ଭଦ୍ରକ: ସୋସିଆଲ ମିଡିଆରେ ବିବାଦୀୟ ମନ୍ତବ୍ୟ ପରେ ଅଶାନ୍ତ ହୋଇଥିବା ଭଦ୍ରକ ଏବେ ଶାନ୍ତ ପଡ଼ିଛି । ଦେଖା ଦେଇଥିବା ତୀବ୍ର ଉତ୍ତେଜନା ଏବେ ନିୟନ୍ତ୍ରଣରେ ରହିଛି । ଏହାକୁ ଏବେ ସମ୍ପୂର୍ଣ୍ଣ ପ୍ରଶମିତ କରାଯାଇଛି ଏବଂ ଶାନ୍ତି ବଜାଇ ରହିଛି । ତେବେ ଶାନ୍ତି, ଶୃଙ୍ଖଳା ରକ୍ଷା ପାଇଁ ଭଦ୍ରକରେ ପୁରୁଣା ବଜାର ଅଞ୍ଚଳରେ ୧୨ ପ୍ଲାଟୁନ ପୋଲିସ ଫୋର୍ସ ଏବଂ କମ୍ପାନୀ ରାପିଡ଼ ଆକ୍ସନ ଫୋର୍ସ ମୁତୟନ କରାଯାଇଛି । ଏହାସହ BNSSର ୧୬୩ ଧାରା ବଳବତ୍ତର ରହିଛି । ସେହିପରି ପୂର୍ବରୁ ୪୮ ଇଣ୍ଟରନେଟ ସେବା ବନ୍ଦ କଟକଣା ରହିଥିବା ବେଳେ ଏହାକୁ ଆହୁରି ୪୮ ଘଣ୍ଟା ପାଇଁ ବୃଦ୍ଧି କରାଯାଇଛି । ଏଥି ସହ ଆଜି ଧାମନଗରରୁ ଆହୁରି 7 ଜଣଙ୍କୁ ଗିରଫ କରାଯାଇଛି । ମୋଟ ଗିରଫ ସଂଖ୍ୟା 14କୁ ବୃଦ୍ଧି ।
ପୋଲିସ ଫୋର୍ସ ରାପିଡ଼ ଆକ୍ସନ ଫୋର୍ସ ମୁତୟନ:
ସେହିପରି ଭଦ୍ରକ ପୁରୁଣା ବଜାର ଅଞ୍ଚଳରେ ଦିନ ଏବଂ ରାତିରେ ପାଟ୍ରୋଲିଂ ବ୍ୟବସ୍ଥାକୁ କଡା କଢ଼ି କରାଯାଇଛି । ଗତକାଲି ରାତିରୁ ଆସିଥିବା ଦୁଇ କମ୍ପାନୀ ରାପିଡ଼ ଆକ୍ସନ ଫୋର୍ସ ଭଦ୍ରକରେ ପହଞ୍ଚିବା ପରେ ଗୋଟିଏ କମ୍ପାନୀକୁ ପୁରୁଣା ବଜାରରେ, ଅନ୍ୟ ଏକ କମ୍ପାନୀକୁ ଧାମନଗରେ ମୁତୟନ କରାଯାଇଛି । ତେବେ ଅଦ୍ୟାବଧି ଧାମନଗରରେ ୬ ପ୍ଲାଟୁନ ପୋଲିସ ଫୋର୍ସ ସହିତ ଗୋଟିଏ କମ୍ପାନୀ ରାପିଡ଼ ଆକ୍ସନ ଫୋର୍ସ ମୁତୟନ କରାଯାଇଛି । ଗତକାଲି ଏହି ରାପିଡ଼ ଆକ୍ସନ ଫୋର୍ସ ଏରିଆ ଡୋମିନେସନ କରିବା ପରେ ଆଜି ପୁରୁଣା ବଜାର ଅଞ୍ଚଳରେ ଫ୍ଲାଗ ମାର୍ଚ୍ଚ କରିଥିଲା । ସନ୍ଥିଆ ବ୍ରିଜ ଠାରୁ ଏହି ଫ୍ଲାଗ ମାର୍ଚ୍ଚ ବାହାରି ପୁରୁଣା ବଜାର ଥାନା ଅଞ୍ଚଳ ପରିକ୍ରମା କରିଥିଲା । ଏଥିରେ ପୂର୍ବାଞ୍ଚଳ ଡିଆଇଜି ଡ଼. ସତ୍ୟଜିତ ନାୟକ, ଜିଲ୍ଲାପାଳ ଦିଲ୍ଲୀପ ରାଉତରାୟ, ଏସପି ବରୁଣୁ ଗୁଣ୍ଠୁପାଲ୍ଲୀ ଯୋଗ ଦେଇଥିଲେ ।
ନିୟନ୍ତ୍ରଣରେ ଭଦ୍ରକ ସ୍ଥିତି:
ତେବେ ଭଦ୍ରକ ଏବଂ ଧାମନଗରରେ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣୀଧୀନ ଅଛି ଏବଂ ଶାନ୍ତି ବଜାଇ ରହିଛି । ଲୋକମାନେ କୌଣସି ପ୍ରକାର ମିଥ୍ୟା ଗୁଜବକୁ ଶୁଣନ୍ତୁ ନାହିଁ ବୋଲି ଡିଆଇଜି କହିଛନ୍ତି । ଏଥିସହ ଗତକାଲି ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଭଦ୍ରକ ଜିଲ୍ଲା ଗସ୍ତରେ ଆସି ଏନେଇ ଏକ ସମୀକ୍ଷା ବୈଠକ କରି ଫେରି ଯାଇଛନ୍ତି । ଶାନ୍ତି ବଜାୟ ରଖିବା ପାଇଁ ଜିଲ୍ଲା ପ୍ରଶାସନ ଓ ଧାମନଗର ପୋଲିସ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ଦ୍ବାରା ଲୋକଙ୍କୁ ଅନୁରୋଧ କରାଯାଇଛି । ବିଭିନ୍ନ ସ୍ଥାନରେ ଅସ୍ଥାୟୀ ପୋଲିସ ପୋଷ୍ଟ ବସିବା ସହ ଫ୍ଲାଗ ମାର୍ଚ୍ଚ ଚାଲିଛି । ଅନ୍ୟପଟେ ପୋଲିସ ଉପରକୁ ପଥର ମାଡ଼ ଏବଂ ତହସିଲଦାରଙ୍କ ଗାଡ଼ି ଭାଙ୍ଗିବା ନେଇ ପୁରୁଣା ବଜାର ଥାନାରେ ପୃଥକ୍ ମାମଲା ରୁଜୁ ହୋଇଛି । ଅଟକ ଥିବା ୯ ଜଣଙ୍କ ମଧ୍ୟରୁ ଅଦ୍ୟାବଧି ୭ ଜଣଙ୍କୁ କୋର୍ଟ ଚାଲାଣ କରାଯାଇଛି । ଏହାସହ ମୁଖ୍ୟ ଅଭିଯୁକ୍ତ କୁହାଯାଉଥିବା ଯୁବକକୁ ମଧ୍ୟ ପୋଲିସ ବାନ୍ଧିଛି ।
ଶାନ୍ତି ଶୃଙ୍ଖଳା ରଖିବା ପାଇଁ ଅପିଲ:
ଏନେଇ ପୂର୍ବାଞ୍ଚଳ ଡିଆଇଜି ଡ଼. ସତ୍ୟଜିତ ନାୟକ କହିଛନ୍ତି, ପରିବେଶ ଶାନ୍ତ ରହିଛି । ବର୍ତ୍ତମାନ ସ୍ଥିତି ନିୟନ୍ତ୍ରଣରେ ରହିଛି । ଏବେ ରାପିଡ ଆକ୍ସନ ଫୋର୍ସ ୨ କମ୍ପାନୀ ଆସି ପହଞ୍ଚିଛନ୍ତି । ଆମର ଫ୍ଲାଗ ମାର୍ଚ୍ଚ ଆମେ କରିଛୁ । ଏହି ଘଟଣାରେ ଗତକାଲି ଭଦ୍ରକରୁ ୭ ଜଣଙ୍କୁ ଗିରଫ କରାଯାଇଥିବା ବେଳେ ଆଜି ଆଉ 7 ଜଣଙ୍କୁ ଧାମନଗରରୁ ଗିରଫ କରାଯାଇଛି । ବିଭ୍ରାନ୍ତିକର ପୋଷ୍ଟ କରିଥିବା ଅଭିଯୁକ୍ତକୁ ପୋଲିସର ଟିମ ଗିରଫ କରିଛି । ଅଞ୍ଚଳରେ ଶାନ୍ତି ଶୃଙ୍ଖଳା ରଖିବା ପାଇଁ ଅପିଲ କରୁଛି ।"
କାହିଁକି ହେଲା ବିବାଦର ସୂତ୍ରପାତ:
ପ୍ରକାଶ ଥାଉକି, ସାମାଜିକ ଗଣମାଧ୍ୟମରେ ଜଣେ ବ୍ୟକ୍ତି ନିର୍ଦ୍ଦିଷ୍ଟ ଏକ ସମ୍ପ୍ରଦାୟ ବିରୋଧୀ ବାର୍ତ୍ତା ଛାଡ଼ିଥିଲେ । ଯାହାକୁ ନେଇ ପୁରୁଣା ବଜାର ଥାନାରେ ଅଭିଯୋଗ ହୋଇଥିଲା । ହେଲେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ଅନ୍ୟ ଏକ ସମ୍ପ୍ରଦାୟ ପକ୍ଷରୁ କରାଯାଉଥିବା ବେଆଇନ ରାଲିକୁ ଅଟକାଇବା ପାଇଁ ପୋଲିସ ପକ୍ଷରୁ ପ୍ରୟାସ ଆରମ୍ଭ ହେବା ପୂର୍ବରୁ ପୋଲିସ ଏବଂ ମାଜିଷ୍ଟ୍ରେଟ ଉକ୍ତ ଗୋଷ୍ଠୀର ଆକ୍ରମଣର ଶିକାର ହୋଇଥିଲେ । ଯାହାକୁ ନେଇ ପରବର୍ତ୍ତୀ ସମୟରେ ଉତ୍ତେଜନା ସ୍ଥିତି ସୃଷ୍ଟି ହୋଇଥିଲା । ତେବେ ସମ୍ପ୍ରତି ଅଞ୍ଚଳରେ ବିଭିନ୍ନ ଦୋକାନ ବଜାର ବନ୍ଦ ଥିବା ବେଳେ ଭଦ୍ରକ ଜିଲ୍ଲାରେ ଏବେ ଇଣ୍ଟରନେଟ ସେବା ବନ୍ଦ କରାଯାଇଛି । ଅନ୍ୟପକ୍ଷରେ ସମ୍ପ୍ରତି ଭଦ୍ରକ ଏବଂ ଧାମନଗରରେ ସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣାଧୀନ ରହିଛି ।
ଇଟିଭି ଭାରତ, ଭଦ୍ରକ
