ଲାବ, ପାନୀୟ ଜଳ ଭଳି ମୌଳିକ ସୁବିଧା ନ ଥିବା ଅଭିଯୋଗ ହୋଇଛି ।
ଏହା ମଧ୍ୟ ପଢନ୍ତୁ ... ସାମ୍ସ ପୋର୍ଟାଲରେ ଅପଲୋଡ ହେବ କଲେଜ ରୂପାନ୍ତରୀକରଣ ଫୋଟ
ଏନେଇ କଲେଜ କର୍ତ୍ତୃପକ୍ଷ ତଥା ଛାତ୍ରଛାତ୍ରୀ ବାରମ୍ବାର ଅଭିଯୋଗ କରୁଥିଲେ ମଧ୍ୟ ଏନେଇ କୌଣସି ସୁଫଳ ମିଳି ପାରିନାହିଁ । ଲକ୍ଷ ଲକ୍ଷ ଟଙ୍କା ବ୍ୟୟରେ ପ୍ରତିଷ୍ଠା କରାଯାଇଥିବା କମ୍ପ୍ୟୁଟର ଲାବ ବର୍ତ୍ତମାନ ଖତ ଖାଉଥିବା ବେଳେ ଖୋଦ କଲେଜ ଅଧ୍ୟକ୍ଷଙ୍କ ନିଜସ୍ଵ କାର୍ଯ୍ୟାଳୟ ଗୃହ ନ ଥିବାରୁ ତାହା ଏକ ଛାତ୍ରୀ ନିବାସରେ ଚାଲୁଛି ।
ସେପଟେ ଶନିବାର ବୌଦ୍ଧ ଜିଲ୍ଲାର ନୂତନ ଜିଲ୍ଲାପାଳ ଜେ ସୋନାଲ କଲେଜ ପରିଦର୍ଶନରେ ଯାଇଥିବା ବେଳେ ଛାତ୍ରଛାତ୍ରୀ ମାନେ କଲେଜର ବହୁବିଧ ସମସ୍ୟା ସମ୍ପର୍କରେ ଜିଲ୍ଲାପାଳଙ୍କୁ ଫେରାଦ ହୋଇଥିଲେ । ଛାତ୍ରଛାତ୍ରୀଙ୍କ ସହିତ ଜିଲ୍ଲାପାଳ ଆଲୋଚନା କରିବା ସହିତ ଆଗାମୀ ଦିନରେ ବଉଦ କଲେଜ ଫାଇଭ ଟି ଅନ୍ତର୍ଭୁକ୍ତ ହୋଇ ଏସବୁ ସମସ୍ୟାର ସମାଧାନ ହେବ ବୋଲି ଆଶ୍ଵସନା ପ୍ରଦାନ କରିଛନ୍ତି ।
ଇଟିଭି ଭାରତ, ବୌଦ୍ଧ
