ଭୁବନେଶ୍ବର: ପୂଜା ସମୟରେ ଦାଦାବଟି ମାଗିବା ଓ ନଦେବାକୁ ମଞ୍ଚେଶ୍ବର ଇଣ୍ଡଷ୍ଟ୍ରିୟାଲ ଭିତରେ ଥିବା ଏକ ଗ୍ୟାସ କମ୍ପାନୀରେ ପଶି ପାଚେରୀ ଭାଙ୍ଗିବାକୁ ଉଦ୍ୟମ କରିଥିବା ଅଭିଯୋଗରେ ୯ ଜଣଙ୍କୁ ଗିରଫ କରିଛି କମିଶନରେଟ ପୋଲିସ । ଏହି ଗିରଫଦାରୀ ମଧ୍ୟରେ ଭୋଟପଡା ପୁର୍ବତନ କର୍ପୋରେଟର ସ୍ୱାମୀ ମଧ୍ୟ ରହିଛନ୍ତି । ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ମଞ୍ଚେଶ୍ବର ପୋଲିସ ।
- ଅଭିଯୁକ୍ତଙ୍କ ମଧ୍ୟରେ ପୂର୍ବତନ କର୍ପୋରେଟରଙ୍କ ସ୍ୱାମୀ:-
ଗିରଫ ଅଭିଯୁକ୍ତଙ୍କ ମଧ୍ୟରେ ଅଛନ୍ତି ୧୦ ନମ୍ବର ୱାର୍ଡର ପୂର୍ବତନ କର୍ପୋରେଟରଙ୍କ ସ୍ୱାମୀ ଦାଶରଥି ନାୟକ, ଭୋଟପଡାର ଦାଶରଥି ସାହୁ, ଅମରେଶ ବେହେରା ,ପ୍ରକାଶ ବେହେରା ସହ ମାନସ ବେହେରା, କାହ୍ନା ଭୋଇ, ଟୁଲୁ ଭୋଇ, ସାଗର ଭୋଇ ଓ ସଂଗ୍ରାମ ଭୋଇ । ଦାଦାବଟି ଓ ଚାନ୍ଦା ଆଦାୟ ଭଳି ସଙ୍ଗୀନ ଦଫାରେ ଗିରଫ ସହ କୋର୍ଟ ଚାଲାଣ କରାଯାଇଛି । ସେମାନଙ୍କ ମଧ୍ୟରୁ ତିନି ଅଭିଯୁକ୍ତ- ସଂଗ୍ରାମ ,ସାଗର ଓ କାହ୍ନା ତିନିଜଣଙ୍କ ନାଁରେ ପୁର୍ବରୁ ଜବରଦଖଲ ସହ ଦାଦାଗିରି ଓ ଟଙ୍କା ଆଦାୟ ଭଳି ବିଭିନ୍ନ ଥାନାରେ ସଙ୍ଗୀନ ଅଭିଯୋଗ ରହିଛି ।
- ରାଜଧାନୀରେ ଦାଦାବଟିକୁ ପ୍ରଶ୍ରୟ ନାହିଁ : ଡିସିପି
ଏନେଇ ଭୁବନେଶ୍ୱର ଡିସିପି ପିନାକ ମିଶ୍ର କହିଛନ୍ତି, ଭୁବନେଶ୍ୱରରେ ଏସବୁ ଅପରାଧକୁ କୋୖଣସି ମତେ ପ୍ରଶ୍ରୟ ଦିଅଯିବନି । ସେ ଯେକୋୖଣସି ବ୍ୟକ୍ତି ହୁଅନ୍ତୁ ନା କାହିଁକି, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ । ତେବେ ଏହି ମାମଲାରେ ୯ ଜଣ ଗିରଫ ହୋଇଛନ୍ତି । ଗତ ଦୁଇ ତାରିଖରେ ସେହି ଅଞ୍ଚଳର କିଛି ବ୍ୟକ୍ତି ମିଶି ମଞ୍ଚେଶ୍ୱର ଇଣ୍ଡଷ୍ଟ୍ରିଆଲ ଏରିଆ ଭିତରେ ଥିବା ଏକ ଗ୍ୟାସ କମ୍ପାନୀରେ ପଶି ସେମାନଙ୍କୁ ପୂଜା ପାଇଁ ୫୦ ହଜାର ଟଙ୍କା ମାଗିଥିଲେ । ନିଜ ପାଇଁ ଦାଦା ବଟି ଆକାରରେ 10 ହଜାର ଟଙ୍କା ମାଗିଥିଲେ । ଉକ୍ତ କମ୍ପାନୀର ମ୍ୟାନେଜର ଟଙ୍କା ଦେବାକୁ ମନା କରିବା ପରେ ଏହି ବ୍ୟକ୍ତିମାନେ ଧମକ ଚମକ ଦେବା ସହ ଏକ ଜେସିବି ଆଣି ପାଚେରୀ ଭାଙ୍ଗି ଜବରଦଖଲ କରିବାକୁ ଉଦ୍ୟମ କରିଥିଲେ । ପୋଲିସ ଏକ ମାମଲା ରୁଜୁ କରି ଘଟଣାରେ ସମ୍ପୃକ୍ତ ସମସ୍ତ 9 ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ।
- ରାଜଧାନୀରେ ଏବେ କୁଜି ନେତାଙ୍କ ଦୌରାତ୍ମ୍ୟ :-
ରାଜଧାନୀର ଅନେକ ସ୍ଥାନରେ ଏପରି କିଛି କୁଜି ନେତା ଦାଦା ବଟି ଆଦାୟ କରୁଥିବା ଅଭିଯୋଗ ହୋଇଛି । ମାସିକିଆ ବା କିଛି ପୂଜା ପର୍ବାଣୀ ଦେଖି ବଟି ଆଦାୟ କରୁଛନ୍ତି ଏମାନେ । କୁଜି ନେତାମାନେ ଏହି କାମରେ ଭଡାଟିଆ ଗୁଣ୍ଡାଙ୍କୁ ନିୟୋଜିତ କରୁଛନ୍ତି । ବିଭିନ୍ନ ଦୋକାନ, କମ୍ପାନୀ, ଅଫିସ, ଶୋ’ ରୁମ ଓ ମଲ, ପେଟ୍ରୋଲ ପମ୍ପ ଓ ବଡବଡ ଆପାର୍ଟମେଣ୍ଟରୁ ମାସିକିଆ ବା ପୂଜା ସମୟରେ ବଟି ଆଦାୟ କରୁଛନ୍ତି ଏହି ଅସାମାଜିକ ଗୋଷ୍ଠୀ । ପୋଲିସ ଅଭିଯୋଗ ପାଇ ବିଭିନ୍ନ ସମୟରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ଜଣେ ପୂର୍ବତନ କର୍ପୋରେଟରଙ୍କ ସ୍ୱାମୀ ଦାଦା ବଟି ମାଗି ଜମି ଜବରଦଖଲ କରିବାକୁ ଉଦ୍ୟମ କରିବା ରାଜଧାନୀରେ ଚର୍ଚ୍ଚା ସୃଷ୍ଟି କରିଛି ।
ଇଟିଭି ଭାରତ, ଭୁବନେଶ୍ୱର
