ଭୁବନେଶ୍ଵର: ଇତିହାସ ରଚିଲା ଭୁବନେଶ୍ବର ଏମ୍ସ । ଏକାଧିକ ବିଭାଗର ଡାକ୍ତରଙ୍କ ଉଦ୍ୟମରେ ବହୁ ଚ୍ୟାଲେଞ୍ଜକୁ ମାତ ଦେଇ ସଫଳ ହେଲା ବିରଳ ଅସ୍ତ୍ରୋପଚାର । 51ବର୍ଷୀୟ ବୃଦ୍ଧଙ୍କ ମୁଣ୍ଡରୁ ବାହାରିଲା ବିଶାଳକାୟ ଟ୍ୟୁମର । ଦୀର୍ଘ ୭ ଘଣ୍ଟା ଧରି ଚାଲିଥିଲା ଅପରେସନ । ଯାହା ଓଡ଼ିଶାରେ ପ୍ରଥମ ଏବଂ ଭାରତରେ ଏହି ପ୍ରକାରର ଅପରେସନ ଦ୍ଵିତୀୟ ।
ତେବେ ପଶ୍ଚିମବଙ୍ଗର ରବୀନ୍ଦ୍ର ନାମକ ଜଣେ 51 ବର୍ଷିୟ ବୃଦ୍ଧ ବ୍ୟକ୍ତି ଦୀର୍ଘ ୨୫ ବର୍ଷ ଧରି ଟ୍ୟୁମରରେ ପୀଡିତ ହୋଇ ଯନ୍ତ୍ରଣା ଭୋଗୁଥିଲେ । ରବୀନ୍ଦ୍ରଙ୍କ ମସ୍ତିଷ୍କ ଉପରେ ଧିରେ ଧିରେ ଟ୍ୟୁମରଟି ବଡ ହେଉଥିବା ବେଳେ ଗତ ୬ ମାସ ହେବ ଏହା ବୃଦ୍ଧି ପାଇବା ସହ ଯନ୍ତ୍ରଣା ବଢିଥିଲା । ଏହାକୁ ନେଇ ରବୀନ୍ଦ୍ର କୋଲକାତା ସମେତ ଅନେକ ବଡ଼ ବଡ଼ ହସ୍ପିଟାଲରେ ଦେଖାଇଥିଲେ ମଧ୍ୟ କୌଣସି ସୁଫଳ ମିଳିନଥିଲା । ଶେଷରେ ଭୁବନେଶ୍ଵର ଏମ୍ସ ଆସି ଚିକିତ୍ସା କରାଇବା ପରେ ଏହା କ୍ୟାନସର ଆଡ଼କୁ ଗତି କରୁଥିବା ଜଣାପଡିଥିଲା । ତେବେ ରୋଗ ଚିହ୍ନଟ ଯେତିକି ସହଜ ଥଲା, ଏହାଠାରୁ ଅଧିକ କଷ୍ଟ ଥିଲା ଅସ୍ତ୍ରୋପଚାର ପ୍ରକ୍ରିୟା । ମୁଣ୍ଡ ଉପରର ଚମଡା ସହିତ ମସ୍ତିସ୍କ ଓ ଶରୀରରେ ରକ୍ତ ସଞ୍ଚାଳନ ଉପରେ ଯେପରି ପ୍ରଭାବ ନପଡିବ ଏହା ଡାକ୍ତରୀ ଦଳ ପାଇଁ ବଡ ଚ୍ୟାଲେଞ୍ଜ ରହିଥିଲା । ଶେଷରେ ୭ ଘଣ୍ଟା ଧରି ସଫଳ ଅପରେସନ କରାଯିବା ପରେ ରବୀନ୍ଦ୍ରଙ୍କ ମୁଣ୍ଡରୁ ୭ କେଜିର ଓଜନର ଏକ ବିଶାଳକାୟ ଟ୍ୟୁମରକୁ ବାହାର କରାଯାଇଛି । ଏହାସହ ଡାକ୍ତର ହେଉଛନ୍ତି ଭଗବାନଙ୍କ ଦ୍ଵିତୀୟ ଅବତାର ବୋଲି ରବିନ୍ଦ୍ରଙ୍କ ପାଖରେ ପ୍ରମାଣିତ ହୋିଛି । ତେବେ ରବୀନ୍ଦ୍ର ଏବେ ସୁସ୍ଥ ଥିବା ବେଳେ ତାଙ୍କୁ ଖୁବଶୀଘ୍ର ଡିସଚାର୍ଜ କରାଯିବ ବୋଲି ଏମ୍ସ କର୍ତ୍ତୃପକ୍ଷ ଜଣାଇଛନ୍ତି ।
ଭୁବନେଶ୍ଵର ଏମ୍ସର ଏକାଧିକ ବିଭାଗର ଡାକ୍ତରଙ୍କ ପ୍ରୟାସରେ ଏଭଳି ବିରଳ ଅସ୍ତ୍ରୋପଚାର ସମ୍ଭବ ହୋଇପାରିଛି । ପ୍ଲାଷ୍ଟିକ ସର୍ଜରୀ, ନ୍ୟୁରୋ ସର୍ଜରୀ, ରେଡିଓ ଡାଇଗ୍ନୋସିସ୍ ଓ ଅର୍ଥୋପେଡିକ୍ ଭଳି ୬ଟି ବିଭାଗର ଅଭିଜ୍ଞ ଡାକ୍ତରଙ୍କୁ ନେଇ ପ୍ରଥମେ ଏକ ଟିମ୍ ଗଠନ ହୋଇଥିଲା । ପରେ ଅପରେସନ ନେଇ ୪୮ ଘଣ୍ଟା ପୂର୍ବରୁ ପ୍ଲାନ୍ ପ୍ରସ୍ତୁତ କରାଯାଇଥିଲା । ଆନାସ୍ଥେସିଆ ସାଙ୍ଗକୁ ପର୍ଯ୍ୟାପ୍ତ ପରିମାଣର ରକ୍ତ ମଧ୍ୟ ଗଚ୍ଛିତ ରଖାଯାଇଥିଲା । ସେହିପରି ରୋଗୀଙ୍କ ପାଇଁ ଏକ ଏମରେଜେନ୍ସି ଆଇସିୟୁ ଭେଣ୍ଟିଲେଟର ମଧ୍ୟ ପ୍ରସ୍ତୁତ ରଖାଯାଇଥିଲା । ଟିମ୍ ୱାର୍କ ଯୋଗୁଁ ବିରଳ ଅସ୍ତ୍ରୋପଚାର ସମ୍ଭବ ହୋଇଛି, ପୂର୍ବରୁ ଦିଲ୍ଲୀ ଏମ୍ସରେ ଏଭଳି ଏକ ବିରଳ ଅସ୍ତ୍ରୋପଚାର କରାଯାଇଥିଲେ ମଧ୍ୟ ଟ୍ୟୁମରର ଆକାର ଏହାଠାରୁ ଛୋଟ ଥିଲା ବୋଲି ଡାକ୍ତରମାନେ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
