ଭୁବନେଶ୍ୱର: ହଜାର ହଜାର ବର୍ଷ ଧରି ଗର୍ବିତ ଓଡ଼ିଆମାନେ ଓଡ଼ିଆ ସଂସ୍କୃତିକୁ ଅତ୍ୟନ୍ତ ବୀରତ୍ୱର ସହ ରକ୍ଷା କରି ଆସୁଛନ୍ତି । ସେମାନେ କେବଳ ମୋଗଲ ଓ ବ୍ରିଟିଶମାନଙ୍କ ଠାରୁ ରକ୍ଷା କରିନାହାନ୍ତି , ବରଂ ଓଡ଼ିଆ, ଐତିହ୍ୟ ଓ ପରମ୍ପରା ପ୍ରତି ଗଭୀର ଭଲପାଇବା ଓ ପ୍ରତିବଦ୍ଧତା ଦ୍ୱାରା ଓଡ଼ିଆ ସଂସ୍କୃତିକୁ ସମୃଦ୍ଧ କରିଛନ୍ତି । ଓଡିଆମାନେ ନିଜର ଐତିହ୍ୟ ଓ ସଂସ୍କୃତିକୁ ସୁରକ୍ଷା ଦେବାକୁ ସକ୍ଷମ । ଅପରାଧୀଙ୍କୁ ଟିକଟ ଦେବା ଓଡିଶା ବିଜେପିର ସଂସ୍କୃତି । ବିଜେପିର ଅସଲ ସଂସ୍କୃତି କଣ ତାହା ସାଢେ ୪ କୋଟି ଓଡିଆ ବୁଝିଗଲେଣି । ଏହା କହିଛନ୍ତି ବିଜେଡି ମୁଖପାତ୍ର ସ୍ୱୟଂ ପ୍ରକାଶ ମହାପାତ୍ର ଓ ଇପ୍ସିତା ସାହୁ ।
ବିଜେଡି ମୁଖପାତ୍ର କହିଛନ୍ତି,''ଓଡ଼ିଆ ସଂସ୍କୃତିର ସୁରକ୍ଷା ପାଇଁ ଓଡ଼ିଶା ବିଜେପି ଭଳି ରାଜନୈତିକ ଦଳର ଆବଶ୍ୟକତା ନାହିଁ । ଓଡିଆ ସଂସ୍କୃତି ବିଶ୍ୱର ଯେକୌଣସି ରାଜନୈତିକ ଦଳ ଠାରୁ ବଡ଼ । ଯେକୌଣସି ଦଳ ନିଜକୁ ବଡ଼ ଭାବି ଓଡ଼ିଆ ସଂସ୍କୃତିର ସୁରକ୍ଷା ପାଇଁ ଚିନ୍ତା କରିପାରିବେ ନାହିଁ । କିନ୍ତୁ ଓଡ଼ିଶା ବିଜେପି ସଂସ୍କୃତିକୁ ପ୍ରଥମେ ବୁଝିବା ଜରୁରୀ । ଏହି ଦଳର ସଂସ୍କୃତି ହେଉଛି ସେମାନଙ୍କ ବିରୋଧରେ ଜଘନ୍ୟ ଅପରାଧ କରିଥିବା ସମସ୍ତ ରାଜନୈତିକ ନେତାଙ୍କୁ ସେମାନଙ୍କ ନେତାଙ୍କ ସହ ମିଶାଇବା । ୨୦୨୪ରେ ହେବାକୁ ଥିବା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଦଳୀୟ ନୀତି ଗ୍ରହଣ କରିବା । ଅପରାଧିକ ପୃଷ୍ଠଭୂମି ଥିବା ବ୍ୟକ୍ତିଙ୍କୁ ଦଳରେ ସାମିଲ କରି ସମ୍ମାନର ସହ ଟିକଟ ପ୍ରଦାନ କରେ ବିଜେପି । ଏହା ହେଉଛି ବିଜେପି ସଂସ୍କୃତି ।''
