ଭୁବନେଶ୍ବର: ଚଳିତମାସ 25 ତାରିଖରୁ ଆରମ୍ଭ ହେଉଛି ସଂସଦର ଶୀତକାଳୀନ ଅଧିବେଶନ । ଏହା ପୂର୍ବରୁ ଗତକାଲି ସନ୍ଧ୍ୟାରେ ଅନୁଷ୍ଠିତ ହୋଇଛି ବିରୋଧୀ ଦଳ ବିଜେଡିର ସଂସଦୀୟ ଦଳ ବୈଠକ । ନବୀନ ନିବାସରେ ଅନୁଷ୍ଠିତ ବୈଠକରେ ଆଗାମୀ ଅଧିବେଶନ ନେଇ ରଣନୀତି ପ୍ରସ୍ତୁତ କରିଛି ବିଜେଡି । ପୁଣି ଥରେ କେନ୍ଦ୍ର ଅବହେଳା ପ୍ରସଙ୍ଗ ଉଠାଇ ଡବଲ ଇଞ୍ଜିନ ସରକାରକୁ ଘେରିବାକୁ ଖସଡ଼ା ପ୍ରସ୍ତୁତ କରିଛି ନବୀନ ବ୍ରିଗେଡ଼ ।
ବିଜେଡି ରାଜ୍ୟସଭା ସାଂସଦ ସସ୍ମିତ ପାତ୍ର କହିଛନ୍ତି," ବିଜେଡି ସଭାପତି ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ସଂସଦୀୟ ଦଳ ବୈଠକ ଅନୁଷ୍ଠିତ ହୋଇଛି । ବିଜେଡିର ସମସ୍ତ ସାଂସଦଙ୍କୁ ଦଳର ସଭାପତି ଗୁରୁ ଦାଇତ୍ୱ ଦେଇଛନ୍ତି । ଓଡିଶାର ସ୍ୱାର୍ଥ ରକ୍ଷା ଓ ସାଢ଼େ 4 କୋଟି ଲୋକଙ୍କ ହକ ଏବଂ ଦାବିକୁ ଜୋରଦାର ଢଙ୍ଗରେ ଉଠେଇବାକୁ ଦଳର ସଭାପତି ନିର୍ଦ୍ଦେଶ ଦେଇଛନ୍ତି । ବିଜେଡିର ସମସ୍ତ ସଦସ୍ୟ ଏକସୂତ୍ର ଓ ଏକ ଚେତନାରେ ବାନ୍ଧି ହୋଇ ଓଡିଶାବାସୀଙ୍କ ସ୍ଵାର୍ଥ ଓ ଓଡିଶାବାସୀଙ୍କ କଲ୍ୟାଣ ଜନିତ ବିଷୟ ପାର୍ଲିଆମେଣ୍ଟରେ ଉଠାଯିବ ।"
- ବିଜେଡି ଉଠେଇବାକୁ ଥିବା ପ୍ରସଙ୍ଗ :-
ସସ୍ମିତ ପାତ୍ର କହିଛନ୍ତି,‘‘ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବାର ଦାବି ଦୋହରାଇବ ବିଜେଡି । ଏ ନେଇ ବିଜେଡି ବାରମ୍ବାର ଦାବି କରି ଆସିଛି । ନବୀନ ମୁଖ୍ୟମନ୍ତ୍ରୀ ଥିବାବେଳେ ଏନେଇ ବାରମ୍ବାର ଦାବି କରି ଆସିଛନ୍ତି । କେନ୍ଦ୍ରରେ ଥିବା ବିଜେପି ସରକାର ଏହାକୁ ବାରମ୍ବାର ଅଣଦେଖା କରି ଆସିଛି । ଡବଲ ଇଞ୍ଜିନର ଡିଣ୍ଡିମ ପିଟୁଥିବା ବିଜେପି ଏନେଇ ମୁହଁ ଖୋଲୁ ନାହାନ୍ତି । ସରକାରକୁ ଆସିଲେ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା ଦେବ ବୋଲି 2014 ନିର୍ବାଚନ ଇସ୍ତହାରରେ ବିଜେପି ରଖିଥିଲା । ମହାନଦୀ ଓ ପୋଲାଭରମ ପ୍ରସଙ୍ଗ ଦଳ ଉଠାଇବ । ପୋଲାଭରମ ପ୍ରକଳ୍ପ ହେଲେ ଓଡ଼ିଶାର ଏକର ଏକର ଜମି ଓ ହଜାର ହଜାର ହେକ୍ଟର ଚାଷ ଜମି ଜଳମଗ୍ନ ହେବ । ୬ ହଜାରରୁ ଅଧିକ ଆଦିବାସୀ ଭାଇ ଭଉଣୀ ପ୍ରଭାବିତ ହେବେ ।’’
- ଓ୍ବାକଅଫ ବିଲକୁ ବିରୋଧ କରିବ ବିଜେଡି : ମୁନ୍ନା ଖାନ
ବିଜେଡି ସାଂସଦ ମୁନ୍ନା ଖାଁ କହିଛନ୍ତି, "ଓ୍ବାକଅଫ ବିଲକୁ ବିରୋଧ କରିବ ବିଜେଡି । ଆଗାମୀ ରବିବାର ସକାଳେ ଭୁବନେଶ୍ୱର MLA କଲୋନୀରୁ ବିକ୍ଷୋଭ ଆରମ୍ଭ ହୋଇ ଭୁବନେଶ୍ୱର ରାଜଭବନ ସାମ୍ନାରେ ଧାରଣା ଦେବ ଦଳ । ଏହାସହ ରାଜ୍ୟପାଳଙ୍କୁ ଦାବିପତ୍ର ପ୍ରଦାନ କରିବ । ସେହିପରି କେନ୍ଦ୍ର ସରକାରଙ୍କୁ ପାର୍ଲାମେଣ୍ଟରେ ବିରୋଧ କରିବ ବିଜେଡି । ଜାଣିଶୁଣି କେନ୍ଦ୍ର ସରକାର ବିଲ ଆଣିବାକୁ ଚେଷ୍ଟା କରୁଛନ୍ତି । WAQFର ସମ୍ପତ୍ତି ଆମ ମୁସଲିମ ଧର୍ମର ସମ୍ପତ୍ତି । ତାହାକୁ ହାତେଇ ନେଇ ବଡ଼ ବଡ଼ କମ୍ପାନୀ ମାନଙ୍କୁ ବିଜେପି ସରକାର ଟେକି ଦେବାକୁ ଚେଷ୍ଟା କରୁଛି । ଯାହାକୁ ଦଳ ବିରୋଧ କରିବ ।
ଇଟିଭି ଭାରତ, ଭୁବନେଶ୍ବର
