ଭୁବନେଶ୍ୱର: ଜାତୀୟ ରାଜପଥର ଦୁରାବସ୍ଥାକୁ ନେଇ ପୁଣି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କଲେ ବିଜେଡ଼ି ସାଂସଦ ସସ୍ମିତ ପାତ୍ର । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିଫଳତା ପାଇଁ ଜାତୀୟ ରାଜପଥର ଅବସ୍ଥା ଏମିତି ବୋଲି ସେ ଅଭିଯୋଗ କରିଛନ୍ତି । ଜାତୀୟ ରାଜପଥ ୫୫ ପାଇଁ ସମ୍ବଲପୁର, ଢେଙ୍କାନାଳ ଓ ଅନୁଗୁଳରେ ଲକ୍ଷ୍ମୀ କାର୍ଯ୍ୟକାରିତାରେ ବାଧକ ସାଜୁଥିବା ସେ କହିଛନ୍ତି ।
ପ୍ରେସମିଟ କରି ବିଜେଡିର ରାଜ୍ୟସଭା ସାଂସଦ ସସ୍ମିତ ପାତ୍ର କହିଛନ୍ତି ଯେ, ଲକ୍ଷ୍ମୀ ଭାରତବର୍ଷର ଏକମାତ୍ର ଯୋଜନା ଯାହା ଗାଁକୁ ଗାଁ ସଂଯୋଗ କରୁଛି । ଗାଁରୁ ବ୍ଲକକୁ ସଂଯୋଗ କରୁଛି । ସେହିପରି ବ୍ଲକକୁ ଜିଲ୍ଲା ସଂଯୋଗୀକରଣ ହେଉଛି । ବର୍ତ୍ତମାନ ଦେଶର ସବୁଠାରୁ ଭଲ ଯୋଜନା ଭାବେ ଲକ୍ଷ୍ମୀ ପରିଚିତ । ଲକ୍ଷ୍ମୀ ଯୋଜନା ଭାରତ ବର୍ଷରେ ସଂଯୋଗ ଯୋଜନାରେ ସବୁଠୁ ବଡ଼ ଯୋଜନା । ରାଜ୍ୟର ୧୦୦% ଜିଲ୍ଲା ସଂଯୋଗ ହୋଇଛି । ଲକ୍ଷ୍ମୀ ଯୋଜନାରେ ରାଜ୍ୟରେ ୧୬୦୦ ବସ ଚାଲିଛି । ୧୨୨ ଟି ଜଗନ୍ନାଥ ଏକ୍ସପ୍ରେସ ଓ ଲକ୍ଷ୍ମୀ ଏକ୍ସପ୍ରେସ ବି ଚାଲିଛି । ଲକ୍ଷ୍ମୀ ବସର ପ୍ରଭାବ ଯୋଗୁଁ ୬୨ ହଜାରରୁ ଅଧିକ ଶିକ୍ଷାନୁଷ୍ଠାନ ଯୋଡ଼ି ହୋଇପାରିଛନ୍ତି । ଫଳରେ ଲକ୍ଷ ଲକ୍ଷ ଛାତ୍ରଛାତ୍ରୀ ଲକ୍ଷ୍ମୀ ବସ ଯୋଜନା ମାଧ୍ୟମରେ ଯିବା ଆସିବା କରୁଛନ୍ତି । ସେମାନଙ୍କ ସ୍ୱପ୍ନ ସାକାର ହୋଇପାରୁଛି ।
ସେ ଆହୁରି ମଧ୍ୟ କହିଛନ୍ତି ଯେ, ଲକ୍ଷ୍ମୀ ଯୋଜନା ଦ୍ୱାରା ରାଜ୍ୟରେ ୩୨ ହଜାର ନୂଆ ନିଯୁକ୍ତି ସୃଷ୍ଟି ହୋଇଛି । ରାଜ୍ୟରେ ୯ ହଜାର ବସ ସେଲ୍ଟର କରାଯାଇଛି । ଯାହା ଫଳରେ ବରିଷ୍ଠ, ମହିଳା, ଛାତ୍ରଛାତ୍ରୀ, ଯାତ୍ରୀମାନେ ଶାନ୍ତିରେ ବିଶ୍ରାମ ନେଉଛନ୍ତି । ମା' ଭଉଣୀ, ଦିବ୍ୟାଙ୍ଗ ଛାତ୍ରଛାତ୍ରୀମାନେ କେବଳ ୫ ଟଙ୍କାରେ ଯାତାୟାତ କରୁଛନ୍ତି । ଜଗନ୍ନାଥ ଏକ୍ସପ୍ରେସ ଓ ଲକ୍ଷ୍ମୀ ଏକ୍ସପ୍ରେସରେ ମହିଳାମାନଙ୍କ ପାଇଁ ବସ ଭଡ଼ା ଆହୁରି ୫୦ ପ୍ରତିଶତ କମିଛି । ଓଡିଶାର ଏହି ଯୋଜନା ଦେଶରେ ପ୍ରଶଂସିତ ହେଉଛି । ଗାଁ'ରେ ଲକ୍ଷ୍ମୀ ଯୋଜନାକୁ ଲୋକେ ଭଲ ପାଉଛନ୍ତି ।
ସସ୍ମିତ ପାତ୍ର ଧର୍ମେନ୍ଦ୍ର ପ୍ରଧାନଙ୍କୁ କଡା ଟାର୍ଗେଟ କରି କହିଛନ୍ତି ଯେ, ସମ୍ବଲପୁର, ଅନୁଗୋଳ ଓ ଢେ଼ଙ୍କାନାଳ ଜିଲ୍ଲାରେ ଗଲା ବେଳକୁ ଲକ୍ଷ୍ମୀ ଯୋଜନା ପାଣିଚିଆ ହେଇଯାଉଛି । କାରଣ ହେଲା NH ୫୫ ର ଅବସ୍ଥା ଭଲ ନାହିଁ । ସମ୍ବଲପୁର, ଅନୁଗୁଳ ଓ ଢେଙ୍କାନାଳ ମଧ୍ୟ ଦେଇ ଯାଇଥିବା ଜାତୀୟ ରାଜପଥ ଦୁରାବସ୍ଥା ଲାଗି ରହିଛି । ବସରେ ବସିଥିବା ମହିଳା, ଶିଶୁ, ଛାତ୍ରଛାତ୍ରୀ ଓ ଦିବ୍ୟାଙ୍ଗଙ୍କ ଅବସ୍ଥା ବେହାଲ ହୋଇଯାଉଛି । ଭୟ ଲାଗି ରହୁଛି ଯେ ଦୁର୍ଘଟଣା ହେଇ ଯିବନି ତ ? କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିଫଳତା ପାଇଁ ଏହା ହେଉଛି ବୋଲି ଅଭିଯୋଗ କରିଛନ୍ତି ସସ୍ମିତ ପାତ୍ର ।
ସେ ଆଉମଧ୍ୟ କହିଛନ୍ତି, "୧୦ ବର୍ଷ ହେଲା ଧର୍ମେନ୍ଦ୍ର ପ୍ରଧାନ କେନ୍ଦ୍ରମନ୍ତ୍ରୀ ଅଛନ୍ତି କିନ୍ତୁ ସାମାନ୍ୟ ଜାତୀୟ ରାଜପଥ ୫୫ ଅବସ୍ଥା ସୁଧୁରୁନାହିଁ । ଅନୁତାପ ଓ ପରିତାପର ବିଷୟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କର ଉଦାସୀନତା ପାଇଁ ମା ଭଉଣୀ, ଦିବ୍ୟାଙ୍ଗ ମାନେ ହଇରାଣ ହେଉଛନ୍ତି । ମନେହେଉଛି ଧର୍ମେନ୍ଦ୍ର ପ୍ରଧାନ ଜାତୀୟ ରାଜପଥ ୫୫ ଦେଇ ଯିବା ଆସିବା କରୁ ନାହାନ୍ତି ବୋଧ ହୁଏ । ଅନ୍ୟ କୌଣସି ରାସ୍ତା ଦେଇ ଯିବା ଆସିବା କରୁଛନ୍ତି । ସେଥିପାଇଁ ସେ କିଛି ବୁଝିପାରୁନାହାନ୍ତି କି ଜାଣିପାରୁନାହାନ୍ତି ।"
ଇଟିିଭି ଭାରତ, ଭୁବନେଶ୍ୱର
