ଖୋର୍ଦ୍ଧା: ପୋଲିସ ଅଧିକାରୀ ବିଜୁ ଜନତା ଦଳର କର୍ମୀ ସାଜିଛନ୍ତି । ଆଜି ଏଭଳି ସାଘାଂତିକ ଅଭିେଯାଗ କରିଛନ୍ତି ଖୋର୍ଦ୍ଧା ନିର୍ବାଚନ ମଣ୍ଡଳୀର ବିଜେପି ପ୍ରାର୍ଥୀ ପ୍ରଶାନ୍ତ ଜଗଦ୍ଦେବ । ଖୋର୍ଦ୍ଧା ସ୍ଥିତ ବିଜେପି କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ ମାଧ୍ୟମରେ ଏଭଳି ସଂଗୀନ ଅଭିଯୋଗ କରିବା ସହ ଏଭଳି କାର୍ଯ୍ୟରୁ ନିବୃତ୍ତ ରହିବା ପାଇଁ ଚେତାବନୀ ଦେଇଛନ୍ତି ପ୍ରଶାନ୍ତ ।
ପ୍ରଶାନ୍ତଙ୍କ କହିଛନ୍ତି , "ଖୋର୍ଦ୍ଧା ଏସଡିପିଓ ଦିଲ୍ଲୀପ ଦାସ ରାତି ଅଧରେ ବିଜେପି କର୍ମୀମାନଙ୍କୁ ଧମକାଉଛନ୍ତି । ସରପଞ୍ଚମାନଙ୍କୁ ଡାକି ଧମକ ଦେଉଛନ୍ତି । ବିଜେଡି ନେତା ଯେତିକି ନ କରୁଛନ୍ତି ଏସଡିପିଓ ସେତିକି କରୁଛନ୍ତି । ହ୍ଵାଟସପ୍ କଲ କରି ଧମକ ଚମକ ଦେବା ସହ ବିଜେପି ଛାଡି ବିଜେଡିକୁ ଭୋଟ ଦେବାକୁ କହୁଛନ୍ତି । ଏଭଳି 2 ଶହରୁ 250 ବିଜେପି କର୍ମୀଙ୍କୁ ଧମକ ଦିଆଯାଇଛି । ଏନେଇ ଏସପିଙ୍କୁ ଜଣାଇଛି । ନିର୍ବାଚନ ଆୟୋଗଙ୍କୁ ମଧ୍ୟ ଜଣାଯାଇଛି । ଏହାପରେ ବି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ଯଦି 23 ତାରିଖ ସୁଦ୍ଧା ସେ ଏଥିରୁ ନିବୃତ୍ତ ନହୁଅନ୍ତି, ତେବେ 23 ତାରିଖ ସନ୍ଧ୍ୟା 5ଟାରେ ମୁଁ ତାଙ୍କ ଅଫିସ ଆଗରେ ଧାରଣା ଦେବି । ଏହାସହ ହଜାର ହଜାର କର୍ମୀଙ୍କୁ ନେଇ ଏସପି ଓ ଏସଡିପିଓଙ୍କ କାର୍ଯ୍ୟାଳୟକୁ ଘେରାଉ କରିବି ।
ପ୍ରଶାନ୍ତ ଜଗଦ୍ଦେବ ଏହା ମଧ୍ୟ କହିଛନ୍ତି, "ବିଜେପି ଗଣତାନ୍ତ୍ରୀକ ଭାବରେ ନିର୍ବାଚନ ପ୍ରଚାର କରୁଛି । ହେଲେ ବିଜେଡି ମହିଳା ମିଶନ ଶକ୍ତିର ମାଆମାନଙ୍କୁ, ସିଆରପି, ଏମବିକେ, ଜିପିଏଲର କର୍ମକର୍ତ୍ତା, ବିଏଲଏଫ କର୍ମକର୍ତ୍ତା ଓ ଶିକ୍ଷକମାନଙ୍କୁ ଧମକ ଦେଉଛନ୍ତି । ଅଫିସରମାନଙ୍କୁ ଦାୟିତ୍ବ ଦେଇଛନ୍ତି ତମେ ସରକାରକୁ ଆଣିବ ଓ ସରକରା ଚଳାଇବ । ବର୍ତ୍ତମାନ ପୋଲିସମାନଙ୍କୁ ଏବଂ ଜିଲ୍ଲା ପ୍ରଶାସନକୁ ଧମକାଇ କହିଛନ୍ତି ଯେ, ତୁମେ କର୍ମୀମାନଙ୍କୁ ଧମକାଇ ଭୋଟ ଆଣ । ଯଦି ନ ଆଣ ତେବେ ଟ୍ରାନ୍ସଫର ହେବ । ଯଦି ଆଣିବ ତେବେ ସରକାରରେ ଭଲ ପଦବୀ ପାଇବ । ତେଣୁ ସମସ୍ତଙ୍କୁ ଅନୁରୋଧ କରୁଛି ଏଥିରୁ ନିବୃତ୍ତ ରୁହନ୍ତୁ । ଯଦି ନିବୃତ୍ତ ନ ରୁହନ୍ତି ତେବେ 23 ତାରିଖ ନିର୍ବାଚନ ପ୍ରଚାର ସରିଗଲେ ଆମେ ସମସ୍ତେ ଯାଇ ଥାନାରେ ବସିବୁ । ସବୁ ଥାନା ଓ ଏସପିଙ୍କ ଅଫିସକୁ ଘେରାଉ କରିବୁ । ଏହାସହ ଏସଡିପିଓଙ୍କୁ ତାଲା ପକାଇବୁ ।"
ପ୍ରଶାନ୍ତ ଜଗଦ୍ଦେବ ଆହୁରି ମଧ୍ୟ କହିଛନ୍ତି ଯେ, ଓଡ଼ିଶାବାସୀଙ୍କ ସରଳତାଙ୍କୁ ନେଇ ବିଜେଡି ଖେଳ ଖେଳୁଛି ଏବଂ ଏଭଳି ପରିସ୍ଥିତିରେ ଖୋର୍ଦ୍ଧାବାସୀ ତାଙ୍କୁ ଆଶୀର୍ବାଦ କରନ୍ତୁ । ସେ 5 ବର୍ଷରେ ନୂଆ ଖୋର୍ଦ୍ଧା ଗଠନ କରିବେ । 5 ବର୍ଷ ହେଉଛି ୧୮୨୫ ଦିନ । ୨୫ ଦିନ ବ୍ୟକ୍ତିଗତ କାର୍ଯ୍ୟରେ ବ୍ୟବହାର କରିବା ପରେ ୧୮୦୦ ଦିନ ଖୋର୍ଦ୍ଧାବାସୀଙ୍କ କାର୍ଯ୍ୟ କରିବେ । ୭୫ ବର୍ଷରେ ଯାହା ହୋଇନି ତାହା ୫ ବର୍ଷରେ କରିବି ବୋଲି ସାମ୍ବାଦିକ ସମ୍ମିଳନୀରେ କହିଛନ୍ତି ପ୍ରଶାନ୍ତ । ସେପଟେ ଏ ସମ୍ପର୍କରେ ଏସଡିପିଓଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
ଇଟିଭି ଭାରତ, ଖୋର୍ଦ୍ଧା