ସେ ଆହୁରି ମଧ୍ୟ କହିଛନ୍ତି, ''ବିରୋଧୀ ଦଳ ନେତା ଜୟନାରାୟଣ ମିଶ୍ର କର୍ତ୍ତବ୍ୟରତ ମହିଳା ପୋଲିସ ଅଧିକାରୀ ଅଫିସରଙ୍କୁ ଚାପୁଡା, ତହସିଲଦାରଙ୍କୁ ଧକ୍କା ଦେଇ ଜେଲ ଯାଇଥିଲେ । ଏବେ ଜାମିନରେ ଅଛନ୍ତି । ତାଙ୍କ ବିରୋଧରେ ଅନେକ ଅପରାଧିକ ମାମଲା ରହିଛି । ଓଡ଼ିଶା ବିଜେପି ଏଭଳି ଲୋକଙ୍କୁ ସମର୍ଥନ କରୁଛି । ଏହା ହେଉଛି ବିଜେପିର ସଂସ୍କୃତି । ବିଜେପି ଯୁବ ମୋର୍ଚ୍ଚାର ପୂର୍ବତନ ସଭାପତି ଇରାଶିଷ ଆଚାର୍ଯ୍ୟ ହତ୍ୟା ମାମଲାରେ ଜେଲରେ ଥିଲେ, ଏବେ ଜାମିନରେ ଅଛନ୍ତି । ଏଭଳି ଲୋକ ଯୁବକଙ୍କ ନେତୃତ୍ୱ ନେବେ । ଓଡ଼ିଶା ବିଜେପିର ଏଭଳି ଯୁବ ନେତା ସ୍ୱାଭାବିକ ଭାବରେ ଅପରାଧୀକରଣ କ୍ଷେତ୍ରରେ ଓଡ଼ିଶାବାସୀଙ୍କୁ କିଭଳି ପ୍ରୋତ୍ସାହନ ଦେବେ ତାହା କୁହାଯାଇପାରେ । ଏହା ହେଉଛି ବିଜେପିର ସଂସ୍କୃତି । ଏହା ଓଡିଆ ସଂସ୍କୃତି ନୁହେଁ ।''
''ଓଡ଼ିଶା ବିଜେପିର ଆଉ ଜଣେ ରୋଲ ମଡେଲ ହେଉଛନ୍ତି ପ୍ରଶାନ୍ତ ଜଗଦ୍ଦେବ । ଯିଏ ବିଜେପିର ଟାଉନ ସଭାପତିଙ୍କୁ ମାଡ଼ ମାରିବା ସହ ମାତାଲ ଅବସ୍ଥାରେ ବିଜେପି କର୍ମୀଙ୍କ ଉପରକୁ ତାଙ୍କ କାର ଚଳାଇଥିଲେ । ପ୍ରଶାନ୍ତ ଜଗଦ୍ଦେବଙ୍କ ବିରୋଧରେ ଓଡ଼ିଶା ବିଜେପି କର୍ମୀମାନେ ବିକ୍ଷୋଭ ପ୍ରଦର୍ଶନ କରିଥିଲେ । ଏବେ ଓଡ଼ିଶା ବିଜେପି ତାଙ୍କୁ ଖୋର୍ଦ୍ଧାରୁ ବିଧାୟକ ଭାବେ ପ୍ରାର୍ଥୀ କରିଛି । ଏହା ହେଉଛି ଓଡ଼ିଶା ବିଜେପି ସଂସ୍କୃତି । ଓଡ଼ିଶା ବିଜେପିର ଅନ୍ୟ ଜଣେ ଅପରାଧୀକ ପୋଷ୍ଟର ବଏ ପ୍ରଦୀପ ପାଣିଗ୍ରାହୀ । ଚାକିରି ପାଇଁ ନଗଦ ଟଙ୍କା ନେଇ ଜେଲରେ ଥିଲେ । ଏବେ ଜାମିନରେ ଅଛନ୍ତି । ତାଙ୍କ ମାମଲା ଏବେ ବି ଚାଲୁଛି । ସେ ବ୍ରହ୍ମପୁର ଲୋକସଭା ପାଇଁ ପ୍ରାର୍ଥୀ ହୋଇଛନ୍ତି । ବିଜେପି ପ୍ରଦୀପଙ୍କ ବିରୁଦ୍ଧରେ ଆନ୍ଦୋଳନ କରିଥିଲା । କିନ୍ତୁ ବର୍ତ୍ତମାନ ସେମାନେ ଭାଣ୍ଡିଆ ହେଇଗଲେ । ଓଡ଼ିଶାବାସୀ ଏବେ ପ୍ରକୃତ ଓଡ଼ିଶା ବିଜେପି ସଂସ୍କୃତିକୁ ଜାଣିଗଲେଣି । ଆଗାମୀ ନିର୍ବାଚନରେ ସାଢ଼େ ୪ କୋଟି ଓଡ଼ିଆ ବିଜେପିକୁ ବୁଦ୍ଧି ଶିଖାଇବେ ।''
ଇଟିଭି ଭାରତ, ଭୁବନେଶ୍ୱର
